ރެހެންދި އެވޯޑަށް ހުށަހެޅޭ ކެޓަގަރީތައް

ރެހެންދި އެވޯޑަށް ހުށަހެޅޭ ކެޓަގަރީތަކުގެ ތެރޭގައި ހިމެނެނީ، ވަކި ވަކި އަންހެނުންނަށާއި ޖަމުޢިއްޔާ ޖަމާޢަތްތަކަށް އެވޯޑަށް ހުށަހެޅޭ ކެޓަގަރީއާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުން އެވޯޑަށް ހުށަހެޅޭ ކެޓަގަރީއެވެ.

މިގޮތުން ވަކި ވަކި އަންހެނުންނަށާއި ޖަމުޢިއްޔާ ޖަމާޢަތްތަކަށް އެވޯޑަށް ހުށަހެޅޭ ކެޓަގަރީގައި ހިމެނޭ ދާއިރާތަކަކީ، ލީޑަރޝިޕް އަދި ގަވަރނަންސްއާއި، އިޤްތިޞާދީގޮތުން ބާރުވެރިކުރުވުމާއި، އިޖު ތިމާޢީގޮތުން ބާރުވެރިކުރުވުމާއި، އަންހެނުން ޢާންމުކޮށް ކޮށްނޫޅޭ މަސައްކަތްތައް ނުވަތަ ނޮން - ޓްރެޑިޝަނަލް ރޯލްސްގެ ދާއިރާއެވެ.

މިގޮތުން އަންހެނުން ޢާންމުކޮށް ކޮށްނޫޅޭ މަސައްކަތްތައް ނުވަތަ "ނޮން-ޓްރެޑިޝަނަލް ރޯލްސް"ގެ ދާއިރާގައި ބެލޭނީ މިހާތަނަށް އާދަވެގެން އަންހެނުން ކޮށްނޫޅޭ މަސައްކަތްތަކަށާއި މުޖުތަމަޢުގެ ތެރޭގައި އެ މަސައްކަތްތަކަކީ ހަމައެކަނި ފިރިހެނުންނަށް ޚާއްސަ މަސައްކަތްތަކެއް ކަމަށް ދެކެވިގެން އަންހެނުންގެ ހިއްސާ، އެ މަސައްކަތްތަކުގައި މަދު މަސައްކަތްތަކަށާއި ވަރަށް މަދުން ނޫނީ އެ މަސައްކަތްތަކުގައި އަންހެނުންގެ ބައިވެރިވުން ނުފެންނަ މަސައްކަތްތަކަށެވެ.

މި 4 ދާއިރާއަށް ހުށަހަޅާ އަންހެނުންނަށާއި ޖަމުޢިއްޔާ ޖަމާޢަތްތަކަށް ރެހެންދި އެވޯޑު ދިނުމުގައި ރިޢާޔަތްކުރެވޭނީ ދާއިރާ ކުރިއެރުވުމަށްޓަކައި ކޮށްފައިވާ މަސައްކަތްތަކާއި މަސައްކަތުގައި ހޭދަކޮށްފައިވާ މުއްދަތާއި މި ދާއިރާގައި ކޮށްފައިވާ މަސައްކަތުން ރަށުގެ، އަތޮޅުގެ، ސިޓީގެ ނުވަތަ ޤައުމުގެ ޙާލަތަށް އައިސްފައިވާ ހެޔޮ ބަދަލަށާއި، މި ދާއިރާގައި ހޯދާފައިވާ ކާމިޔާބީތަކަށެވެ. އަދި މި ދާއިރާއަށް މީހުން (ޚާއްޞަކޮށް އަންހެނުންނާއި އަންހެން ކުދިން) ނެރެދިނުމަށާއި ހިތްވަރުދިނުމަށް ކޮށްފައިވާ މަސައްކަތްތަކާއ މި ދާއިރާގައާއި އެހެނިހެން ގޮތްގޮތުންވެސް އަންހެނުންނާ މެދު ކުރެވޭ ނޭދެވޭ ތަފާތުކުރުންތައް ނައްތާލުމަށް ކޮށްފައިވާ މަސައްކަތްތަކުގެ އިތުރުން ޚިދުމަތުގައި ހިލޭސާބަހަށް މަސައްކަތްކޮށްފައިވާ މިންވަރަށެވެ.

ރެހެންދި އެވޯޑަށް އެދި ހުށަހަޅާނީ ފޯމު ފުރިހަމަކުރުމަށްފަހު، އެޕްލިކޭޝަނަށް ބޭނުންވާ އެންމެހައި ލިޔެކިޔުންތަކާއެކު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް އީމެއިލް މެދުވެރިކޮށެވެ. އަދި ބަންދުނޫން ކޮންމެ ދުވަހެއްގެ ހެނދުނު 09:00 އިން މެންދުރުފަހު 2:00 އަށް އުމަރު ޒާހިރު އޮފީސް އިމާރާތް،( އޯކިޑުމާ ހިނގުން، ހުޅުމާލެ) ގެ ކައުންޓަރުންވެސް ފޯމު ބަލައިގަންނާނެއެވެ.

އެވޯޑަށް ނަން ހުށަހެޅުމުގެ ސުންގަޑިއަކީ 04 މެއި 2025 ވާ އާދިއްތަ ދުވަހުގެ މެންދުރުފަހު 2:00 މިނެޓެވެ. އެވޯޑަށް އެދި ހުށަހަޅާ ކޮންމެ ލިޔުމަކީ އެވޯޑަށް އެދި ހުށަހަޅާ ދާއިރާއިން ކޮށްފައިވާ މަސައްކަތްތަކާއި ހާސިލުކޮށްފައިވާ ނަތީޖާތައް ދައްކުވައިދޭ ލިޔުންތަކެއްކަން ކަށަވަރުކުރުން އެދެމެވެ. އަދި މިކަންކަމާ ގުޅުން ނެތް ލިޔުންތައް ހުށަނޭޅުމަށް އެދެމެވެ.