ނުކުޅެދުންތެރިކަން ހުންނަ ކުދިންގެ ބެލެނިވެރިން ނަފްސާނީ ސިއްޙަތަށް ސަމާލުކަން ދިނުމުގެ މުހިންމުކަން

ނުކުޅެދުންތެރިކަން ހުންނަ ކުދިންގެ ބެލެނިވެރިން ވިސްނަންޖެހޭ ކަންކަން ގިނަވެފައި، އަމިއްލަ ދުޅަހެޔޮކަން ކަށަވަރުކުރުމަށް ކުރަންޖެހޭ ކަންކަން ކުރުމަށް ދަތިވާ ފަހަރު އާދެއެވެ. އެހެންކަމުން، ނުކުޅެދުންތެރިކަން ހުންނަ ކުދިންގެ ބެލެނިވެރިން ނަފްސާނީ ސިއްޙަތަށް ސަމާލުކަން ދިނުން ވަރަށް މުހިންމެވެ.

ސަބަބަކީ، އެކަށީގެންވާ ވަރަށް ޞިއްޙަތަށް ފަރުވާ ނުބެހެއްޓޭނަމަ، ހާސްވެ، ފިކުރުބޮޑުވެ، ކުދިންނަށް އެކަށީގެންވާ މިންވަރަށް އަޅާލުން ނުދެވިދާނެތީއެވެ. މީގެ ސަބަބުން ޢާއިލީ ގުޅުންތައް ހީނަރުވެ، އިޖުތިމާޢީ ކަންކަމުގައި ބައިވެރިވާން ފަސްޖެހޭ ފަހަރު އާދެއެވެ. އެހެންކަމުން އަމިއްލަ ޞިއްޙަތަށް ދޭން ޖެހޭ ސަމާލުކަން ދިނުން ވަރަށް މުހިންމެވެ.

ނަފްސާނީ ޞިއްޙަތު ދުޅަހެޔޮކަން މަތީ ބެހެއްޓުމަށް އެންމެ އަސާސީ ކަމަކީ އަމިއްލަ ނަފްސަށް އަޅާލުމެވެ. މިގޮތުން ކޮންމެ ދުވަހަކުވެސް އަމިއްލަ ނަފްސަށް އުފާވެރިކަން ގެނެސްދޭ ކަމެއް ކޮށްލަންވާނެއެވެ. މިސާލަކަށް މީރު ކާ އެއްޗެއް ކެއުން، ނުވަތަ ރަޙުމަތްތެރިއަކާ ބައްދަލުކޮށްލައިގެން ވެސް މި އުފާވެރިކަމާއި ހިތްހަމަޖެހުން ލިބިދާނެއެވެ.

މީގެ އިތުރުން، ކޮންމެ ދުވަހަކުވެސް އަމިއްލަ ނަފްސަށް ވަގުތު ކޮޅެއް ހުސްކޮށްލުން ވަރަށް މުހިންމެވެ. މަދުވެގެން 5 މިނަޓް ނުވަތަ 10 މިނަޓް އެކަނި ހޭދަކޮށްލުމަކީ ހާސްވެ، ކަންބޮޑުވުމުން ތިމާ ދުރުކޮށްދޭ ކަމެކެވެ. އަދި ފިކުރު ބޮޑުވާ ގަޑީ ފުންކޮށް ނޭވާލާ ކަސްރަތުކުރުމަކީ ސިކުނޑީގައި ހިނގާ ހަލުވި ފިކުރުތައް މަޑުމަޑުން ބުރަކި ޖައްސާލުމަށް އެހީތެރިވެދޭ ކަމެކެވެ. މިގޮތަށް ނޭވާލާ ކަސްރަތުކުރާނީ، ފުންކޮށް ނޭވާއެއް ލައި، މަޑުމަޑުން އަނގައިން ނޭވާ ބޭރުކުރަމުންނެވެ.

އެއާއެކު، ޢާއިލާއާއި ރައްޓެހިންނާ ބައްދަލުކޮށް ނުވަތަ ފޯނުން ވާހަކަ ދައްކާލުމަކީވެސް ހިތްހަމަޖެހުމުގެ އިޙުސާސް އިތުރުކޮށްދޭނެ ކަމެކެވެ. އަދި ތިމާގެ ޚިޔާލާއި ފިކުރު އެމީހުންނާ ހިއްސާކުރުމާއި، އެހީއެއް ބޭނުންވާ ހިނދު ފަސްނުޖެހުން ވަރަށް މުހިންމެވެ. މީގެ އިތުރުން، ކޮންމެ ދުވަހަކުވެސް ކުދިންނާއެކު މަޖާ ވަގުތުކޮޅެއް ހޭދަކޮށްލުމުގެ ގޮތުން ކަމެއް ރާވާލުމަކީ ކުރެވިދާނެ ކަމެކެވެ. އަދި ކޮންމެ ދުވަހަކުވެސް ކަސްރަތުކޮށް، ހަރަކާތްތެރިވެ އުޅުމަށް ދުވަހުގެ ތާވަލުން ކޮންމެވެސް ވަގުތެއް ހުސްކޮށް، ކަސްރަތުކުރުން އާދައަކަށް ހެދުމަކީ ދުޅަހެޔޮ ޞިއްޙަތެއްގައި ހުރުމަށް އެންމެ ބޮޑަށް އެހީތެރިވެދޭނެ އެއް ކަންތަކެވެ.

މި ހުރިހާ ކަމެއް ކުރުމަށްފަހު ވެސް ހިތް ނުތަނަވަސްވެ ފިކުރުބޮޑުވާ ނަމަ ލަސްނުކޮށް ޞިއްޙީ ފަންނުވެރިއެއްގެ އެހީތެރިކަން ހޯދުން ވަރަށް މުހިންމެވެ.