މިނިސްޓަރ އޮފް ފޮރިން އެފެއާޒް ޑރ. އަބްދުﷲ ޚަލީލް ދެ ދުވަހުގެ ރަސްމީ ދަތުރުފުޅެއްގައި އިންޑިއާ އަށް ފުރާވަޑައިގެންފި

މިނިސްޓަރ އޮފް ފޮރިން އެފެއާޒް ޑރ. އަބްދުﷲ ޚަލީލް ދެ ދުވަހުގެ ރަސްމީ ދަތުރުފުޅެއްގައި އިންޑިއާ އަށް ފުރާވަޑައިގެންފިއެވެ.

މިނިސްޓަރ ޑރ. ޚަލީލް ގެ މި ދަތުރުފުޅަކީ މި ހިނގާ މާރޗް މަހުގެ 17 އިން 19 އަށް އިންޑިއާގެ ނިއުދިއްލީގައި ކުރިއަށްދާ 10 ވަނަ ރައިޒީނާ ޑައިލޮގްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.

މި އަހަރުގެ މި ޑައިލޮގްގެ ތެރެއިން "ކްލައިމެޓް ކެޓެކްލިސަމް: އެޑެޕްޓޭޝަން އެޖެންޑާ އިސް ގެސްޕިންގ"ގެ ޕެނަލް ޑިސްކަޝަންގައި މިނިސްޓަރ ޑރ. ޚަލީލް ބައިވެރިވެވަޑައިގަންނަވާނެއެވެ.

ރައިޒީނާ ޑައިލޮގްއަކީ އިންޑިއާގެ އޮބްޒަރވަރ ރިސަރޗް ފައުންޑޭޝަން އާއި މިނިސްޓްރީ އޮފް އެކްސްޓަރނަލް އެފެއާޒް ގުޅިގެން ކޮންމެ އަހަރަކު ބާއްވާ އެކި ޤައުމުތަކުގެ އިސްވެރިން ބައިވެރިވެ ވަޑައިގަންނަވާ ބޮޑު މަހާސިންތާ އެކެވެ.

މި ދަތުރުފުޅުގައި، އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑރ. އެސް ޖައިޝަންކަރުގެ އިތުރުން ރައިޒީނާ ޑައިލޮގް އަށް ވަޑައިގަންނަވާ އެހެނިހެން ޤައުމުތަކުގެ ޚާރިޖީ ވަޒީރުންނާއި، އިސްވެރިންނާ މިނިސްޓަރ ބައްދަލުކުރެއްވުމަށް ވަނީ ހަމަޖެހިފައެވެ.

މިނިސްޓަރ ޑރ. ޚަލީލު ގެ މި ދަތުރުފުޅުގައި، ފޮރިން މިނިސްޓްރީގެ ޑިރެކްޓަރ އަލްފާޟިލް އަޙްމަދު ސުޒިލް އަދި ޑިރެކްޓަރ އަލްފާޟިލާ އާއިޝަތު ޝަހުލާ ބައިވެރިވެވަޑައިގަންނަވައެވެ.