ވަޒީރުގެ އުންމީދަކީ ކުނބުރުދޫ މަރުކަޒުން ލިބޭ ޚިދުމަތަކީ އިތުބާރު ލިބޭ ޚިދުމަތަކަށް ވުން

ކުނބުރުދޫގައި ގާއިމްކުރި ފުލުހުންގެ އައު މަރުކަޒާއެކު ރައްޔިތުންނާ ގާތުން، ރައްޔިތުންގެ އިތުބާރު ލިބޭ ފަދަ ފުރިހަމަ ހިދުމަތެއް ފުލުހުންގެ ފަރާތުން ފެނިގެންދާނެ ކަމަށް އުންމީދުކުރައްވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިފަދައިން ވިދާޅުވެފައިމިވަނީ އދ. ކުނބުރުދޫގައި އަލަށް އިމާރާތްކުރި ފުލުހުންގެ މަރުކަޒު ރަސްމީކޮށް ހުޅުވައިދެއްވާ ދެއްކެވި ވާހަކައިގައެވެ.

މި ރަސްމިއްޔާތުގައި ވާހަކަ ދައްކަވަމުން ވަޒީރު ވަނީ ގައުމީ ފެންވަރުގައި ފުލުހުންގެ ޚިދުމަތުން ޚާއްސަ އިސްކަމެއް ދީގެން ހައްލުކުރަންޖެހޭ މައިގަނޑު ހަތަރު ދާއިރާއެއް ފާހަގަކުރައްވާފައެވެ.

އޭގެ ތެރޭގައި މަސްތުވާތަކެތީގެ މާހައުލު ނައްތާލުމާއި، ގޭންގު ކުށްތައް ހުއްޓުވުމާއި، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމުގެ އިތުރުން ކުޑަކުދިން ކުށުގެ ވެށިން ރައްކާތެރިކުރުން ހިމެނެއެވެ.

އަދި އައު މަރުކަޒާއެކު ރައްޔިތުންނާ ގާތުން، ރައްޔިތުންގެ އިތުބާރު ލިބޭ ފަދަ ފުރިހަމަ ހިދުމަތެއް ފުލުހުންގެ ފަރާތުން ފެނިގެންދާނެ ކަމަށް އުންމީދުކުރައްވާ ކަމަށް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ރާއްޖޭގެ 63 ރަށެއްގައި ފުލުހުން ފިޒިކަލީ ގާއިމުވެ ތިބެގެން ހިދުމަތް ދެމުން ނުދާކަން ވަޒީރުގެ ވާހަކައިގައި ފާހަގަކުރެއްވިއެވެ.

ނަމަވެސް، ފުލުހުން ކުރެއްވި ބުރަ މަސައްކަތުން މިހާރު އެ 63 ރަށުގައި ވެސް ފުލުހުން ގާއިމުވެ ތިބެގެން ހިދުމަތް ދެމުންދާކަން ވަޒީރު ފާހަގަކުރެއްވިއެވެ. އަދި އޭރު އަމިއްލަ މަރުކަޒުތައް ހުރީ އެންމެ 17 ރަށުގައި ކަމަށާއި، ގާތްގަނޑަކަށް 170 އެއްހައި ރަށުގައި ފުލުހުން ހިދުމަތް ދެމުންދިޔައީ ކައުންސިލު އިދާރާތަކާއި އަމިއްލަ ތަންތަން ކުއްޔަށް ހިފައިގެން ވަރަށް ދަތި ހާލުގައި ކަމަށްވެސް ވަޒީރު ވިދާޅުވިއެވެ.

ރަށްރަށުގައި ފުލުހުންގެ ހިދުމަތް ދިނުމަށް ހާއްސަކޮށް ޑިޒައިންކުރެވިފައިވާ 154 މަރުކަޒު އެޅުމަށް ސަރުކާރުން ފަށާފައިވާ ބޮޑު މަޝްރޫއުގެ މައްޗަށް އަލިއަޅުވައިލައްވަމުން ވަޒީރު ވިދާޅުވީ، ކުނބުރުދޫ ފަދަ އާބާދީ ކުދި އަދި ކުށް މަދު ރަށްރަށުގައި ވެސް ފުލުހުންގެ ހާއްސަ މަރުކަޒުތައް ގާއިމުކުރުމުގެ މައިގަނޑު މަގުސަދަކީ ކުށުގެ ވެށި އުފެދުމުގެ ކުރިން މުޖުތަމައާ ގުޅިގެން އަމާން ވެއްޓެއް ދެމެހެއްޓުން ކަމަށެވެ.

ރަށުގައި މާ ބައިވަރު އަދި ކުށްތަކެއް ނުހިނގި ކަމުގައިވިޔަސް، މިފަދަ މަރުކަޒެއް ހުރެގެން ރަށުގެ ރައްޔިތުންނާއި ރަށުގެ އެކިއެކި މުއައްސަސާތަކާ ގުޅިގެން ފުލުހުން ކުރަމުންދާ ކޮމިއުނިޓީ ބޭސްޑް މަސައްކަތްތަކަކީ ރަށުގެ ކުށުގެ މާހައުލު ނެތި މި އޮންނަ އަމާން ވެށި ދެމެހެއްޓުމަށްޓަކައި ކޮންމެހެން ކުރަންޖެހޭ ކަމެއް. ވަޒީރު

ކުނބުރުދޫގެ ޕޮލިސް ޕޯސްޓުގެ އިމާރާތް ކުރު މުއްދަތެއްގެ ތެރޭގައި ފުރިހަމަކޮށް ނިންމުމުގައި ކޮންޓްރެކްޓަރ އާރުޑީސީން ދެއްވި އަހައްމިއްޔަތުކަމަށާއި، ދާއިރާގެ އިއްޒަތްތެރި މަޖިލިސް މެންބަރާއި، ކުނބުރުދޫ ކައުންސިލާއި ރައްޔިތުންގެ ފަރާތުން ލިބުނު ފުރިހަމަ އެއްބާރުލުން ފާހަގަކުރައްވައި ވަޒީރު ވަނީ އެ ފަރާތްތަކަށް ޝުކުރު އަދާކުރައްވާފައެވެ.

ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްގެން، 2025 އޮކްޓޫބަރު 7ގައި ބިންގާއަޅައި، އަހަރެއްހައި ދުވަހުގެ ތެރޭގައި މަސައްކަތް ނިންމައި މިއަދު ހުޅުވި މި މަރުކަޒު ހުޅުވައިދެއްވީ، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާނާއި ކޮމިޝަނަރ އޮފް ޕޮލިސް އަޙްމަދު މުޙައްމަދެވެ.

މި ރަސްމިއްޔާތުގައި، ޑެޕިއުޓީ ކޮމިޝަނަރ ފަރުހާދު ފިކުރީއާއި، ދާއިރާގެ މަޖިލިސް މެންބަރާއި، ކުނބުރުދޫ ކައުންސިލު ރައީސާއި، އާރްޑީސީގެ މެނޭޖިންގ ޑިރެކްޓަރާއި، ފުލުހުންގެ ޚިދުމަތުން ރިޓަޔަރ ކުރައްވާފައިވާ އިސް އޮފިސަރުން ކަމަށްވާ ޑެޕިއުޓީ ކޮމިޝަނަރ (ރިޓަޔަރޑް) އަޙްމަދު ޞާދިޤް އަދި ޗީފް ސުޕްރިންޓެންޑެންޓް (ރިޓަޔަރޑް) އިބްރާހީމް މަނިކުގެ އިތުރުން ފުލުހުންގެ އެގްޒެކެޓިވް އޮފިސަރުންނާއި ރަށުގެ ގިނަ އަދަދެއްގެ ރައްޔިތުން ބައިވެރިވިއެވެ.