ކޮރަޕްޝަން ހުއްޓުވުމާއި ދައުލަތުގެ މާލިއްޔަތުގެ ނިޒާމާ ގުޅޭގޮތުން އަހްލުވެރިކުރުމުގެ ޕްރޮގްރާމްތަކެއް ހިންގުމަށް މަޝްވަރާކޮށްފި
ސަރުކާރުގެ މިނިސްޓްރީތަކާއި އިދާރާތަކާއި ދައުލަތުގެ ކުންފުނިތަކަށް، ކޮރަޕްޝަން ހުއްޓުވުމާއި ދައުލަތުގެ މާލިއްޔަތުގެ ނިޒާމާ ގުޅޭގޮތުން އަހްލުވެރިކުރުމުގެ ޕްރޮގްރާމްތަކެއް ހިންގުމަށް މަޝްވަރާކޮށްފިއެވެ.
މި މަޝްވަރާތައް ކުރިއަށް ގެންދިޔައީ މިއަދު ބަންޑާރަނައިބުގެ އޮފީހުގައި އެންޓި-ކޮރަޕްޝަން ކޮމިޝަނާއި އޮޑިޓަރ ޖެނެރަލްގެ އޮފީހާއެކު ބޭއްވި ބައްދަލުވުމެއްގައެވެ.
އޭގެ އިތުރުން މި ބައްދަލުވުމުގައި، ކޮރަޕްޝަންގެ އެކިއެކި ކުށްތަކުގެ ސަބަބުން ދައުލަތަށް ލިބެންޖެހޭ ފައިސާ ހޯދުމުގެ މަސައްކަތްތައް އަވަސް މިނެއްގައި ކުރިއަށްގެންދިއުމަށް ކުރެވޭ މަސައްކަތްތައް އިތުރަށް ހަރުދަނާކުރުމާ ގުަޅޭގޮތުންވެސް މަޝްވަރާކުރެވުނެވެ.
މިއަދުގެ ބައްދަލުވުމުގައި، ބަންޑާރަނައިބު އަލްއުސްތާޛް އަޙްމަދު އުޝާމް އަދި ސީނިއާ ސްޓޭޓް ކައުންސެލް ފައެނާ ފައްޔާޟް، އޭސީސީގެ ފަރާތުން ރައީސް ޝާމިލް އާދަމް އަދި މެންބަރު ޢަބްދުﷲ ނާޝިދު، އަދި އޮޑިޓަރ ޖެނެރަލްގެ އޮފީހުގެ ފަރާތުން އެސިސްޓެންޓް އޮޑިޓަރ ޖެނެރަލް އިބްރާހީމް އައިމަން އަދި އެ އޮފީހުގެ ބައެއް އިސްވެރިން ބައިވެރިވެވަޑައިގެންނެވިއެވެ.