ސައުތު ޕޮލިސް ރީޖަންގައި ކުށްމަދުކުރުމަށް ހާއްސަ މަސައްކަތްތަކެއް ފުލުހުން ގެންދަނީ ކުރަމުން: ޝަމީމް

ސައުތު ޕޮލިސް ރީޖަން (ގއ. ގދ. ޏ. ސ)ގެ ރަށްރަށުގައި ކުށްމަދުކުރުމަށް ހާއްސަ މަސައްކަތްތަކެއް ކުރަމުންގެންދާ ކަމަށް އެ ރީޖަންގެ ކޮމާންޑަރު އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝަމީމް ވިދާޅުވެއްޖެއެވެ.

އެސިސްޓެންޓް ކޮމިޝަނަރ އަޙްމަދު ޝަމީމް މިފަދައިން ވިދާޅުވީ މިއަދު އޮންލައިންކޮށް މީޑިއާތަކާ ބައްދަލުކުރައްވައި ދެއްކެވި ވާހަކަފުޅުގައެވެ.

މި ބައްދަލުކުރެއްވުމުގައި، އައްޑޫ ސިޓީ ޕޮލިސް ކޮމާންޑަރު ސުޕްރިންޓެންޑެންޓް އޮފް ޕޮލިސް މުޙައްމަދު މަސްޢޫދުއާއި، ސައުތު ޕޮލިސް ސަބް ރީޖަން ކޮމާންޑަރު ޗީފް އިންސްޕެކްޓަރ އޮފް ޕޮލިސް ޑރ. ފާޠިމަތު ރިޝްވީނާ އަޙްމަދުއާއި، ފުވައްމުލައް ސިޓީ ކޮމާންޑަރު އިންސްޕެކްޓަރ އޮފް ޕޮލިސް މޫސާ ލަޠީފް ބައިވެރިވެލެއްވިއެވެ

ގިނަ މީޑީއާތަކެއް ބައިވެރިވި މި ބައްދަލުވުމުގައި، ސައުތު ޕޮލިސް ރީޖަންގައި ކުށްމަދުކުރުމަށް މި އަހަރުގެ މިހާތަނަށް ކުރެވިފައިވާ މަސައްކަތްތަކާއި ހިންގާފައިވާ އޮޕަރޭޝަންތަކާއި، ތަހުގީގުކޮށްފައިވާ އަދި މިހާރު ވެސް ތަހުގީގުކުރަމުންދާ ބައެއް މައްސަލަތަކާއި ރައްޔިތުންނާ ގުޅިގެން ރައްޔިތުންނާ ގާތުން ކުރެވިފައިވާ މަސައްކަތްތަކުގެ މައުލޫމާތު ހިއްސާކުރެއްވިއެވެ. އަދި މީޑިއާތަކުން ކުރެއްވި ސުވާލުުތަކުގެ ޖަވާބުދެއްވިއެވެ.

މީގެ އިތުރުން، 2024 އިން 2028 އަށް އެކުލަވައިލާފައިވާ ދިވެހި ފުލުހުންގެ ޚިދުމަތުގެ ސްޓްރެޓީޖިކް ޕްލޭންގެ ލަނޑުދަނޑިތައް ހާސިލުކުރުމަށްޓަކައި ކަނޑައަޅާފައިވާ ލޯކަލް ޕްލޭންގެ ދަށުން މަސައްކަތްކޮށް އެ ލަނޑުދަނޑިތައް ހާސިލުކުރުމަށް މަސައްކަތް ކުރަމުންގެންދާ ކަމަށް އޭސީޕީ އަޙްމަދު ޝަމީމް ވިދާޅުވިއެވެ.

އަދި އެ ރީޖަންގައި މިވަގުތު އެންމެ އިސްކަމެއްދެނީ ގޭންގު ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނު ތަންފީޒުކުރުމަށާއި މަސްތުވާތަކެއްޗާއި އެހެނިހެން ކުށްތަކުގެ ނުރައްކާ މުޖުތަމައުގައި ކުޑަކުރުމަށް ކަމަށް ވިދާޅުވިއެވެ.

އަދި މަސްތުވާތަކެތީގެ ނެޓްވޯކްތަކާ ދެކޮޅަށް މަސައްކަތްކުރުމަށާއި ގޭންގު ހަދައިގެން އިންތިޒާމުވެގެން ހިންގާ ކުށްތަކާ ދެކޮޅަށް މަސައްކަތްކުރުމުގެ އިތުރުން މަސްތުވާތަކެއްޗާ ދެކޮޅަށް ފުވައްމުލައް ސިޓީގައި 2024 ވަނަ އަހަރު ފެށި ‘’ވެށިރައްކަލް'' އޮޕަރޭޝަން ސައުތު ޕޮލިސް ރީޖަންގެ ހުރިހާ އަތޮޅެއްގައި ހިންގައި ޕްރޯ އެކްޓިވް އިންވެސްޓިގޭޝަން ތަކެއް ކުރިއަށް ގެންދާ ކަމަށް ވިދާޅުވިއެވެ. އަދި މަސްތުވާތަކެތީގެ ވަބާއިން ސަލާމަތްވާން ބޭނުންވާ މީހުން ހޯދައި އެ މީހުންނަށް ބޭނުންވާ ފަރުވާ ދިނުމަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުންދާ ކަމަށް ވެސް މި ބައްދަލުވުމުގައި ފާހަގަކުރެއްވިއެވެ.