އއ. މަތިވެރިއަށާއި، ތޮއްޑޫއަށް ކުރެއްވި ރަސްމީ ދަތުރުފުޅު ނިންމާލައްވައި ވަޒީރު މާލެ ވަޑައިގެންފި

އއ. މަތިވެރިއަށާއި، ތޮއްޑޫއަށް ކުރެއްވި ރަސްމީ ދަތުރުފުޅު ނިންމަވައިލައްވައި ވަޒީރު އާދަމް ޝަރީފު ޢުމަރު މާލެ ވަޑައިގެންފިއެވެ. 2024 ޑިސެންބަރު 1އިން 2އަށް ކުރެއްވި މި ދަތުރުފުޅަކީ އެ ދެ ރަށުގައި އޮތް މުހިންމު ރަސްމިއްޔާތުތަކެއްގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ.

މި ދަތުރުފުޅުގައި ފުރަތަމަ އެ މަނިކުފާނު ވަޑައިގަތީ ތޮއްޑޫއަށެވެ. ތޮއްޑޫއަށް ވަޑައިގެން އެ މަނިކުފާނު ވަނީ ތޮއްޑޫ ކައުންސިލުގެ މެންބަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާ ބައްދަލުކުރައްވާފައެވެ. އަދި ތޮއްޑޫ ކައުންސިލާއި، ތޮއްޑޫ ކައުންސިލްގެ ލޯކަލް އޮތޯރިޓީ ކޮމްޕެނީގެ އެގްޒިޓް މީޓިންގގައި އެ މަނިކުފާނު ވަނީ ބައިވެރިވެވަޑައިގެންފައެވެ. ވަކިވަކިން ތޮއްޑޫގައި ބޭއްވި މި މީޓިނގތައް އޮތީ އިއްޔެ ހެނދުނެވެ.

ވަޒީރު އާދަމް ޝަރީފު ޢުމަރު އިއްޔެ މެންދުރުފަހު މަތިވެރިއަށް ވަޑައިގެން މަތިވެރި ކައުންސިލާއި، އޮޑިޓަރ ޖެނަރަލް އޮފީސް ގުޅިގެން މަތިވެރީގައި ހިންގި މާލީ ބަޔާން ތައްޔާރުކުރާނޭ ގޮތުގެ ތަމްރީނު ޕޮރޮގްރާމް ނިންމުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާފައެވެ. މި ރަސްމިއްޔާތު ޝަރަފުވެރިކޮށްދެއްވާ އެ މަނިކުފާނު ދެއްކެވި ވާހަކަފުޅުގައި އެ ފަދަ ތަމްރީނު ޕްރޮގްރާމުތަކުގެ މުހިންމުކަމުގެ މައްޗަށް ބައްލަވައިލެއްވިއެވެ.

މަތިވެރިއަށާއި، ތޮއްޑޫއަށް ވަޒީރު ކުރެއްވި، ރަސްމީ ދަތުރުފުޅުގައި މި މިނިސްޓްރީގެ ސްޓޭޓް މިނިސްޓަރ މުޙައްމަދު މާހިރާއި، ސްޓޭޓް މިނިސްޓަރ ޝަރަފދުއްދީން އަބޫބަކުރާއި، އއ. އަތޮޅު ބެލެހެއްޓެވުމާއި ޙަވާލުވެ ހުންނެވި މި މިނިސްޓްރީގެ ނާއިބު އަޙްމަދު ޙަލީމް ބައިވެރިވެ ވަޑައިގެންނެވިއެވެ.