ލ. އަތޮޅު ސްކޫލްތަކުގެ ދަރިވަރުންނަށް ޓްރެފިކް މޮނީޓާސް ޕްރޮގްރާމް ފަށައިފި

ސްކޫލް ދަރިވަރުންނަށް ހާއްސަކޮށްގެން ފުލުހުން ކުރިއަށްގެންދާ ހަރަކާތްތަކުގެ ތެރެއިން، އެވެއާނަސް އެންޑް ޕްރިވެންޝަން ޔުނިޓާއި ލ. އަތޮޅު ފުލުހުން ގުޅިގެން އެ އަތޮޅު ސްކޫލު ދަރިވަރުންނަށް ޓްރެފިކް މޮނީޓާސް ޕްރޮގްރާމް ފަށައިފިއެވެ.

ނޮވެންބަރު މަހުގެ 2 އިން 7 އަށް މި ޕްރޮގްރާމް ކުރިއަށް ގެންދަނީ ލ. އަތޮޅު ތައުލީމީ މަރުކަޒުގައެވެ.

މި ޕްރޮގްރާމުގައި، އެއްގަމު ދަތުރުފަތުރުގެ ގާނޫނާއި ގަވާއިދުތަކަށް ދަރިވަރުން އަހުލުވެރިކުރުވުމަށް މައުލޫމާތުދޭނެއެވެ. އަދި ސްކޫލު ސަރަހައްދުގައި ޓްރެފިކް ބެލެހެއްޓުމަށް ދަރިވަރުން ތަމްރީނުކުރާނެއެވެ.

މީގެ އިތުރުން، ރިވެތި ބަހުން މުއާމަލާތުކުރުމުގެ ހުނަރުތައް ދަސްކޮށްދިނުމުގެ އިތުރުން އަމިއްލަ ސަލާމަތާއި ރައްކާތެރިކަމަށް ސެލްފް ޑިފެންސް ކުލާސްތައް ކުރިއަށް ގެންދާނެއެވެ.

މި ޕްރޮގްރާމުގައި، ލ. އަތޮޅު ތައުލީމީ މަރުކަޒުގެ 29 ދަރިވަރުން، ހަމަދުބިން ޚަލީފާ އާލްޘާނީ ސްކޫލްގެ 35 ދަރިވަރުން އަދި އިހައްދޫ ސްކޫލްގެ 36 ދަރިވަރުން ޓްރެފިކް މޮނީޓަރުންގެ ގޮތުގައި ތަމްރީނުކުރާނެއެވެ.

މީގެ އިތުރުން، މި ހަފުތާގެ އެކި ދުވަސްތަކުގައި ޓްރެފިކް އެވެއާނަސް ސެޝަންތައް ތަކާއި ފަހި ރާސްތާ ޕްރޮގްރާމް ލ. އަތޮޅުގެ އެކި ރަށްރަށުގައި ކުރިއަށް ގެންދާނެއެވެ.