ރިޔާސީ ދައުރު ބަދަލުވާ ތާރީޚަކީ ނޮވެންބަރު މަހުގެ 11 ވަނަ ދުވަސް ކަމުގައި ހަމަޖެއްސުމަށްޓަކައި ރައްޔިތުންގެ ފެންނަ ނުފެންނަ ވޯޓަކަށް އެހުމަށް ހަމަޖެހިފައިވޭ: ބަންޑާރަނައިބު އުޝާމް

ރިޔާސީ ދައުރު ބަދަލުވާ ތާރީޚަކީ ނޮވެންބަރު މަހުގެ 11 ވަނަ ދުވަސް ކަމުގައި ހަމަޖެއްސުމަށްޓަކައި، އެކަމާގުޅޭގޮތުން ރައްޔިތުންގެ ފެންނަ ނުފެންނަ ވޯޓަކަށް އެހުމަށް ހަމަޖެހިފައިވާ ކަމަށް ބަންޑާރަނައިބު އަލްއުސްތާޛު އަޙްމަދު އުޝާމް ވިދާޅުވެއްޖެއެވެ.

ބަންޑާރަނައިބު އުޝާމް މިހެން ވިދާޅުވީ ސަރުކާރަށް އެއް އަހަރުގެ ފުރުމުގެ މުނާސަބަތުގައި ޕީއެސްއެމް ނިއުސްއަށް ދެއްވި ޚާއްޞަ އިންޓަވިއުއެއްގައެވެ.

ބަންޑާރަނައިބު އުޝާމް ވިދާޅުވި ގޮތުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބޭނުންފުޅުވާ ގޮތަކީ ޒަމާނުންސުރެ ރާއްޖޭގައި ކަންހިންގަމުން އައިގޮތަށް، ރިޔާސީ ދައުރު ބަދަލުވާ ތާރީޚަކީ ނޮވެންބަރު މަހުގެ 11 ވަނަ ދުވަހުގެ ގޮތުގައި ހަމަޖެއްސެވުންކަމަށެވެ.

މި މަޢުޟޫއަށް ވާހަކަ ދައްކަވަމުން ބަންޑާރަނައިބު އުޝާމް ވިދާޅުވީ ޤާނޫނުއަސާސީއަށް އިޞްލާޙެއް ނުގެނެސް މިބަދަލު ގެނެވެން ނެތް ކަމަށާއި، ޤާނޫނުއަސާސީ ބުނާގޮތުން ވެރިކަމުގެ ދައުރު ބަދަލުކުރާކަމުގައިވާނަަމަ ރައްޔިތުންގެ ފެންނަ ނުފެންނަ ވޯޓަކަށް ދާންޖެހޭ ކަމުގައެވެ.

ބަންޑާރަނައިބު އުޝާމް ވިދާޅުވީ ޤާނޫނުއަސާސީގައި ބުނަނީ ރިޔާސީ ދައުރަކީ 5 އަހަރު ދުވަސް ކަމަށާއި، އެ މުއްދަތުން އެންމެ ދުވަހެއް އުނިކުރާ ކަމުގައިވާ ނަމަވެސް ޤާނޫނީ ގޮތުން ޞައްޙަ ގޮތަކީ ރައްޔިތުންގެ ފެންނަ ނުފެންނަ ވޯޓަކަށް ގޮސްގެން ޤާނޫނުއަސާސީ އިޞްލާޙްކޮށްގެން ކުރިއަށް ދިއުންކަމުގައެވެ.

އެހެންކަމުން، މިކަމުގައި ޤާނޫނުއަސާސީ އިޞްލާޙުކުރުމަށްޓަކައި ރައްޔިތުންގެ ފެންނަ ނުފެންނަ ވޯޓަކަށް އަހާނެ ކަމަށާއި، އަދި ރައްޔިތުން އެކަމަށް ތާޢީދުކުރައްވައިފި ކަމުގައިވާނަމަ، 2028 ވަނަ އަހަރު ރިޔާސީ ދައުރު ފެށޭނީ ނޮވެމްބަރު 11 ވަނަ ދުވަހު ކަމުގައި ބަންޑާރަނައިބު އުޝާމް ފާޙަގަކުރެއްވިއެވެ.