ޗައިނާ ސަރުކާރުން ގުރައިދޫއަށް، ސޯލާ މަގުބައްތި ހަދިޔާކޮށްފި

ޗައިނާ ސަރުކާރުން ކ.ގުރައިދޫ ކައުންސިލަށް ސޯލާ މަގުބައްތި ހަދިޔާކޮށްފިއެވެ. މިއީ ޗައިނާ ސަފީރުގެ ޚާއްޞަ އިސްނެންގެވުމަކަށް އެ ރަށަށް ހަދިޔާކުރެއްވި މަގުބައްތިތަކެކެވެ. ހަދިޔާކުރެއްވި ބައްތީގެ ޢަދަދަކީ 100 އެވެ.

މި ޚާއްޞަ ހަދިޔާ ހަވާލުކުރުމަށް، މިއަދު ހެނދުނު ސްޓެލްކޯގެ 5 ވަނަ ފަންގިފިލާގެ އޮޑިޓޯރިއަމްގައި ބޭއްވި ރަސްމިއްޔާތުގައި ޗައިނާ ސަރުކާރުގެ ފަރާތުން މަގު ބައްތިތައް ހަވާލުކޮށްދެއްވީ، ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ވާންގ ލިޒިންއެވެ. ދިވެހި ސަރުކާރުގެ ފަރާތުން މި ތަކެއްޗާ ޙަވާލުވެވަޑައިގަތީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރެވެ.

ޗައިނާ ސަރުކާރުގެ ފަރާތުން ރާއްޖެއަށް ހަދިޔާކުރި މި މަގު ބައްތިތަކަކީ، ޗައިނާ ސަފީރު ކ.ގުރައިދޫއަށް ކުރި ޒިޔާރަތެއްގެ ތެރެއިން ހަމަޖެހިގެން ދިޔަ މަގުބައްތިތަކެކެވެ. ބައްތިތައް ހަވާލުކުރުމަށް ބޭއްވި ރަސްމިއްޔާތުގައި ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ވާންގ ލިޒިން ދެއްކެވި ވާހަކަފުޅުގައި ރާއްޖެއާއީ، ޗައިނާއާ ދެމެދު އޮތީ ޒަމާންވީ ގުޅުމެއްކަމަށާ، ޗައިނާއިން އަބަދުވެސް މަސައްކަތްކުރާނީ ދިވެހީންނަށް ބޭނުންވާ ލުއިފަސޭހަ ގޮތްތައް ހޯދައިދިނުމަށް ކަމަށް ވިދާޅުވިއެވެ.

"ގުރައިދޫއަށް ފޯރުކޮށްދޭ މަގުބައްތި އެހީއަކީ ވެސް، ދެ ޤައުމުގެ ވެރިން ބައްދަލުވެ ގުޅުން އިތުރަށް ބަދަހިކުރުމަށް ނިންމަވައި ކުރެއްވި މަޝްވަރާތަކުގެ އަލީގައި ކުރެވޭ މަސައްކަތެއް. ރައީސް ޑރ. މުޢިއްޒު ޗައިނާއަށް ކުރެއްވި ދަތުރުފުޅާއެކު ވަރަށް ގިނަ މި ފަދަ ކަންކަންކުރެވި ދެ ޤައުމުގެ ގުޅުން ވަނީ ބަދަހިކުރެވިފައި" ސަފީރު ވާންގ ލިޒިން ވިދާޅުވިއެވެ.

މި ވުޒާރާގެ ސްޓޭޓް މިނިސްޓަރ އަލްއުސްތާޛް މޫސާ ފަތުޙީ އާދަމް މި ރަސްމިއްޔާތުގައި ދެއްކެވި ވާހަކަފުޅުގައި، ދިވެހި ސަރުކާރުން އަބަދުވެސް މަސައްކަތްކުރައްވަނީ ކައުންސިލްތަކަށް ކުރިމަތިވެފައިވާ ދަތިތަކަށް ލުއި ގޮތްތައް ހޯއްދަވައިދެއްވުމަށް ކަމަށް ވިދާޅުވިއެވެ. އަދި މި ކަމުގައި ޗައިނާ ސަރުކާރުގެ އެހީތެރިކަން އަބަދުވެސް ލިބިވަޑައިގަންނަވާކަން ފާހަގަކުރެއްވިއެވެ.