ޑިއުޓީ ދައްވުމާ މިނިވަން ވިޔަފާރީގެ އެއްބަސްވުމާ ގުޅުމެއް ނެތް: ވަޒީރު ސައީދު

އިޤްތިޞާދީ ތަރައްޤީއާއި ވިޔަފާރީގެ ވަޒީރު މުޙައްމަދު ސަޢީދު ވިދާޅުވެފައިވަނީ، އިމްޕޯޓު ޑިއުޓީ ދަށްވުމާއި ދިވެހިރާއްޖެއާއި ޗައިނާއާ ދެމެދު ވެފައިވާ މިނިވަން ވިޔަފާރީގެ އެއްބަސްވުމާ ދެމެދު ގުޅުމެއް ނެތް ކަމަށެވެ. ވަޒީރު މިހެން ވިދާޅުވީ މިނިވަން ވިޔަފާރީގެ އެއްބަސްވުމާ ގުޅޭގޮތުން ޕީއެސްއެމް އަހާ ފޯރަމްގައި އާންމުގެ ސުވާލަކަށް ޖަވާބުދެއްވުމުގެ ގޮތުންނެވެ.

ދިވެހިރާއްޖެއާއި ޗައިނާއާ ދެމެދު ވެފައިވާ މިނިވަން ވިޔަފާރީގެ އެއްބަސްވުމަށް ޢަމަލުކުރަން ފެށިފައިވަނީ މި އަހަރުގެ ޖަނަވަރީ މަހުގައެވެ. މި އެއްބަސްވުމުގެ ދަށުން، ދިވެހިރާއްޖެއިން ޗައިނާއަށް އެކްސްޕޯޓުކުރާ ކަނޑުމަހުގެ ބާވަތްތަކަށް ޑިއުޓީ މަޢާފުވެގެންދާނެއެވެ. އަދި ހަމައެހެންމެ، ކަނޑައެޅިފައިވާ ވަކި ބާވަތްތަކެއްގެ މުދާ ޗައިނާއިން ދިވެހިރާއްޖެއަށް އިމްޕޯޓުކުރާއިރު، އެ މުދަލުން ޑިއުޓީ މަޢާފުވެގެންދާނެއެވެ.

މި އެއްބަސްވުމުގެ މަންފާއާ ގުޅޭގޮތުން ވާހަކަފުޅު ދައްކަވަމުން ވަޒީރު ފާހަގަކުރެއްވި ގޮތުގައި، މިފަދަ އެއްބަސްވުންތައް އެކުލަވާލުމާއި ތަންފީޛުކުރުމުގައި ދިވެހިރާއްޖެ ފަދަ ކުދި ޤައުމުތަކާއި ބޮޑެތި ޤައުމުތަކުގެ މެދުގައި ވިސްނުމުގެ ތަފާތުތަކެއް ހުންނާނެއެވެ. ދިވެހިރާއްޖެއަކީ އިމްޕޯޓަށް ބަރޯސާވާ ޤައުމަކަށްވުމާއެކު، މިފަދަ އެއްބަސްވުންތަކުގެ އެންމެ ބޮޑު މަންފާ ލިބިގެންދާނީ ރައްޔިތުންނަށް ކަމަށްވެސް ވަޒީރު ވިދާޅުވިއެވެ.