ގްރީންހައުސް ގޭސް އިންވެންޓްރީ އެކުލަވާލުމާއި ރިޕޯޓުކުރުމާ ގުޅޭ މަސައްކަތު ބައްދަލުވުމެއް ބޭއްވިއްޖެ

މިނިސްޓްރީ އޮފް ކްލައިމެޓް ޗޭންޖް އެންވަޔަރަންމަންޓް، އެންޑް އެނާރޖީން މިދިޔަ ތިން ދުވަހު ބޭއްވި ގްރީންހައުސް ގޭސް (ޖީ.އެޗް.ޖީ) އިންވެންޓްރީ އެކުލަވާލުމާއި ރިޕޯޓުކުރުމާ ގުޅޭ މަސައްކަތު ބައްދަލުވުން ކާމިޔާބުކަމާއެކު ނިންމާލައިފިއެވެ.

މި މަސައްކަތު ބައްދަލުވުން ކުރިޔަށް ގެންގޮސްފައިވަނީ 22 އިން 24 ޖެނުއަރީއަށް، ޖީ.އެޗް.ޖީ އިންވެންޓްރީ ދާއިރާގެ މާހިރު ޒަމްމަތު ޚަލީލުގެ އިރުޝާދުގެ ދަށުންނެވެ. މި ބައްދަލުވުމަކީ ގްލޯބަލް އެންވަޔަރަންމަންޓް ފެސިލިޓީ (ޖީ.އީ.އެފް) ގެ ފަންޑިންގ އާއި ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް (ޔޫ.އެން.އީ.ޕީ) ގެ އެހީތެރިކަމާއެކު ހިންގާ "ކެޕޭސިޓީ ސްޓްރެންތެނިންގ ފޯ އިމްޕްރޫވްޑް ޓްރާންސްޕޭރެންސީ އޮފް ކްލައިމެޓް ޗޭންޖް މިޓިގޭޝަން އެންޑް އެޑަޕްޓޭޝަން އެކްޝަންސް އިން ދަ މޯލްޑިވްސް (ސީ.ބީ.އައި.ޓީ މޯލްޑިވްސް)" މަޝްރޫޢުގެ ދަށުން ބޭއްވުނު ބައްދަލުވުމެކެވެ.

މި ބައްދަލުވުމުގައި މިނިސްޓްރީގެ ކްލައިމެޓް ޗޭންޖް ޑިޕާޓްމަންޓާއި ރައީސް އޮފީހުގެ ޖުމްލަ 14 (7 ފިރިހެން، 7 އަންހެން) މުވައްޒަފުން ބައިވެރިވެފައިވެއެވެ. މި ބައްދަލުވުމުގެ މަޤްޞަދަކީ ޖީ.އެޗް.ޖީ އިންވެންޓްރީ އެކުލަވާލުމާއި ރިޕޯޓުކުރުމުގެ ޓެކްނިކަލް ޤާބިލުކަން އިތުރުކުރުމެވެ.

މި ތަމްރީނު ޕްރޮގްރާމަކީ ސީ.ބީ.އައި.ޓީ މޯލްޑިވްސް މަޝްރޫޢުގެ ދަށުން ހާސިލުކުރަން ކަނޑައަޅާފައިވާ ލަނޑުދަނޑިތަކަށް ސީދާ ގޮތެއްގައި ހިއްސާކުރާ ކަމެކެވެ. މީގެ ތެރޭގައި ޖީ.އެޗް.ޖީ އިންވެންޓްރީ އެކުލަވާލުމާއި ރިޕޯޓުކުރުމާ ގުޅޭ ހަތަރު ވަރކްޝޮޕުގެ ތެރެއިން ދެ ވަރކްޝޮޕް އަދި ކިއު.އޭ/ކިއު.ސީ އާ ގުޅޭ ތިން ވަރކްޝޮޕުގެ ތެރެއިން އެއް ވަރކްޝޮޕް ހިމެނެއެވެ.

މި ލަނޑުދަނޑިތައް ފުރިހަމަ ކުރުމަށްޓަކައި، އިތުރު މަސައްކަތު ބައްދަލުވުމެއް 2025 ވަނަ އަހަރުގެ ފެބްރުއަރީ މަހު ބޭއްވުމަށް ވަނީ ރޭވިފައެވެ. މި ބައްދަލުވުމުގައި އެނަރޖީ ސެކްޓަރ އަދި ނޮން-އެނަރޖީ ސެކްޓަރގެ ސްޓޭކްހޯލްޑަރުންނަށް އަމާޒުކޮށް، ޖީ.އެޗް.ޖީ އިންވެންޓްރީ އެކުލަވާލުމާއި ކިއު.އޭ/ކިއު.ސީ އާ ގުޅޭ މަޢުލޫމާތު ފޯރުކޮށްދެވޭނެއެވެ.

މި ތަމްރީނު ޕްރޮގްރާމްތަކުގެ ސަބަބުން ދިވެހިރާއްޖޭގެ ޖީ.އެޗް.ޖީ އިންވެންޓްރީ ބެލެހެއްޓުމާއި ރިޕޯޓުކުރުމުގެ އިދާރީ އަދި ޓެކްނިކަލް ޤާބިލުކަން އިތުރުވެގެންދާނެއެވެ. މިއީ ޕެރިސް އެއްބަސްވުމުގެ ދަށުން ދިވެހިރާއްޖެއިން ފުރިހަމަކުރަންޖެހޭ ހާމަކަމުގެ ޝަރުޠުތައް ފުރިހަމަކުރުމަށާއި، ޤައުމީ ފެންވަރުގައި މޫސުމަށް އަންނަ ބަދަލުތަކާ ގުޅޭ ލަނޑުދަނޑިތައް ހާސިލުކުރުމަށް އެޅޭ މުހިންމު ފިޔަވަޅެކެވެ.

މި މަސައްކަތު ބައްދަލުވުމުގައި ބައިވެރިވި އެއް ފަރާތުން ބުނި ގޮތުގައި، "މި ތަމްރީނު ޕްރޮގްރާމްގެ ސަބަބުން ޖީ.އެޗް.ޖީ އިންވެންޓްރީ އެކުލަވާލުމާއި ރިޕޯޓުކުރުމުގެ ޢަމަލީ ތަޖުރިބާ ލިބި، އަޅުގަނޑުމެންގެ މަސައްކަތުގެ ފެންވަރު މަތިވެގެންދާނެކަމާމެދު ޝައްކެއް ނެތެވެ. މިއީ ދިވެހިރާއްޖޭގެ މޫސުމަށް އަންނަ ބަދަލުތަކާ ގުޅޭ މަސައްކަތްތަކަށް ލިބޭ ވަރަށް ބޮޑު ކުރިއެރުމެކެވެ."

މިނިސްޓްރީން ފާހަގަކުރި ގޮތުގައި، މި ފަދަ ތަމްރީނު ޕްރޮގްރާމްތައް ކުރިއަށް އޮތް ތަނުގައިވެސް ބޭއްވުމަށް ވަނީ ރޭވިފައެވެ. މިއީ ދިވެހިރާއްޖޭގެ މޫސުމަށް އަންނަ ބަދަލުތަކާ ގުޅޭ މަސައްކަތްތައް ހަރުދަނާކޮށް، ބައިނަލްއަޤްވާމީ މިންގަނޑުތަކާ އެއްގޮތަށް ކުރިއަށް ގެންދިއުމަށް އެޅޭ މުހިންމު ފިޔަވަޅެކެވެ.