މާލެ އާއި ވިލިމާލޭ މަގުތަކުގެ ފީސިބިލިޓީ ދިރާސާ ނިމުމާއި ގުޅިގެން މިނިސްޓަރ ޑރ. މުއްޠަލިބް ޗައިނާ ސަރުކާރުން ޢައްޔަންކޮށްފައިވާ ޗައިނާގެ އެކްސްޕާރޓް ޓީމާ ބައްދަލުކުރައްވައިފި

މާލެ އާއި ވިލިމާލޭ މަގުތަކުގެ ފީސިބިލިޓީ ދިރާސާ ނިމުމާ ގުޅިގެން، މިނިސްޓަރ ޑރ. ޢަބްދުﷲ މުއްޠަލިބް އާއި ސްޓޭޓް މިނިސްޓަރ އިބްރާހީމް ތާއާމް މުޙައްމަދު އަދި މިނިސްޓްރީގެ ޓެކްނިކަލް ޓީމް ޗައިނާ އެމްބަސީގެ އިސްވެރިންނާއި ޗައިނާ ސަރުކާރުން ޢައްޔަންކޮށްފައިވާ ޗައިނާގެ އެކްސްޕަރޓް ޓީމާ ބައްދަލުކުރައްވައިފިއެވެ. މި ބައްދަލުވުމުގައި މިނިސްޓަރ ޑރ. މުއްޠަލިބް، ޗައިނާ އެމްބަސީ އާއި އެކްސްޕަރޓް ޓީމަށް ޝުކުރު އަދާކުރައްވައި، މި މަޝްރޫޢުގެ މުހިންމުކަން ފާހަގަކޮށްދެއްވިއެވެ. މި މަޝްރޫޢަކީ މާލެ އާއި ވިލިމާލޭގެ ރައްޔިތުންގެ ދިރިއުޅުމާއި ގުޅިފައިވާ ވަރަށް މުހިންމު މަސައްކަތެއްކަން އެމަނިކުފާނު ފާހަގަކުރެއްވިއެވެ. މި މަޝްރޫޢުގެ ސައިޓް އެސެސްމަންޓްތަކާއި ފީސިބިލިޓީގެ މަސައްކަތްތައް ފެށިފައިވަނީ މި ހިނގާ ނޮވެމްބަރ މަހުގެ 4 ގައެވެ. އަދި ނޮވެންބަރ 21 އަށް މިވަނީ އެ މަސައްކަތް ނިންމާލެވިފައެވެ. މި ދިރާސާގެ ނަތީޖާތަކުގެ މައްޗަށް ބިނާކޮށް، ކުރިއަށް އޮތްތަނުގައި މާލެ އާއި ވިލިމާލޭގެ މަގުތައް ތަރައްޤީކުރުމުގެ މަސައްކަތް ވަރަށް އަވަހަށް ކުރިއަށް ގެންދެވޭނެ ކަމަށް ބެލެވެއެވެ. މި މަޝްރޫޢުގެ ސަބަބުން މާލެ އާއި ވިލިމާލޭގެ މަގުތަކުގެ ފެންވަރު ރަނގަޅުވެ، ދަތުރުފަތުރުގެ ނިޒާމު ހަރުދަނާވެ، ރައްޔިތުންނަށް ލުއިފަސޭހަކަން ލިބިގެންދާނެ ކަމަށް އުންމީދުކުރެވެއެވެ.