އެންވަޔަރަންމަންޓަލް ޕްރޮޓެކްޝަން އޭޖެންސީން ތެޔޮ ލީކުވުމުގެ ކުއްލި ހާލަތުގައި އަމަލުކުރާނެ ގޮތުގެ ތަމްރީނެއް ބާއްވައިފި

އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)، މޯލްޑިވްސް ކޯސްޓް ގާޑް އަދި އޯސީޕީޕީގެ އެހީތެރިކަމާއެކު 2025 ވަނަ އަހަރުގެ ޖެނުއަރީ 5 އިން 16 އަށް ތެޔޮ ލީކުވުމުގެ ކުއްލި ހާލަތުގައި އަމަލުކުރާނެ ގޮތުގެ މުހިންމު ތަމްރީނެއް ކުރިއަށް ގެންދަނީއެވެ.

މި ތަމްރީނުގައި މޯލްޑިވްސް ކޯސްޓް ގާޑްގެ އޮފިޝަލުންނާއި، އީޕީއޭގެ މުވައްޒަފުންނާއި، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ މުވައްޒަފުންގެ އިތުރުން ސްރީލަންކާ ކޯސްޓް ގާޑްގެ 10 ބައިވެރިން ބައިވެރިވެ ވަޑައިގަންނަވައެވެ. މި ތަމްރީނުގައި އައިއެމްއޯ ލެވެލް 1 އިން 3 އަށާއި، އައިސީއެސް 100 އިން 300 އަށް، އަދި އެސްސީއޭޓީ މެނޭޖްމަންޓް ޓެކްނިކްސްގެ އިތުރުން ތެޔޮ ލީކުވުމުގެ ހާދިސާތައް ވައިގެ މަތިން ބަލައި، ދެނެގަނެ، އެކަމަށް އަމަލުކުރާނެ ގޮތުގެ ޢަމަލީ ތަޖުރިބާ ހިމެނެއެވެ.

މި ތަމްރީނަކީ ރާއްޖޭގެ ތިމާވެށި ރައްކާތެރިކުރުމަށް ކުރެވޭ ވަރަށް މުހިންމު މަސައްކަތެކެވެ. ޚާއްޞަކޮށް ތެޔޮ ލީކުވުމުގެ ހާދިސާތަކުގައި އަވަހަށް އަދި ހަރުދަނާކޮށް އަމަލުކުރުމަށް މި ތަމްރީނުން އެހީތެރިވެދޭނެއެވެ.

މި ތަމްރީނަކީ ސަރަޙައްދީ ފެންވަރުގައި ތިމާވެށި ރައްކާތެރިކުރުމަށް ކުރެވޭ މަސައްކަތްތައް ހަރުދަނާކޮށް، ގުޅުން ބަދަހިކުރުމަށް އެޅޭ މުހިންމު ފިޔަވަޅެކެވެ. މި ތަމްރީނު ނިމުމުން ބައިވެރިންނަށް ސެޓްފިކެޓް ދެވޭނެ ކަމަށް އީޕީއޭއިން މަޢުލޫމާތު ދެއެވެ.