ސައިބަރ ހަމަލާތަކުން ރައްކާތެރިވުމަށްޓަކައި ރާއްޖެއިންވެސް މަސައްކަތް ކުރަންޖެހޭ: ޑރ. ކިނާނަތު

ސައިބަރ ހަމަލާތަކުން ރައްކާތެރިވުމަށްޓަކައި ބޮޑެތި ގައުމުތަކުން ކުރައްވަމުން ގެންދަވާ މަސައްކަތްތައް ރާއްޖެއިންވެސް ކުރައްވަން ޖެހޭ ކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ސްޓޭޓް މިނިސްޓަރ ޑރ. މުޙައްމަދު ކިނާނަތު ވިދާޅުވެއްޖެއެވެ.

ސައިބަރ ސެކިއުރިޓީ އާއި ނޭޝަނަލް އާޓިފިޝަލް އިންޓެލިޖެންސްއާ ގުޅޭގޮތުން ބޭއްވި ސިމްޕޯސިމްއާ ގުޅޭ ގޮތުން ވާހަކަ ދައްކަވަމުން ޑރ. ކިނާނަތު ވިދާޅުވީ މި ސިމްޕޯޒިއަމްގަ ސަރުކާރުގެ އެކި މުއައްސަސާތަކުން ބައިވެރިވި ކަމަށާއި އެގޮތުން ޓެކްނިލަކް ބޭފުޅުންނާއި ނޮން ޓެކްނިކަލް ބޭފުޅުން މި ހަރަކާތުގައި ބައިވެރިވި ކަމަށެވެ.

މީގެ އިތުރުން ސައިބަރ ސެކިއުރިޓީގެ މައްޗަށް އަލިއަޅުއްވާލައްވާ ވާހަކަ ދައްކަވަމުން ޑރ. ކިނާނަތު ވިދާޅުވީ ސައިބަރ ސެކިއުރިޓީ ތްރެޓް ލެވެލް ހުރީ ނުހަނު ކަންބޮޑުވާ ހިސާބެއްގައި ކަމަށާއި ސައިބަރ ހަމަލާތަކުން ރައްކާތެރިވުމަށްޓަކައި ބޮޑެތި ގައުމުތަކުން ކުރައްވަމުން ގެންދަވާ މަސައްކަތްތައް ރާއްޖެއިންވެސް ކުރައްވަން ޖެހޭ ކަމަށެވެ.

އަޅުގަނޑުމެން ވަކިން ޚައްސަކޮށް ބޭނުންވީ އާޓިފިޝަލް އިންޓެލިޖެންސް ޓެކްނޮލޮޖީގެ މުހިންމު ކަމުގެ ވާހަކަ ދައްކަން، އަދި ވަކިން ޚާއްސަކޮށް ދުނިޔޭގެ ކޮންޓެކްސްޓްގަ އާޓިފިޝަލް އިންޓެލިޖެންސް ޓެކްނޮލޮޖީ ގޮސްފަވާ ހިސާބާއި އަދި އޭގެ އިތުރުން ރާއްޖޭގަވެސް ކުރިއަށްއޮތް ތަނުގަ އޭއައި ބޭނުންކޮށްގެންނޭ ސިސްޓަމްތައްވެސް ޑިޒައިންކުރެވެން ޖެހޭނީ. ސްޓޭޓް މިނިސްޓަރ ޑރ. މުޙައްމަދު ކިނާނަތު

އެއީ އެކަމުގެ ނުރައްކާ އޮތުމުން ކަމަށާއި އެކި ނަން ނަމުގަ ކުރިއަށް އޮތްތަނުގަ މިފަދަ ސިމްޕޯޒިއަމްތައް ބާއްވާނެ ކަމަށް ޑރ. ކިނާނަތު ވިދާޅުވިއެވެ.

ޑރ. ކިނާނަތު ވިދާޅުވީ އެންސީއައިޓީން އޭއައިއާ ބެހޭ ހޭލުންތެރި ޕްރޮގްރާމުތައް ހިންގުމާއި އޭއައިގެ މުހިންމުކަން ރައްޔިތުންނަށް އަންގައިދޭނެ ކަމަށެވެ.

ކޮންމެ އަހަރެއްގެވެސް އޮކްޓޫބަރުގެ މަހަކީ އިންޓަރނެޓް މެދުވެރިކޮށް ހިންގާ ކުށްތަކާމެދު ހޭލުންތެރިކުރުވުމަށް ފާހަގަކުރާ މަހެވެ. މި މަސްތެރޭ ރައްޔިތުން ހޭލުންތެރިކުރުވުމަށް އެކި ހަރަކާތްތައް ކުރިއަށް ގެންދިޔުމަށް ވަނީ ނިންމާފައެވެ.

މިގޮތުން ނޭޝަނަލް ސެންޓަރ ފޯ އިންފޮމޭޝަން ޓެކްނޮލަޖީން ވަނީ ނޭޝަނަލް އާޓިފިޝަލް އިންޓެލިޖެންސްއާއި ސައިބަރ ސެކިއުރިޓީއަށް ހޭލުންތެރިކުރުވުމަށް ސިމްޕޯޒިއަމްއެއް ކުރިއަށް ގެންގޮސްފައެވެ. މިއީ އެންސީއައިޓިން މި ސިމްޕޯޒިއަމް ކުރިއަށް ގެންދިޔަ 3 ވަނަ ފަހަރެވެ.

މި ސިމްޕޯޒިއަމްގެ ފުރަތަމަ 3 ދުވަހު ވަނީ އާރޓިފިޝަލް އިންޓަލެޖެންސް އަދި ސްމާޓް ޓެކްނޮލަޖީއަށް ދޭ އަހައްމިޔަތުގެ މައްޗަށް މަޢުލޫމާތު ހިއްސާކޮށްފައެވެ.

މި އަހަރުގެ ސިމްޕޯޒިއަމް އަމާޒުކޮށްފައިވަނީ ސަރުކާރުގެ އިސް ފަރާތްތަކާއި، ކުންފުނިތަކުގެ ވެރިންނާއި، އައިޓީ ޕްރޮފެޝަނަލުންނާއި، ތަޢުލީމީ ދާއިރާގެ ފަރާތްތަކާއި، އަދި ޢާންމު ރައްޔިތުންނަށެވެ.

ޖެހިޖެހިންގެ 3 އަހަރު އެންސީއައިޓީން މި ހަރަކާތް ކުރިއަށް ގެންދިޔަނަމަވެސް އަންނަ އަހަރުން ފެށިގެން ނެޝަނަލް ސައިބަރ ސެކިއުރިޓީ އޭޖެންސީއަށް މި ޒިންމާ ޙަވާލުކުރުމަށް އެންސީއައިޓީން ދަނީ މަސައްކަތް ކުރަމުންނެވެ.

އެންސީއެސްއޭ އިން ސައިބަރ ސެކިއުރިޓީގެ މަސައްކަތްތައް އައު ހަރުފަތަކަށް ގެންދިއުމަށް ހަމަޖެހިފައިވާއިރު، ޤައުމަށް ވަރުގަދަ އަދި މުސްތަޤްބަލަށް ފެތޭ ޑިޖިޓަލް މާޙައުލެއް އުފެއްދުމަށް އަމާޒުކޮށްގެން އިތުރު ހަރަކާތްތަކެއް ފެށުމަށް ވަނީ ހަމަޖެހިފައެވެ.

ކުރިއަށް އޮތްތަނުގަ އާރޓިފިޝަލް އިންޓަލެޖެންސްގެ މަސައްކަތްތައް ރާވާ ހިންގުމަަށް އެންސީއައިޓިން މިހާރުވެސް ދަނީ ގިނަ މަސައްތަކެއް ކުރައްވަމުންނެވެ.