ހުވަދުއަތޮޅުގެ ބައެއް ރަށްތައް ދިއްލުމުގެ މަސައްކަތްފެށިއްޖެ

ހުވަދުއަތޮޅު އުތުރުބުރިއާއި، އެ އަތޮޅުދެކުނުބުރީގެ ބައެއް ރަށްތައް ދިއްލުމަށް ކުރަންޖެހޭ މަސައްކަތް ފެށިގެން ކުރިއަށްދާ ކަމަށް އެ ކުލަސްޓަރއިން މަޢުލޫމާތު ދެއްވައިފިއެވެ.

ކުލަސްޓަރ ހިންގެވުމާއި ޙަވާލުވެހުންނެވި އެގްޒެކެޓިވް އަދި ސްޓޭޓް މިނިސްޓަރ ޠާޙާ ނަޢީމް ވިދާޅުވި ގޮތުގައި އެ ކުލަސްޓަރގައި ހިމެނޭ ތިނަދޫ ސިޓީގައި ލައިޓްތައް ހަރުކުރުމުގެ މަސައްކަތް ފެށިގެން ވަރަށް ބާރަށް އަދި އެހައިމެ ފޯރީގައި ކުރިއަށް އެބަ ދެއެވެ. އަދި ގއ. އަތޮޅު ބެލެހެއްޓެވުމާއި ޙަވާލުހުންނެވި ސީނިއަރ ޕޮލިޓިކަލް ޑިރެކްޓަރ ޠަޤިއްޔު އިބްރާހީމް ވިދާޅުވި ގޮތުގައި ވިލިނގިލި ދިއްލުމުގެ މަސައްކަތް ވެސް ފެށިގެން ކުރިއަށް ވަރަށް ފޯރީގައި އެބަ ދެއެވެ.

މި އަހަރު އަލަށް ދިއްލަން ހަމަޖެހުނު ގއ. ދާންދޫއާއި، ގއ. ގެމަނަފުށްޓާއި، ގދ. ގައްދޫއާއި އަދި ގދ. މަޑަވެއްޔަށް ލައިޓްތައް ފޮނުވުމުގެ މަސައްކަތް އިއްޔެ ވަނީ ފެށިފައެވެ. އުންމީދުކުރެވެނީ ލަސްވެގެން މިއަދުގެ ވަގުތެއްގައި އެ ރަށްތަކަށް ވެސް ލައިޓްތައް ލިބޭނެ ކަމަށެވެ.

އަތޮޅުތެރޭގެ ރަށްރަށާއި، ސިޓީތައް ޢީދަށް ދިއްލުމުގެ މަސައްކަތް ކުރިއަށް ދަނީ ކައުންސިލާއި، ފެނަކަ އަދި ސްޓެލްކޯގެ މުވައްޒަފުންގެ ވަރަށް ބޮޑު އެހީތެރިކަމާއެކުގައެވެ. ޢީދަށް ދިއްލުމަކީ ކުޑަކުދިންނަށާއި، ޒުވާނުންނަށް އަދި ޢުމުރުން ދުވަސްވީ މީހުންނަށް ވެސް ވަރަށް ބޮޑު ހިތްހަމަޖެހުމެއް ލިބިގެންދާ ކަމެކެވެ.

ޢީދު ދިއްލުން އަތޮޅުތެރޭގައި ފެށިފައި ވަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޒަޢާމަތުގައި މި ދިޔަ އަހަރެވެ. އެ ގޮތުން މި އަހަރު ޖުމްލަ 64 ރަށެއް ޢީދު އަލިން ދިއްލައިލެވޭނެ ކަމަށް މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސްގެ ޢީދު ދިއްލުމުގެ ކޮމިޓީން މަޢުލޫތު ދެއްވިއެވެ.