ދިވެހި ޤައުމިއްޔަތު ދިރުވައި އާލާކުރާ ދުވަސް ފާހަގަ ކުރުމަށް ސައިކަލުބުރެއް ބާއްވައިފި

ދިވެހި ޤައުމިއްޔަތު ދިރުވައި އާލާކުރާ ދުވަސް ފާހަގަ ކުރުމުގެ ގޮތުން މިއަދު "އެކުވެރިކަމުގެ ފިނިބުރު 2025" ގެ ނަމުގައި ސައިކަލުބުރެއް ބާއްވައިފިއެވެ. ވަޒީރު އާދަމް ނަޞީރު އިބްރާހީމްގެ އިސްނެންގެވުމުގެ ދަށުން ކުރިއަށް ގެންދިޔަ މި ފިނިބުރުގައި މި ވުޒާރާގެ މުވައްޒަފުންގެ އިތުރުން ސަރުކާރުގެ އެކި ވުޒާރާތަކުގައި މަސައްކަތް ކުރާ ފަރާތްތަކުން ބައިވެރިވެވަޑައިގެންނެވިއެވެ. އަދި ކުޅިވަރާއި ހަށިހެޔޮކަމާއި ބެހޭ ވުޒާރާގެ ވަޒީރު ޢަބްދުﷲ ރާފިޢު މި ސައިކަލު ބުރުގައި ބައިވެރިވެވަޑައިގެންނެވިއެވެ. މިއަދު ހަވީރު 16:30ގައި ހެދިގޮނޑުދޮށް ސަރަހައްދުން ފެށި މި ފިނިބުރު ނިންމާލާފައިވަނީ ރަސްފަންނު ސަރަޙަށްދަށެވެ. އަދި މި ހަރަކާތް ނިންމާލާފައިވަނީ ސައިކަލު ބުރުގައި ބައިވެރިވި ހުރިހާ އެންމެން އެކުގައި ރަސްފަންނުގައި ފޮޓޯ ނެގުމަށްފަހުއެވެ. ޤައުމިއްޔަތު ދިރުވައި އާލާކުރުމުގެ މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ޚާއްސަ އިސްކަމެއް ދެއްވާ މަސައްކަތެކެވެ. އެގޮތުން މިހާރުވެސް މިދާއިރާއިން މުހިއްމު 4 މަޝްރޫޢެއްގެ މަސައްކަތް އަންނަނީ ކުރަމުންނެވެ. މިގޮތުން ދިވެހި ޤައުމިއްޔަތު އިޢާދަކުމުގެ މަޝްރޫޢުގެ ނަމުގައި ރައީސުލްޖުމްހޫރިއްޔާ ޑރ. މުޙައްދު މުޢިއްޒު ވަނީ ޚާއްސަ މަޝްރޫޢެއް ފައްޓަވައި ދެއްވާފައެވެ. 2018 ވަނަ އަހަރުން ފެށިގެން ކޮންމެ އަހަރެއްގެވެސް މާރިޗް މަހުގެ 6 ވަނަ ދުވަސް ފާހަގަ ކުރަމުން އަންނަނީ ދިވެހި ޤައުމިއްޔަތު ދިރުވައި އާލާކުރާ ދުވަހުގެ ގޮތުގައެވެ. މި ދުވަހަކީ ދިވެހީންގެ މެދުގައި ޤައުމީ ރޫހު ދިރުވާ އާލާކޮށް، އިސްލާމް ދީނުގެ ރިވެތި އުސޫލުތަށް ދެމެހެއްޓުމުގެ ގޮތުން ފާހަގަ ކުރާ ދުވަހެކެވެ.