logo
banner image

ފުވައްމުލަހުގެ ހަކަތައިގެ މައްސަލައިގައި އިޔާދަކުރަނިވި ހަކަތަ އިތުރުކުރުމަށް މަޝްވަރާތަކެއް ބާއްވައިފި

ފުވައްމުލައް ސިޓީ ކައުންސިލް އާއި މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓްއާއު ގުޅިގެން، ފުވައްމުލަހުގެ ހަކަތައިގެ މައްސަލައިގައި އިޔާދަކުރަނިވި ހަކަތައިގެ ބައި އިތުރުކުރުމާ ބެހޭ ގޮތުން މުހިންމު މަޝްވަރާތަކެއް ބާއްވައިފިއެވެ. މި މަޝްވަރާތައް ބާއްވާފައިވަނީ ފުވައްމުލައް ސިޓީގެ ހަކަތަ އުފެއްދުމުގައި އިތުރަށް އިޔާދަކުރަނިވި ވަސީލަތްތައް ބޭނުންކުރުމަށްޓަކައި ކުރެވިދާނެ ކަންކަމާ ގުޅޭގޮތުން ޚިޔާލު ބަދަލުކުރުމުގެ ގޮތުންނެވެ.

މި ބައްދަލުވުމުގައި، ފުވައްމުލައް ސިޓީގެ މޭޔަރު އިސްމާއިލް ރަފީގު ވަނީ، ސޯލާ ޕީވީ ހަރުކުރުމަށް އިތުރު ޖާގަ ކަނޑައެޅުމުގެ ރާވައިފައިވާ ކަން ހާމަކުރައްވާފައެވެ. މޭޔަރު ވިދާޅުވީ، މިގޮތުން އިޔާދަކުރަނިވި ހަކަތައިގެ ދާއިރާއަށް އަމިއްލަ ފަރާތްތަކުން އިންވެސްޓްކުރުމަށް ފުރުސަތު ހުޅުވާލުމަށް، ޕަވަރ ޕަރޗޭސް އެގްރީމަންޓް (ޕީ.ޕީ.އޭ) މޮޑެލް ބޭނުންކުރުމަށް ރާވާފައިވާ ކަމަށެވެ.

މި ފިޔަވަޅުތަކުގެ ބޭނުމަކީ، ފުވައްމުލައް ސިޓީގެ ހަކަތަ އުފައްދާ ނިޒާމްތައް އިތުރަށް ގްރީން ކުރުމެވެ. އިޔާދަކުރަނިވި ހަކަތައިގެ ބައި އިތުރުކުރުމަކީ ތިމާވެއްޓަށް ދިމާވާ އަސަރުތައް ކުޑަކުރުމުގެ އިތުރުން، ދިގު މުއްދަތުގައި ހަކަތައިގެ ޚަރަދު ކުޑަކުރުމަށްވެސް އެހީތެރިވެދޭނެ މުހިންމު ކަމެކެވެ. މި މަޝްވަރާތަކުން ދައްކުވައިދެނީ ފުވައްމުލައް ސިޓީއިން ތިމާވެއްޓަށް ރައްކާތެރި އަދި ދެމެހެއްޓެނިވި ހަކަތައަށް ބަދަލުވުމަށް ދޭ އަހަންމިއްޔަތުކަމެވެ. މި ބައްދަލުވުން ބޭއްވުނީ މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓްގައެވެ.