ދިވެހި ތަރިކަ ދިރާސާކުރާ ޤައުމީ މަރުކަޒަށް ބޭނުންވާ ޢިލްމީ ބައެއް ޤާބިލުކަން އިތުރުކުރުމުގައި އައިޔޫއެމްއާ މަޝްވަރާކުރައްވައިފި.

ދިވެހި ތަރިކަ ދިރާސާކުރާ ޤައުމީ މަރުކަޒުގެ ސިގްނޭޗަރ ރިސަރޗް ޕްރޮގްރާމުތައް ފެށުމާއި، ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން އިންތިޒާމުކޮށްގެން ކުރިއަށް ގެންދާ ސިންތާތައް މުއްސަނދިކުރުމާއި، ވުޒާރާގެ މުވައްޒަފުންނަށާއި މި ދާއިރާގެ ބޭފުޅުންނަށް ހިންގޭ ތަމުރީނުތަކަށް ޢިލްމީ އެހީތެރިކަން ހޯދޭނެ ގޮތްތަކާ މެދު މަޝްވަރާކުރެއްވުމަށް ވަޒީރު އާދަމް ނަޞީރު އިބްރާހީމް ދިވެހިރާއްޖޭގެ އިސްލާމީ ޔުނިވަރސިޓީގެ ސެންޓަރ ފޮރ ރިސަރޗް އެންޑް ޕަބްލިކޭޝަންގެ ޑީން ޑރ.އާމިނަތު ޝާފިޔާ އާދަމާ މިއަދު ބައްދަލުކުރައްވައިފިއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނެޝަނަލްއައިޑެންޓިޓީ ނުވަތަ ޤައުމިއްޔަތު މަޝްރޫޢުގެ ދަށުން ދިވެހި ތަރިކަ ދިރާސާކުރާ ޤައުމީ މަރުކަޒުގެ މަސައްކަތްތަކަށް ތަމުރީނުކުރަން ބޭނުންވާ މުވައްޒަފުންނަށް އެ ފުރުސަތު ފަހި ކޮށްދިނުމާއި އެ ފަރާތްތަކަށް ދެވޭނެ ތަމުރީނުތަކާ ބެހޭ ގޮތުން ވަނީ މަޝްވަރާކުރައްވާފައެވެ. މީގެ އިތުރުން ދިވެހި ތަރިކަ ދިރާސާކުރާ ޤައުމީ މަރުކަޒުން ރިސާޗްކުރާ ފަރާތްތަކަށް ދޭނެ ތަމުރީނުތަކާ ގުޅޭ ގޮތުންވެސް ވަނީ ވާހަކަ ދައްކަވާފައެވެ.

މި ވުޒާރާއިން 30 ނޮވެންބަރު 2024ގައި ބޭއްވި ކަޅުއޮށްފުންމި ސިންތާއަށް އަލިއަޅުވާލައްވަމުން ވަޒީރު ވިދާޅުވީ ކޮންމެ ނަކަތަކަށް ސިންތާ ބޭއްވުމަށް ހަމަޖެހިފައިވާކަމަށާއި ސިންތާތައް މުއްސަނދިކުރުމުގެ ގޮތުން އެކަންކަމުގައި ހަރަކާތްތެރިވާ މުވައްޒަފުންނާއި ފަންނީ ޤާބިލުކަން ހުރި ފަރާތްތަކަށް ތަމުރީން ޕްރޮގްރާމުތައް ހިންގުމަށް ބޭނުންވާކަމަށެވެ. އަދި އެކަމުގައި ދިވެހިރާއްޖޭގެ އިސްލާމީ ޔުނިވަރސިޓީގެ ޢިލްމީ ބޭފުޅުންގެ އެހީތެރިކަން ބޭނުންވާކަން ވަނީ ފާހަގަކުރަށްވާފައެވެ.

އެންމެ ފަހުން މި ވުޒާރާއިން ސިންތާއެއް ބާއްވާފައިވަނީ 6 މާރިޗު 2025ގައެވެ.