ފަތަން ދަސްކޮށްދިނުމުގެ ޕްރޮގްރާމަކާއި ފަސްޓްއެއިޑް ޓްރެއިނިންގ ޕްރޮގްރާމެއް މަންދޫގައި ކުރިއަށް ގެންގޮސްފި

ފަތަން ދަސްކޮށްދިނުމުގެ ޕްރޮގްރާމަކާއި ފަސްޓްއެއިޑް ޓްރެއިނިންގ ޕްރޮގްރާމެއް އދ. މަންދޫގައި ކުރިއަށް ގެންގޮސްފިއެވެ.

މި ދެ ޕްރޮގްރާމް ނިންމުމަށް، މިމަހުގެ 5ވަނަ ދުވަހުގެ ރޭ ބޭއްވި ރަސްމިއްޔާތު ޝަރަފުވެރިކޮށްދެއްވީ އދ. އަތޮޅު ކޮމާންޑަރު އިންސްޕެކްޓަރ އޮފް ޕޮލިސް ހުސައިން އަޒްމީލްއެވެ. މި ރަސްމިއްޔާތުގައި، މަންދޫ ކައުންސިލް ރައީސްއާއި ސްކޫލު ޕްރިންސިޕަލްގެ އިތުރުން މުއައްސަސާތަކުގެ އިސްވެރިން ބައިވެރިވެލެއްވިއެވެ.

ނޮވެމްބަރު 15 އިން 30އަށް އދ. އަތޮޅު ފުލުހުން ކުރިއަށް ގެންދިޔަ މި ޕްރޮގްރާމުތަކުގެ ތެރެއިން ފަތަން ދަސްކޮށްދިނުމުގެ ޕްރޮގްރާމް ކުރިއަށް ގެންގޮސްފައިވަނީ ސްކޫލު ދަރިވަރުންނަށެވެ. މި ޕްރޮގްރާމުގައި 51 ދަރިވަރުން ބައިވެރިވިއެވެ. މި ޕްރޮގްރާމުގައި، ފަތަން ދަސްކޮށްދިނުމުގެ އިތުރުން މޫދަށް އެރި އުޅުމުގައި ސަމާލުކަންދޭންޖެހޭ ކަންކަމާއި ދިމާވާ އެކި ހާދިސާތަކުގައި އަމަލުކުރާނެ ގޮތްތައް ދަސްކޮށްދީފައިވެއެވެ.

ފަސްޓް އެއިޑް ޓްރެއިނިންގ ޕްރޮގްރާމް ކުރިއަށް ގެންގޮސްފައިވަނީ މަންދޫ މުއައްސަސާތަކުގެ މުވައްޒަފުންނަށެވެ. މި ޕްރޮގްރާމުގައި ހުރިހާ މުއަައްސަސާއެއް ހިމެނޭގޮތަށް 41 މީހުން ބައިވެރިވިއެވެ. މި ޕްރޮގްރާމުގައި، ތަފާތު އެކި ހާދިސާތަކުގައި ފުރަތަމަ އެހީ މީހަކަށް ނުވަތަ ބަޔަކަށް ދޭންޖެހިއްޖެ ހާލަތުގައި އަމަލުކުރާނެ ގޮތްތައް ދަސްކޮށްދީފައިވެއެވެ.

އަދި ސިއްހީ ހިދުމަތްދޭ މަރުކަޒަކަށް ގެންދެވެންދެން އެހީތެރިކަން ފޯރުކޮށްދޭނެ ގޮތްތަކާއި ސަމާލުކަންދޭންޖެހޭ އެހެނިހެން ކަންކަމުގެ މައުލޫމާތު ހިއްސާކޮށްފައިވެއެވެ.