އިޖުތިމާޢީ ވުޒާރާގެ މުވައްޒަފުންނަށް އަމާޒުކޮށްގެން ދިވެހި ބަހުގެ ކުރުމުއްދަތުގެ ތަމްރީން ޕްރޮގްރާމެއް ފަށައިފި

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ އިން ދިވެހި ބަހުގެ އެކަޑެމީގެ އެހީތެރިކަމާއެކު، މި ވުޒާރާގެ މުވައްޒަފުންނަށް އަމާޒުކޮށްގެން ދިވެހި ބަހުގެ ކުރުމުއްދަތުގެ ތަމްރީން ޕްރޮގްރާމެއް ފަށައިފިއެވެ.

މިއީ 5 ދުވަހުގެ މުއްދަތަށް ކުރިއަށް ގެންދެވޭ ޕްރޮގްރާމެކެވެ.

މި ކޯހުގައި ލަފުޒު ވަކިކޮށްގެން ލިޔުމާއި އައިބައިފިލީގެ ހަމަތަކާއި ފިލިތައް ބޭނުންކުރަން ދަސްކޮށްދެެވިގެންދާނެއެވެ. އަދި އަދަބުވެރި ބަސްމަގާއި، ސާފު ރީތި އިބާރާތް ބޭނުންކުރަން އުނގަންނައިދެވޭނެއެވެ.

މި ކޯހުގެ މަގުސަދަކީ ދިވެހިބަސް ހެޔޮ ގޮތުގައި ބޭނުންކުރަން ދަސްކޮށްދީ، ދިވެހިބަހުގެ ހަމަތަކާއި އުސޫލުތަކާއި ގަވާއިދުތަކާ އެއް ގޮތަށް މުއާމަލާތު ކުރާނެ ގޮތްތައް މުވައްޒަފުންނަށް އޮޅުންފިލުވައިދީ އުނގަންނައިދިނުމެވެ. އެއާއެކު، އޮފީސް މާހައުލުގައި އަދަބު އިޙުތިރާމާ އެކު މުއާމަލާތު ކުރަން ދަންނަ މުވައްޒަފުން ބިނާކޮށް، ދިވެހިބަހުން ކުރާ ރަސްމީ އަދި ނުރަސްމީ މުއާމަލާތުތައް ސާފު ދިވެހިބަހުން ކުރުމަށް ބާރު އެޅުމެވެ.