އިޖްތިމާއީ އަދި އާއިލީ ތަރައްޤީއާ ބެހޭ ވުޒާރާގެ ޑްރާމާ ' އާއިލާ' ބުރާސްފަތި ދުވަހުގެ ރޭ ދައްކަނީ!

އޮފީސްތަކުގެ ޓެލެޑްރާމާ މުބާރާތުގައި އިޖްތިމާއީ އަދި އާއިލީ ތަރައްޤީއާ ބެހޭ ވުޒާރާއިން ތައްޔާރުކުރާ ޑްރާމާ 'އާއިލާ' 2025 މާރިޗު 20 ވާ ބުރާސްފަތި ދުވަހުގެ ރޭ 22:00 ގައި އައިސް ޓީވީއިން ދެއްކުމަށް ވަނީ ހަމަޖެހިފައެވެ.

މި ޑްރާމާގެ މައިގަނޑު މަޤްސަދަކީ، ދައުލަތުގެ ބެލުމުގެ ދަށުގައި ތިބޭ ކުދިންނަށް އާއިލީ ވެއްޓެއް ހޯދައިދިނުމަށް މިނިސްޓްރީން ކުރިއަށް ގެންދާ 'ކޮންމެ ކުއްޖަކަށް އާއިލާއެއް' ޕްރޮގްރާމާއި ގުޅޭގޮތުން އާންމުންގެ މެދުގައި ހޭލުންތެރިކަން އިތުރުކުރުމާއެކު، ދައުލަތުގެ ބެލުމުގެ ދަށުގައި ތިބޭ ކުދިންނާމެދު މުޖުތަމައުގެ ދެކޭގޮތް ބަދަލުކުރުމާއި، އެކުދިންނަކީ މުޖުތަމައު ބަލައިގަންނަ ގަދަރުވެރި ކުދިންނަށް ހެދުމުގައި މުޖުތަމައުގެ އެއްބާރުލުން ހޯދުމަށާއި، އެ ތަސައްވުރު ބިނާކުރުމަށް މި ޑްރާމާ މެދުވެރިކޮށް ތަފާތު މެސެޖުތައް ރައްދުކޮށްދިނުމެވެ.

އާއިލީ ވެއްޓަށް ކުދިންނަށް މުހިންމުވާ ސަބަބުތަކާއި އާއިލީ ގުޅުންތަކުގެ އެކި ރަހަތައް މި ޑްރާމާގައި އެކުލެވިގެންދާނެއެވެ.

މިއީ އޮފީސްތަކުގެ ޓެލެޑްރާމާ މުބާރާތުގައި މިނިސްޓްރީން ހުށަހަޅައިދޭ ފުރަތަމަ ޑްރާމާއެވެ. އަދި މި ޑްރާމާގެ ޒަރިއްޔާއިން ކޮންމެ ކުއްޖަކަށް އާއިލީ ވެއްޓެއްގެ ލޯތްބާއި ހިމާޔަތާއި ރައްކާތެރިކަން ހޯދުމަށް ކުރެވޭ މަސައްކަތްތަކުގެ މުހިންމުކަން އާންމުންނަށް ވަޒަންކުރެވި، މި މަސައްކަތުގައި މިހާރަށް ވުރެ ބޮޑަށް މުޖުތަމައުގެ އެއްބާރުލުން ލިބުމަށް މަގުފަހިވެގެން ދިއުމަކީ ވުޒާރާއިން ކުރާ ވަރަށް ބޮޑު އުންމީދެކެވެ.