ދިވެހި ޤައުމިއްޔަތު ދިރުވައި އާލާކުރުމާއި ބެހޭ ދުވަސް ފާހަގަ ކުރުމަށް ޚާއްސަ ޕެނަލް ޑިސްކަޝަނެއް!
ކޮންމެ އަހަރެއްގެވެސް މާރިޗު މަހުގެ 6 ވަނަ ދުވަހު ފާހަގަ ކުރާ ދިވެހި ޤައުމިއްޔަތު ދިރުވައި އާލާކުރުމާއި ބެހޭ ދުވަސް ފާހަގަ ކުރުމުގެ ގޮތުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ޚާއްޞަ ޕެނަލް ޑިސްކަޝަނެއް ބާއްވައިފިއެވެ.
ދިވެހި ޤައުމިއްޔަތުގެ މަދަކީ އިސްލާމްދީން" މި މައުޟޫޢަށް ކުރިއަށް ގެންދިޔަ މި ޕެނަލް ޑިސްކަޝަނަކީ މި މިނިސްޓްރީން އިސްލާމީ ކަންތައްތަކާ ބެހޭ ވުޒާރާއާ ގުޅިގެން ބާއްވާފައިވާ ޕެނަލް ޑިސްކަޝަނެކެވެ. މި ވުޒާރާގެ ވަޒީރުގެ ނައިބު ޢާއިޝަތު ޝިމްލާ މޮޑަރޭޓް ކޮށްދެއްވި މި ޕެނަލް ޑިސްކަޝަންގައި ބައިވެރިވެވަޑައިގަތީ އިސްލާމީ ކަންތައްތަކާ ބެހޭ ވުޒާރާގެ ވަޒީރުގެ ނައިބު ޙައްވާ ލަޠީފު، އެވުޒާރާގެ ވާއިޒު އަޙްމަދު ފަހުމީ ދީދީ އަދި ދިވެހިބަހާއި ސަގާފަތާއި ތަރިކައާބެހޭ ވުޒާރާގެ ކޮންސަލްޓަންޓް ހިސްޓޯރިއަން އަޙްމަދު ޢަލާއެވެ.
މި ޕެނަލްގައި މި ތިން ބޭފުޅުންވެސް ވަނީ ދިވެހި ޤައުމިއްޔަތަކީ ކޮބާ ކަމާއި، ޤައުމިއްޔަތު ދިރުވާ އާލާ ކުރުމުގެ މުހިންމުކަމާ ގުޅިގެން ވާހަކަ ދައްކަވާފައެވެ. މި ކަމާ ގުޅިގެން ޙައްވާ ލަޠީފު ވިދާޅުވީ ޤައުމެއް ޤައުމެއްގެ ގޮތުގައި ދިރިއޮންނާނީ އެ ޤައުމެއްގެ ޤައުމިއްޔަތެއް އާލާކޮށް، ޤައުމިއްޔަތުގެ ހުރިހާ ރުކުނެއް ބެލެހެއްޓިގެންކަމަށެވެ. އަދި ޤައުމިއްޔަތުގެ އެންމެ ރުކުނެއް ފުރިހަމަ ނުވިނަމަވެސް މި ޤައުމު މިނިވަންކަންމަތީ ނޯންނާނެ ކަމަށް ވިދާޅުވިއެވެ.
މިކަމާ ގުޅިގެން ފަހުމީ ވިދާޅުވީ ޤައުމެއްގައި ޤައުމިއްޔަތުގެ ސިފަ އޮންނަން ޖެހޭކަމަށެވެ. އަދި ޤައުމިއްޔަތާ ދެކޮޅަށް އަންނަ ހުރަސްތަކަށް ފަރުވާވެ، އެފަދަ ހުރަސްތައް ނައްތާލުމަކީ ޤައުމާއި ޤައުމެއްގެ ޤައުމިއްޔަތު ކުރިއެރުވުމަށް މުހިއްމުކަމެއް ކަމަށް ވިދާޅުވިއެވެ.
މި މަޢުލޫއަށް ވާހަކަ ދައްކަވަމުން ޢަލާ ވިދާޅުވީ އަދުގެ ދުނިޔެއަށް ބަލައިލުމުން ޤައުމިއްޔަތުގެ މުހިއްމުކަން ފެންނަ ކަމަށެވެ. އަދި ޤައުމެއްގެ ހިތަށް ތަސައްލީ ދެނީ ޤައުމިއްޔަތު ކަމަށާއި، ޤައުމެއްގެ ކުރިއެރުމަށް ޤައުމިއްޔަތު ދިރުވައި އާލާކުރުމަކީ މުހިއްމު ކަމެއް ކަމަށް ޢަލާ ފާޙަގަކުރެއްވިއެވެ.
މީގެ އިތުރުން ރާއްޖެ އިސްލާމްވުމާއި، އިސްލާމްދީނާއި ޤައުމިއްޔަތާއި ގުޅިފައިވާ މިންވަރަށް މިތިންބޭފުޅުންވެސް އަލިއަޅުއްވާލާ ވާހަކަ ދައްކަވާފައިވެއެވެ.