ލިވަޕޫލްގެ ޓްރެއިނިން ސެންޓަރަށް ރައީސުލްޖުމްހޫރިއްޔާ ޒިޔާރަތްކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ލިވަޕޫލް ފުޓްބޯޅަ ކުލަބުގެ ޓްރެއިނިންގ ސެންޓަރަށް ޒިޔާރަތް ކުރައްވާ، ޓްރެއިނިން ސެންޓަރު ބައްލަވާލައްވައިފިއެވެ.

ލިވަޕޫލްގެ "އަކްޒާ" ޓްރެއިނިން ސެންޓަރަކީ ލިވަޕޫލްގެ ފަސްޓް ޓީމާއި، ރިޒާވް ޓީމާއި، ޔޫތު ޓީމް ބޭނުންކުރަމުން އަންނަ ފެސިލިޓީއެވެ. އެންމެ ފަހުގެ ޒަމާނީ ވަސީލަތްތަކާއިއެކު ތަރައްގީކޮށްފައިވާ މި ސެންޓަރަކީ ލިވަޕޫލް ފުޓްބޯޅަ ކުލަބުގެ ތަމްރީންތަކާއި، ރަސްމީ ބައްދަލުވުންތައްވެސް ބާއްވާ ސެންޓަރެވެ.

މި ސެންޓަރުގައި ފުޓްބޯޅަ ކުޅޭ ނެޗުރަލް ގްރާސްގެ އަށް ދަނޑާއި، ޓާފް ދަނޑެއްގެ އިތުރުން، ޓެނިސް ކޯޓުތަކާއި، ބީޗްވޮލީބޯޅަ ކޯޓަކާއި، ޖިމްތައް ހުރެއެވެ. މީގެ އިތުރުން އިންޑޯ ކުޅިވަރު ހޯލަކާއި، ސްވިމިން ޕޫލަކާއި، ހައިޑްރޯތެރަޕީ ކޮމްޕްލެކްސްއެއްގެ އިތުރުން ސްޕޯޓްސް ރިހެބިލިޓޭޝަނަށް ހާއްސަ ބަޔަކާއި، މެޑިކަލް ކަންކަމަށް ހާއްސަ ތަންތަންވެސް ތައްޔާރުކުރެވިފައި ހުރެއެވެ.

ލިވަޕޫލްގެ އަކްޒާ ޓްރެއިނިންގ ސެންޓަރަށް ރައީސުލްޖުމްހޫރިއްޔާ ޒިޔާރަތްކުރެއްވީ ލިވަޕޫލް ފުޓްބޯލް ކްލަބް އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) / ވިޒިޓް މޯލްޑިވްސްއާ ގުޅިގެން، ދިވެހިރާއްޖޭގެ ފަތުރުވެރިކަން އިސްތިހާރު ކުރުމަށް ކުރިއަށްގެންދާ ކޯ-ބްރޭންޑިންގ ކެމްޕޭން ފެށުމުގެ ހަރަކާތުގައި ބައިވެރިވެވަޑައިގަތުމަށް އިނގިރޭސިވިލާތަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

ލިވަޕޫލްގެ ތަމްރީން ސެންޓަރަށް ކުރެއްވި ދަތުރުފުޅުގައި ރާއްޖޭގެ ފުޓްބޯޅަ ކުރިއެރުވުމަށް ކުރެވިދާނެކަންކަމާއި، ޒުވާން ކުޅުންތެރިންނަށް ފަހިކޮށްްދެވޭނެ ފުރުސަތުތަކާ ގުޅޭގޮތުން ލިވަޕޫލް ފުޓްބޯޅަ ކުލަބާއިއެކު ވަނީ މަޝްވަރާކުރެވިފައެވެ.

ދިވެހިރާއްޖޭގެ ޓުއަރިޒަމް އިސްތިހާރުކުރުމަށް ކުރެވޭ މަސައްކަތުގެ ތެރެއިން ލިވަޕޫލުން ވަނީ ލިވަޕޫލްގައި އައުޓްޑޯ ކެމްޕޭނެއް ވެސް ފަށާފައެވެ. މިގޮތުން މި ކެމްޕޭނުގެ ދަށުން 100އަށް ވުރެ ޓެކްސީގައި ރާއްޖޭގެ އިޝްތިހާރު ހަރުކޮށް، ލަންޑަނުގެ ބަސްތަކުގައި ރާއްޖޭގެ އިޝްތިހާރުތައްވަނީ ހަރުކޮށްފައެވެ.