ލާޒިމުނޫން ތަންތަނުގައި ހެލްމެޓް އަޅާނަމަ ބަލައި ފާސްކުރަނީ

ހެލްމެޓް އެޅުން ލާޒިމުކުރާ ސަރަހައްދުތައް ފިޔަވައި އެހެން ސަރަހައްދުތަކުގައި ހެލްމެޓް އަޅައިގެން އެއްގަމު އުޅަނދު ދުއްވާ މީހުންނަށް ފާރަވެރިވެ ތުހުމަތުކުރެވޭ މީހުން ހުއްޓުވައި ބަލައި ފާސްކުރަން ފުލުހުން ނިންމައިފި އެވެ.

ފުލުހުން ރޭ ނެރުނު ބަޔާނުގައި ވަނީ، ހެލްމެޓް އެޅުން ގާނޫނުތަކުން ލާޒިމުކޮށްފައިނުވާ ސަރަހައްދުތަގައި، ކާކުކަން ވަންހަނާކޮށް ކުށްކުށަށް އަރައިގަތުމުގެ ނިޔަތުގައި ހެލްމެޓް އަޅައިގެން ބައެއް މީހުން އުޅޭކަމަށާއި ހިދުމަތް ދޭ ތަންތަނަށާއި ވިޔަފާރިކުރާ ތަންތަނަށް ވަދެހަދާކަން ފުލުހުންގެ މުވައްސަސާއަށް ފާހަގަ ކުރެވިފައި ވާކަމަށެވެ.

ގަވާއިދުގައިވާ ގޮތުން A1 އަދި A0 ގިންތީގެ އުޅަނދު ދުއްވާއިރު، އުޅަނދު ދުއްވަން އިންނަ މީހާއާއި އުޅަނދުގެ ފަހަތުގައި އިންނަ މީހާ ހެލްމެޓް އެޅުން ލާޒިމް ކޮށްފައިވަނީ 30 ކިލޯމީޓަރަށްވުރެ ބާރަށް އެއްގަމުއުޅަނދު ދުއްވަން ހުއްދަކޮށްފައިވާ ސަރަހައްދުތަކުގައެވެ. އަދި އެ ސަރަހައްދުތަކުގައި އުޅަނދު އްވޭ ބާރުމިން އަންގައިދޭ ބޯޑު ހަރުކޮށްފައި ހުންނާނެކަން ވެސް ފުލުހުންގެ ބަޔާނުގައިވެއެވެ.

މާލޭ ސަރަހައްދުން ނަމަ ހެލްމެޓް އެޅުން ލާޒިމުކުރާ ސަރަހައްދުތަކަކީ ސިނަމާލެ ބްރިޖާއި ބްރިޖުގެ ހައިވޭ އެވެ. ނަމަވެސް މިނޫން ސަރަހައްދުތަކުގައި ކާކުކަން ނޭނގޭނެހެން ހެލްމެޓް އަޅައިގެން ކުށްކުށަށް އަރައިގަންނަ މިންވަރު މި ފަހުން ވަނީ އިތުރުވެފަ އެވެ. މިފަދަ ސަބަބުތަކާހުރެ 2023 ވަނަ އަހަރުގެ ފެބްރުއަރީ މަހު ވެސް މި ކަންކަމަށް ސަމާލުވުމަށް އިލްތިމާސްކޮށް ފުލުހުން ވަނީ ބަޔާނެއް ނެރެފައެވެ.

"މިއީ، އެންމެހައި ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް އަމާން ވެއްޓެއް ގާއިމުކުރުމުގެ ގޮތުން އަޅާ ފިޔަވަޅެކެވެ،" ފުލުހުންގެ ބަޔާނުގައިވެއެވެ.