ރެހެންދީ ސްކޫލުގެ ސްކައުޓުންނަށް މޫސުމީ ބަދަލުތަކާއި، ތިމާވެއްޓާ ހަކަތައާބެހޭ ވުޒާރާއިން މަޢުލޫމާތު ދީފި

މޫސުމީ ބަދަލުތަކާއި، ތިމާވެއްޓާ ހަކަތައާބެހޭ ވުޒާރާއިން ރެހެންދީ ސްކޫލުގެ ސްކައުޓުންނަށް އަމާޒުކޮށްގެން ތިމާވެށީގެ ދާއިރާއިން މަޢުލޫމާތު ދިނުމުގެ ޚާއްޞަ ސެޝަނެއް ބާއްވައިފިއެވެ.

މި ސެޝަންގައި ދިވެހިރާއްޖޭގެ ކަނޑުގެ ވެށްޓާއި، އެ ވެށްޓަށް ކުރިމަތިވެފައިވާ ނުރައްކާތަކާއި، ޚާއްޞަކޮށް ކެމިކަލް ތަކުގެ ސަބަބުން ކުރިމަތިވާ މައްސަލަތަކާ ބެހޭގޮތުން މަޢުލޫމާތު ދީފައިވެއެވެ. އަދި މި ކަންކަން ކުޑަކުރުމަށް މިނިސްޓްރީއާއި އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ކުރަމުންދާ މަސައްކަތްތަކާ ބެހޭގޮތުންވެސް މަޢުލޫމާތު ހިއްސާކޮށްފައިވެއެވެ.

މީގެ އިތުރުން، ތިމާވެށީގެ ގޮންޖެހުންތަކަށް ޙައްލު ހޯދުމަށް މައްސަލަ ޙައްލުކުރުމުގެ ހުނަރުތައް ތަރައްޤީކުރުމާއި، ޢަމަލީ ގޮތުން ކުރިމަތިވާ މައްސަލަތަކަށް ޙައްލު ހޯދުމުގެ މުހިންމުކަމާ ބެހޭގޮތުންވެސް މަޢުލޫމާތު ދީފައިވެއެވެ. އަދި ރާއްޖޭގައި ކުނި މެނޭޖްކުރުމުގެ މިހާރުގެ ޙާލަތާއި، ކުރިއަށް އޮތްތަނުގައި މިކަން ރަނގަޅުކުރުމަށް ރޭވިފައިވާ ކަންކަމާ ބެހޭގޮތުންވެސް މަޢުލޫމާތު ދީފައިވެއެވެ.

ސެޝަންގައި ބައިވެރިވި ދަރިވަރުންނަށް ޢަމަލީ ތަޖުރިބާ ލިބޭގޮތަށް ކުނި ވަކިކުރުމާއި، ކުނީގެ އޮޑިޓެއް ހެދުމުގެ ފުރުޞަތު ދީފައިވާކަން މިނިސްޓްރީން ފާހަގަކޮށްފައިވެއެވެ. މި ސެޝަންގެ މަޤްޞަދަކީ ކުރިއަށް އޮތް ޖީލުތަކަށް ކަނޑުގެ ދިރުންތައް ރައްކާތެރިކުރުމާއި، ދެމެހެއްޓެނިވި ގޮތެއްގައި ކުނި މެނޭޖްކުރުމުގެ މުހިންމުކަން އަންގައިދިނުން ކަމަށް މިނިސްޓްރީން ބުނެފައިވެއެވެ.