16 ޑޭޒް އޮފް އެކްޓިވިޒަމް

ވަކ ޖިންސަކަށްވީތީ ކުރާ އަނިޔާއާ ދެކޮޅަށް ހޭލުންތެރިކަން އިތުރުކުރުމުގެ ގޮތުން ފާހަގަކުރާ "16 ޑޭސް އޮފް އެކްޓިވިޒަމް އެގެންސްޓް ޖެންޑަރ ބޭސްޑް ވަޔަލެންސް" އަކީ ކޮންމެ އަހަރަކު ވެސް ނޮވެންބަރު މަހުގެ 25ވަނަ ދުވަހުން ފެށިގެން ޑިސެންބަރު މަހުގެ 10ވަނަ ދުވަހުގެ ނިޔަލަށް ކުރިއަށް ގެންދާ ހަރަކާތެކެވެ.

މި މުއްދަތު ތެރޭގައި މި ކެމްޕޭން ކުރިއަށްގެންދެވެނީ، ނޮވެންބަރު މަހުގެ 25ވަނަ ދުވަހަކީ "އިންޓަރނޭޝަނަލް ޑޭ ފޮރ ދަ އެލިމިނޭޝަން އޮފް ވަޔަލެންސް އެގެއިންސްޓް ވިމެން"، ނުވަތަ އަންހެނުންނާ ދެކޮޅަށް ކުރާ އަނިޔާ ހުއްޓުވުމަށް ބައިނަލްއަޤްވާމީ ގޮތުން ފާހަގަކުރާ ދުވަސް ކަމަށް ވެފައި، ޑިސެންބަރު މަހުގެ 10ވަނަ ދުވަހަކީ އިންސާނީ ހައްޤުތަކާ ބެހޭ ދުވަސް ކަމަށް ވާތީއެވެ.

މި އަހަރުގެ 16 ޑޭޒް އޮފް އެކްޓިވިޒަމްގެ ޝިޢާރަކީ، 'ކޮންމެ 10 މިނަޓަކުން 1 އަންހެނަކު މަރާލެވޭ. #އުޒުރެއްނެތް. އަންހެނުންނާއި އަންހެން ކުދިންނަށް ކުރާ އަނިޔާ ހުއްޓުވުމަށް އެއްބައިވަމާ!" އެވެ.

އދ ގެ އޮފިސް އޮން ޑްރަގްސް އެންޑް ކްރައިމްއިން ނެރެފައިވާ "ފެމިސައިޑްސް އިން 2023" ރިޕޯޓުގައިވާ ގޮތުގައި، 2023ވަނަ އަހަރު ގަސްތުގައި މަރާލެވުނު މީހުންގެ ތެރެއިން ގާތްގަނޑަކަށް 80 އިންސައްތައަކީ ފިރިހެނުން އަދި 20 އިންސައްތައަކީ އަންހެނުންނެވެ. ނަމަވެސް، އާއިލާގެ ތެރޭގައި ހިނގާ މަރުގެ ހާދިސާތަކުގައި ފިރިހެނުންނަށްވުރެ އަންހެނުން މާބޮޑަށް ޝިކާރައަކަށްވެއެވެ. 2023ވަނަ އަހަރު ގަސްތުގައި މަރާލެވުނު އަންހެނުންގެ ތެރެއިން ގާތްގަނޑަކަށް 60 އިންސައްތަ އަންހެނުންނަކީ އެމީހުންގެ ބައިވެރިއެއް ނުވަތަ އާއިލާގެ މެންބަރުން މަރާލި މީހުންނެވެ. ގަސްތުގައި މަރާލެވުނު ފިރިހެނުންގެ ތެރެއިން މި ނިސްބަތަކީ 11.8 އިންސައްތައެވެ.

ވަކި ޖިންސަކަށްވީތީ ކުރާ އަނިޔާގެ ޝިކާރައަކަށްވާ އަންހެނުންނާއި އަންހެން ކުދިންގެ ނިސްބަތް، މުޅި ދުނިޔެއަށް ބަލާލާއިރު ވެސް ގިނައެވެ. ދުނިޔޭގެ ތަފާސްހިސާބުތަކުން ދައްކާ ގޮތުގައި، ކޮންމެ 3 އަންހެނަކުން އެކަކީ އުމުރުގެ ކޮންމެވެސް ހިސާބެއްގައި އަނިޔާގެ ޝިކާރައަކަށްވެފައިވާ ފަރާތެކެވެ. އަދި މިފަދަ އަނިޔާގެ މައްސަލަތަކުގައި ޒާތީގޮތުން ގުޅިފައިވާ ބައިވެރިއެއްގެ ފަރާތުން އަނިޔާ ލިބުމުގެ ހިރާސް ބޮޑެވެ. ކޮންމެ މީހަކަށްވެސް އެންމެ އަމާން އަދި ރައްކާތެރިވާންޖެހޭ ތަން ކަމަށްވާ އެމީހެއް ދިރިއުޅެމުންދާ ގެ މިވަނީ އަންހެނުންނާ އަންހެން ކުދިންނަށް އެންމެ ނުރައްކާތެރި ތަނަށް ވެފައެވެ.

އެހެންކަމުން، މި 16 ދުވަހުގެ ތެރޭގައި، އަދީ އޭގެ ބޭރުންވެސް، އަންހެނުންނާއި އަންހެން ކުދިންނަށް ކުރާ އަނިޔާއާ ދެކޮޅަށް އަޑު އުފުލުމުގެ ގޮތުން، ހޭލުންތެރިކަމުގެ ޕްރޮގްރާމުތަކުގައި ބައިވެރިވެ، އެފަދަ އަނިޔާ ލިބޭ ފަރާތްތަކުގެ އަޑު އުފުލައިދިނުމަކީ ހަމަ ކޮންމެ ފަރުދަކަށްވެސް ކުރެވޭނެ ކަންކަމެވެ. އަދި ކޮންމެ މީހެއްވެސް އަމިއްލަ ގެއާއި، އަމިއްލަ

އާއިލާއިން ފަށައިގެން، ދިވެހިރާއްޖޭގެ މުޖުތަމަޢަކީ އަނިޔާގެ ޢަމަލުތަކުން ސަލާމަތްވެ، ރައްކާތެރި އަދި އަމާން ތަނަކަށް ހެދުމަށް މަސައްކަތްކުރަމާ ހިނގާށެވެ.