ޔޫކޭގެ ހައި ކޮމިޝަނަރު މިނިސްޓަރ ޠާރިޤް އިބްރާހީމްއާ ވަދާއީ ޒިޔާރަތެއް ކުރައްވައިފި
ޔުނައިޓެޑް ކިންގްޑަމްގެ ހައި ކޮމިޝަނަރު އެކްސެލެންސީ ކެރޮން ރޯސްލަރ މިއަދު މޫސުމީބަދަލުތަކާ ތިމާވެއްޓާ ހަކަތައާއި ބެހޭ ވުޒާރާއިގެ މިނިސްޓަރ ޠާރިޤް އިބްރާހީމްއާ ބައްދަލުކުރައްވައިފިއެވެ. މިއީ ހައި ކޮމިޝަނަރުގެ ވަދާޢީ ޒިޔާރަތެކެވެ.
މިނިސްޓްރީ އޮފް ކްލައިމެޓް ޗޭންޖް އެންވަޔަރަންމަންޓް، އެންޑް އެނާރޖީގައި ބޭއްވުނު މި ބައްދަލުވުމުގައި، ދިވެހިރާއްޖެއާއި ޔުނައިޓެޑް ކިންގްޑަމްއާ ދެމެދު ތިމާވެށީގެ ދާއިރާއިން އޮންނަ ގުޅުން ކުރިއެރުވުމަށް ހައި ކޮމިޝަނަރު ކުރައްވާފައިވާ މަސައްކަތްޕުޅުތަކަށް މިނިސްޓަރ ޠާރިޤް ޝުކުރު އަދާކުރެއްވިއެވެ.
ހައި ކޮމިޝަނަރުގެ ލީޑަރޝިޕާއި، ދެ ޤައުމުގެ ދެމެދުގައި ތިމާވެށީގެ ދާއިރާއިން އެއްބާރުލުން އިތުރުކުރުމަށް ކުރައްވާފައިވާ މަސައްކަތްޕުޅުތަކަށް މިނިސްޓަރ ޠާރިޤް ޚާއްޞަ ޝުކުރެއް ދެންނެވިއެވެ. އަދި ކުރިއަށް އޮތް ތަނުގައިވެސް ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމުގެ އުންމީދު ފާޅުކުރެއްވިއެވެ.
މި ބައްދަލުވުމުގައި ދެ ޤައުމުގެ ދެމެދުގައި ތިމާވެށީގެ ދާއިރާއިން ކުރިއަށް ގެންދެވިދާނެ އިތުރު މަޝްރޫޢުތަކާ ބެހޭގޮތުން މަޝްވަރާކުރެވުނެވެ. އަދި މޫސުމަށް އަންނަ ބަދަލުތަކާ ގުޅޭގޮތުން ދެ ޤައުމުން ކުރަމުންދާ މަސައްކަތްތަކާ ބެހޭގޮތުންވެސް ވާހަކަދެކެވުނެވެ.