23 ރަށެއްގައި ކުޅިވަރު ވަސީލަތްތައް ޤާއިމްކުރުމަށް އާރުޑީސީއާއެކު ސޮއިކޮށްފި

23 ރަށެއްގައި ކުޅިވަރު ވަސީލަތްތައް ޤާއިމްކުރުމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާއެކު ސޮއިކޮށްފިއެވެ.

ރާއްޖޭގެ ރަށް ރަށުގައި ކުޅިވަރުގެ ވަސީލަތްތައް ޤާއިމްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅުގެ ތެރެއިން 77 ރަށެއްގައި ކުޅިވަރު ވަސީލަތްތައް ޤާއިމްކުރުމުގެ އެއްބަސްވުމުގައި ސަރުކާރު ހިއްސާވާ ތިން ކުންފުންޏަކާ މިއަދު ވަނީ ހަވާލުކުރެވިފައެވެ. މި 77 މަޝްރޫޢުއަށް ސަރުކާރުން 204.6 މިލިއަން ރުފިޔާ ހަރަދުކުރާނެއެވެ.

23 ރަށެއްގައި ކުޅިވަރު މަޝްރޫޢުތައް ޤާއިމްކުރުމުގެ އެއްބަސްވުމުގައި ކުޅިވަރު ވުޒާރާގެ ފަރާތުން ސޮއިކުރެއްވީ ކުޅިވަރު ވަޒީރު ޢަބްދުﷲ ރާފިޢުއެވެ. އާރުޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ ބްރެގޭޑިއަރ ޖެނަރަލް ރިޓެއާޑް ޢަލީ ޒުހައިރުއެވެ.

އާރުޑީސީއާ ހަވާލުކުރެވުނު 23 މަޝްރޫއުގެ ތެރޭގައި ހިމެނެނީ އައުޓްޑޯ ހަތް ޖިމް ތަރައްޤީކުރުމާއި، ހަތް ފިޓްނަސް އެންޑް ރެކްރިއޭޝަން ސެންޓަރު ތަރައްޤީކުރުމާއި، ފަސް ފުޓްސަލް ދަނޑު އެޅުމާއި، ފުޓްބޯޅަ ތިން ދަނޑު އެޅުމުގެ އިތުރުން ބެޑްމިންޓަން ކޯޓެއް އެޅުމެވެ.

ސަރުކާރުގެ އަމާޒަކީ ކުރިއަށް އޮތް ދެ އަހަރުގެ ތެރޭގައި ރާއްޖޭގެ ހުރިހާ ރަށެއްގައި އައުޓްޑޯ ޖިމް ޤާއިމްކޮށް، ފިޓްނަސް އެންޑް ރެކްރިއޭޝަން ސެންޓަރުތައް ޤާއިމްކުރުމެވެ.