ގަހަނާ އުފެއްދުމުގެ މަސައްކަތްގައި ކުރިއަރަމުންދާ އަންބަލަންގެއަށް ވަޒީރު ސަޢީދު ޒިޔާރަތް ކުރައްވައިފި

ޢިޤްތިޞާދީ ތަރައްޤީއާއި ވިޔަފާރިޔާ ބެހޭ ވަޒީރު މުޙައްމަދު ސަޢީދު، ދިވެހި ސަޤާފަތުގެ ފުރިހަމަ އުފެއްދުންތައް ހިމެނޭ ވިޔަފާރިއެއް ކަމަށްވާ އަންބަލަންގޭގެ ހުނަރުވެރި ކަނބަލުންނާ ބައްދަލު ކުރައްވައިފިއެވެ. މި ހުނަރުވެރި ފަންނުވެރިން ދަނީ އެފަރާތުގެ ވިޔަފާރީގައި ރާއްޖޭގެ މުއްސަނދި ސަޤާފީ ތަރިކައާ ގުޅުވައިގެން ގަހަނާ އުފެއްދުމުގެ މަސައްކަތް ކުރަމުންނެވެ.

ދިވެހި ވިޔަފާރިތަކަށް ވަޒީރު ކުރައްވަމުންދާ ޒިޔާރަތުގެ ތެރެއިން މިއީ މިހާތަނަށް ކުރެވުނު 8 ވަނަ ޒިޔާރަތެވެ. ވަޒީރުގެ މި ޒިޔާރަތުގައި އަންބަލަންގޭގެ މަސައްކަތްތައް ކައިރިން ބައްލަވައިލައްވައި ބައެއް މަސައްކަތްތައް ކުރާގޮތް އަމިއްލައަށް ވަނީ ތަޖުރިބާ ކޮށްލައްވާފައެވެ.