ބަރަކާތްތެރި ރަމަޟާންމަހަށް ޚާއްސަކޮށް ތަކެތީގެ އަގުތައް ހިފެހެއްޓުމަށް ސަރުކާރުން މުހިންމު ފިޔަވަޅުތަކެއް އަޅައިފި

1446 ވަނަ އަހަރުގެ ރަމަޟާން މަހަށް ތައްޔާރުވުމުގެ ގޮތުން، އަސާސީ ކާބޯތަކެތީގެ އަގުތައް ދެމެހެއްޓެނިވި ގޮތެއްގައި ހިފެހެއްޓުމަށްޓަކައި ސަރުކާރުން މުހިންމު ފިޔަވަޅުތަކެއް އަޅައިފިއެވެ. މިކަން ހާމަކޮށްދެއްވީ މިއަދު ރައީސް އޮފީހުގައި އިޤްތިޞާދީ ވުޒާރާއިން ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި ވާހަކަދައްކަވަމުން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، މިއަހަރުގެ ރަމަޟާންމަހު 141 ބާވަތެއް އެ ވުޒާރާއިން އަގުތައް ވަރަށް ގާތުން ބަލައި މޮނިޓަރ ކުރަމުންދާކަމަށެވެ. މި ތަކެތީގެ ތެރެއިން 32 ބާވަތެއް ކްރިޓިކަލް އައިޓަމްގެ ގޮތުގައި ފާހަގަކޮށްފައިވާކަމަށް ވަޒީރު ވިދާޅުވިއެވެ.

ރަމަޟާންމަހު ސަރުކާރުން އަގުތައް ގާތުން ބަލާނެ 141 ބާވަތުގެ ތެރޭގައި ގޭބީސީތަކުގައި ކެއުމަށާއި، ކާތަކެތި ތައްޔާރުކުރުމަށް ބޭނުންކުރާ އަސާސީ 93 ބާވަތަކާއި، މޭވާ އަދި ތަރުކާރީގެ 38 ބާވަތެއްގެ އިތުރުން ކަނޑުމަހުގެ 10 ބާވަތެއް ހިމެނެއެވެ.