ކުޅިވަރުގެ 28 މަޝްރޫޢުއެއް ކުރިއަށްގެންދަން ފެނަކައާއެކު ސޮއިކޮށްފި

ކުޅިވަރުގެ 28 މަޝްރޫޢުއެއް ކުރިއަށްގެންދަން ފެނަކަ ކޯޕަރޭޝަންއާއެކު ސޮއިކޮށްފިއެވެ.

ރާއްޖޭގެ އެކި ކަންކޮޅުތަކުގައި ކުޅިވަރު ވަސީލަތްތައް ބިނާކުރުމުގެ ބޮޑު ބިޔަ މަޝްރޫޢުގެ ތެރެއިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅާ އެއްގޮތަށް ސަރުކާރު ހިއްސާވާ ކުންފުނިތަކާއެކު މިހާރުވަނީ އެއްބަސްވެވިފައެވެ. މިގޮތުން ފެނަކަ ކޯޕަރޭޝަންއާއެކު މިއަދު ސޮއިކުރެވުނީ ތަފާތު ތިން ބާވަތެއްގެ ކުޅިވަރު ވަސީލަތްތައް ތަރައްޤީކުރުމަށެވެ.

ހެންވޭރު ބޯޅަ ގޭގައި މިއަދު އޮތް ރަސްމިއްޔާތެއްގައި ކުޅިވަރާއި ހަށިހެޔޮކާ ބެހޭ ވުޒާރާގެ ފަރާތުން މި އެއްބަސްވުމުގައި ސޮއިކުރެއްވީ ކުޅިވަރު ވަޒީރު ޢަބްދުﷲ ރާފިޢުއެވެ. ފެނަކަ ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ މޭޖަރ ރިޓަޔާޑް މުޙައްމަދު ނަޖާޙުއެވެ.

ފެނަކަ ކޯޕަރޭޝަނުން ތަރައްޤީކުރުމަށް ހަމަޖެހިފައިވާ 28 މަޝްރޫޢުގެ ތެރޭގައި ހިމެނެނީ 16 އައުޓްޑޯ ޖިމްތަކާއި، 11 ފިޓްނަސް ރެކްރިއޭޝަން ސެންޓަރުތަކުގެ އިތުރުން ފުޓްބޯޅަ ދަނޑެކެވެ.

މި މަޝްރޫޢުތަކުގެ އަމަލީ މަސައްކަތްތައް ވީހާވެސް އަވަހަށް ފެށުމަށް މަސައްކަތްކުރަމުން އަންނައިރު، ދެ އަހަރުގެ ތެރޭގައި ހުރިހާ މަޝްރޫޢުއެއް ފުރިހަމަކުރުމަކީ ސަރުކާރުގެ އަމާޒެވެ.