މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް އެފްކޮންސް އިންފްރާސްޓްރަކްޗަރ ލިމިޓެޑް އަދި ކޮންސަލްޓަންޓް އަރުޕް ލިމިޓެޑާ ބައްދަލުކުރައްވައިފި

މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް އަދި ދިވެހިރާއްޖެއަށް ކަނޑައަޅުއްވާފައިވާ އިންޑިއާގެ ހައި ކޮމިޝަނަރ އެޗް.އީ. މުނު މަހާވަރު، ގްރޭޓަރ މާލެ ކަނެކްޓިވިޓީ - މާލެ-ތިލަފުށި ލިންކް މަޝްރޫޢުގެ ކޮންޓްރެކްޓަރ އެފްކޮންސް އިންފްރާސްޓްރަކްޗަރ ލިމިޓެޑް އަދި ކޮންސަލްޓަންޓް އަރުޕް ލިމިޓެޑާ ބައްދަލުކުރައްވައިފިއެވެ. މިނިސްޓަރ ޑރ. މުއްޠަލިބްގެ އިތުރުން މި ބައްދަލުވުމުގައި މިނިސްޓްރީ އޮފް ސްޓޭޓް އިބްރާހިމް ތާއާމް މުޙައްމަދު، މިނިސްޓްރީގެ ޓެކްނިކަލް ޓީމް އަދި މިނިސްޓްރީ އޮފް ފޮރިން އެފެއާޒްގެ އިސް އޮފިޝަލުން ބައިވެރިވެވަޑައިގެންނެވިއެވެ. މީގެއިތުރުން، ދިވެހިރާއްޖޭގައި ހުންނަ އިންޑިއާ ހައި ކޮމިޝަންގެ އިސް އޮފިޝަލުންވެސް މި ބައްދަލުވުމުގައި ބައިވެރިވެވަޑައިގެންނެވިއެވެ. މި ބައްދަލުވުމުގެ މައިގަނޑު މަޤްޞަދަކީ މާލެ-ތިލަފުށި ލިންކް މަޝްރޫޢުގެ މަސައްކަތް އަވަސްކުރުމަށްޓަކައި ދިމާވެފައިވާ ގޮންޖެހުންތައް ދެނެގަނެ، އެކަންކަން ޙައްލުކުރުމަށް މަގުފަހިކުރުމެވެ. އެގޮތުން ބައްދަލުވުމުގައި މަޝްރޫޢު ތަންފީޒުކުރުމުގައި ކޮންޓްރެކްޓަރަށް ދިމާވެފައިވާ ދަތިތަކާ ބެހޭގޮތުން ވަރަށް ބޮޑަށް މަޝްވަރާކުރެވުނެވެ. މާލެ-ތިލަފުށި ލިންކް މަޝްރޫޢަކީ އިންޑިއާ ސަރުކާރާއި ގުޅިގެން ކުރިއަށްދާ ބޮޑު މަޝްރޫޢެއް ކަމަށްވާތީ، މި މަޝްރޫޢުގެ މަސައްކަތް އަވަސްކުރުމަށް ދެ ޤައުމުގެ ސަރުކާރުން ވަރަށް ބޮޑު އަހައްމިއްޔަތުކަމެއް ދެއްވައެވެ. މި މަޝްރޫޢު ނިމުމުން މާލެ ސަރަޙައްދުގެ ދަތުރުފަތުރަށް ވަރަށް ބޮޑު ލުޔެއް ލިބިގެންދާނެ ކަމަށް ބެލެވެއެވެ.