"އަންލޮކިންގ ޖަސްޓިސް" ގެ ނަމުގައި، ޖިނާޢީ ޢަދުލުގެ ނިޒާމުގެ ކަންކަން ހަރުދަނާކުރުމަށްޓަކައި ބައްދަލުވުމެއް ބާއްވައިފި

ދިވެހިރާއްޖޭގެ ޖިނާޢީ ޢަދުލުގެ ނިޒާމުގައި ހުރި ގޮންޖެހުންތަކާއި، ޖިނާޢީ ޢަދުލުގެ ނިޒާމުގެ މަސައްކަތްތައް އިތުރަށް ހަރުދަނާކުރުމަށްޓަކައި ހުރިހާ ސްޓޭކްހޯލްޑަރުން ގުޅިގެން ކުރެވޭނެ ކަންކަން ދެނެގަތުމަށްޓަކައި، ބަންޑާރަނައިބުގެ އޮފީހާއި އިނގިރޭސި ހައިކޮމިޝަނާ ގުޅިގެން "އަންލޮކިންގ ޖަސްޓިސް" ގެ ނަމުގައި ބައްދަލުވުމެއް ބާއްވައިފިއެވެ.

10 ފެބުރުވަރީ 2025 ގައި ކުރުނބާ މޯލްޑިވްސްގައި ބޭއްވުނު މި ބައްދަލުވުމަކީ، އިނގިރޭސި ހައިކޮމިޝަނުގެ ފަރާތުން ޓެޓްރާ ޓެކް އިންޓަރނޭޝަނަލް ޑިވެލޮޕްމަންޓްއިން، ދިވެހިރާއްޖޭގެ ޖިނާޢީ ޢަދުލުގެ ނިޒާމާ ގުޅޭގޮތުން ކުރިއަށް ގެންގޮސްފައިވާ ދިރާސާގެ ހޯދުންތަކާއި، އެ ހޯދުންތަކުގެ އަލީގައި ކުރިއަށް އެޅޭނެ ފިޔަވަޅުތަކާ ގުޅޭގޮތުން މަޝްވަރާކޮށް، ސްޓޭކްހޯލްޑަރުންގެ މެދުގައި ޚިޔާލު ބަދަލުކުރުމަށްޓަކައި ބޭއްވުނު ބައްދަލުވުމެކެވެ.

މި ބައްދަލުވުމުގައި، ދިވެހިރާއްޖޭގެ އުއްތަމަ ފަނޑިޔާރު އޮނަރަބަލް އަޙްމަދު މުޢުތަޞިމް ޢަދުނާނާއި، ބަންޑާރަނައިބު އަލްއުސްތާޛު އަޙްމަދު އުޝާމްއާއި، ޕްރޮސިކިއުޓަރ ޖެނެރަލް ޖަސްޓިސް (ރިޓަޔަރޑް) އަލްއުސްތާޛު ޢައްބާސް ޝަރީފާއި، ކޮމިޝަނަރ އޮފް ޕްރިޒަންސް ޙަސަން ޒަރީރާއި، ޑެޕިއުޓީ ކޮމިޝަނަރ އޮފް ޕޮލިސް އިސްމާޢިލް ނަވީން ބައިވެރިވެޑަގެންފައިވެއެވެ. މީގެ އިތުރުން، ދިވެހިރާއްޖޭގެ ސުޕްރީމް ކޯޓާއި ދިވެހިރާއްޖޭގެ ހައިކޯޓުގެ ފަނޑިޔާރުންނާއި، ދިވެހިރާއްޖޭގެ ޑިޕްލޮމެޓިކް ކޮމިއުނިޓީގެ ޢިއްޒަތްތެރިންނާއި، ކްރިމިނަލް ކޯޓުގެ ޤާޟީންނާއި، ޕްރޮސިކިއުޓަރ ޖެނެރަލްގެ އޮފީހާއި ބަންޑާރަނައިބުގެ އޮފީހުންގެ ވަކީލުންނާއި، ޖުޑީޝަލް ސަރވިސް ކޮމިޝަނާއި، ހިއުމަން ރައިޓްސް ކޮމިޝަން އޮފް ދަ މޯލްޑިވްސްއާއި، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި، ދިވެހިރާއްޖޭގެ ބާ ކައުންސިލާއި، ދިވެހި ފުލުހުންގެ ޚިދުމަތާއި، މޯލްޑިވްސް ކަރެކްޝަނަލް ސަރވިސްގެ ބޭފުޅުން، އަދި އިނގިރޭސިވިލާތުގެ ފަނޑިޔާރުން މި ބައްދަލުވުމުގައި ބައިވެރިވެވަޑައިގެންފައިވެއެވެ.

މި ބައްދަލުވުމުގައި، ދިވެހިރާއްޖޭގެ އުއްތަމަ ފަނޑިޔާރު އޮނަރަބަލް އަޙްމަދު މުޢުތަޞިމް ޢަދުނާނު ދެއްކެވި ވާހަކަފުޅުގައި، ޖިނާޢީ ޢަދުލުގެ ނިޒާމު ހަރުދަނާކުރުމަށްޓަކައި ދެމެހެއްޓެނިވި، ވަށާޖެހޭ ފިޔަވަޅުތަކެއް އަޅަންޖެހޭކަމަށް ފާހަގަކުރައްވާފައިވެއެވެ.

އިނގިރޭސިވިލާތުގެ ސަރުކާރުން ދިވެހިރާއްޖެއަށް ކަނޑައަޅުއްވާފައިވާ އައު ސަފީރު، ހިޒް އެކްސަލަންސީ ނިކޮލަސް ޑޭވިޑް ލޯ އާއި ބަންޑާރަނައިބު އަލްއުސްތާޛު އަޙްމަދު އުޝާމް ބައްދަލުވުމުގެ ބައިވެރިންނަށް މަރުޙަބާ ދަންނަވައި ވާހަކަފުޅު ދައްކަވާފައިވެއެވެ. އަދި ބަންޑާރަނައިބުގެ ވާހަކަފުޅުގައި، ޖިނާޢީ ޢަދުލުގެ ނިޒާމާގުޅޭ ޤާނޫނީ އޮނިގަނޑު ހަރުދަނާކުރުމަށްޓަކައި މަސައްކަތްތަކެއް ކުރެވެމުންދާ ކަމަށާއި، ޝަރީޢަތްތައް ލަސްވުމާގުޅޭ ކަންކަން ޙައްލުކުރުމަށްޓަކައި ސަރުކާރުން ފިޔަވަޅުތައް އަޅުއްވާނެކަމުގެ ޔަޤީންކަން ދެއްވާފައިވެއެވެ. އަދި، ޖިނާޢީ ޢަދުލުގެ ނިޒާމުގެ ކަންކަން އިތުރަށް ހަލުވިކުރުމަށްޓަކައި، މި ނިޒާމުގައި ހިމެނޭ ހުރިހާ ސްޓޭކްހޯލްޑަރުންގެ މެދުގައި މުޢާމަލާތްކޮށް މަޢުލޫމާތު ބަދަލުކުރުން ހަރުދަނާކުރުމުގެ މުހިންމުކަން ފާހަގަކުރައްވާފައިވެއެވެ.

މި ބައްދަލުވުމުގައި، ޖިނާޢީ ޢަދުލުގެ ނިޒާމާމެދު ސްޓޭކްހޯލްޑަރުންގެ ތަޞައްވުރާއި، ޖުޑީޝަލް ލީޑަރޝިޕްއާއި، މި ނިޒާމާއި ޑިޖިޓައިޒޭޝަނާހުރި ގުޅުމާ ބެހޭގޮތުން މަޝްވަރާކުރުމަށްޓަކައި، ދައުލަތުގެ ކަމާބެހޭ އިސްވެރިން ހިމެނޭހެން ތިން ޕެނަލް ޑިސްކަޝަން ކުރިއަށް ގެންދެވިފައިވެއެވެ.

"އަންލޮކިންގ ޖަސްޓިސް" އިނިޝިއޭޓިވްއަކީ، އިދާރާތަކުގެ ހިންގުން ހަރުދަނާކުރުމާއި، ޖިނާއީ ޢަދުލުގެ ނިޒާމުގެ މަސައްކަތްތަކާބެހޭ އިނގިރޭސިވިލާތުގެ ފަންނީ މާހިރުން ކަމުގައިވާ މިސްޓަރ ޖޯ ހޯމްސްއާއި، މިސްޓަރ ޑޭވިޑް ވެލްސްގެ ބެލުމުގެ ދަށުން ކުރިއަށް ގެންގޮސްފައިވާ މަސައްކަތެކެވެ.