ފުރަތަމަ ފުޓުސެލް ތަށި އަތޮޅު ވެށި އަދި ކުރިމަގަށް

މި މިނިސްޓްރީގެ ޑިޕާޓްމެންޓްތަކުގެ މެދުގައި ބޭއްވި ފުރަތަމަ ފުޓްސެލް މުބާރާތުގެ ތަށި އަތޮޅު ވެށި އަދި ކުރިމަގުން ހޯދައިފިއެވެ.

ފުރަތަމަ ފުޓްސެލް މުބާރާތުގެ އަންހެން ޑިވިޝަންގެ ތަށި ކުރިމަގުން ހޯދީ ފައިނަލްގައި، ޓީމް އޯކިޑާ ބައްދަލުކޮށް މެޗުގެ ވަގުތު ހަމަވި އިރު ނަތީޖާ ހަމަހަމަވުމުގެ ސަބަބުން ޕެނަލްޓީގައި އޯކިޑުގެ މައްޗަށް ކުރި ހޯދައިގެންނެވެ.

ފިރިހެން ޑިވިޝަންގެ ތަށި އަތޮޅު ވެށި ހޯދީ ފައިނަލްގައި 1 ލަނޑު 0 ލަނޑުން އެކްސެޕްޓްގެ މައްޗަށް ކުރި ހޯދައިގެންނެވެ.

ޗެމްޕިއަން ޓީމަށް ތަށި ހަވާލުކޮށް ދެއްވީ މުބާރާތުގެ ޝަރަފުވެރި މެހްމާން ނިޝާން މުލީ ޢިއްޒަތުގެ ވެރިޔާ މ. މަހުމާވިލާ އަލްފާޟިލް އިބްރާހީމް އިސްމާޢީލެވެ.

މުބާރާތުގެ އެންމެ ގިނަ ލަނޑު ޖަހައިގެން ރަންބޫޓު ޙާޞިލްކުރީ ފިރިހެން ޑިވިޝަނުން ޗެމްޕިއަން އަތޮޅު ވެށީގެ ޖަރޒީ ނަންބަރ 6 އަޙްމަދު ޠާލިބެވެ. އަންހެން ޑިވިޝަނުން ރަނަރއަޕް އޯކިޑްގެ ޖަރޒީ ނަންބަރ 9 ޝަޒުމީނާ ޢަލީއެވެ.

މިއީ މި މިނިސްޓްރީގެ މުވައްޒަފުންގެ މެދުގައި ގުޅުން ބަދަހިކުރުމުގެ މަތިވެރި މަޤްޞަދުގައި ބޭއްވުނު މުބާރާތެކެވެ. މި މުބާރާތުގައި ޖުމްލަ 8 ޓީމެއް ވާދަކުރިއެވެ. އެއީ އަންހެން ޑިވިޝަންގައި 3 ޓީމު އަދި ފިރިހެން ޑިވިޝަންގައި 5 ޓީމެވެ. މުބާރާތް ކުރިޔަށް ދިޔައީ މި މަހުގެ 5 އިން 7 އަށް މާލޭ ސިޓީ ކައުންސިލްގެ ފުޓްސެލް ދަނޑުގައެވެ.