ހުނަރުތަކުން ތަމްރީންވެ، ވަޒީފާތަކަށް ނިކުތުމަކީ ދަށް ކަމެއްނޫން: މިނިސްޓަރ

ޤައުމަށް ބޭނުންވާ ތަފާތު ހުނަރުތަކުން ތަމްރީންވެގެން ވަޒިފާތަކަށް ނިކުތުމަކީ، ދަށް މަސައްކަތެއް ނޫންކަމަށާ، ޕްރޮފެޝަނަލް ދާއިރާ ތަކާއި އެއް ހަމައެއްގައި އިހްތިރާމް ލިބޭ ވަޒީފާތަކެއްކަމަށް މިނިސްޓަރ އޮފް ހަޔަރ އެޑިޔުކޭޝަން ޑރ. މަރްޔަމް މާރިޔާ ވިދާޅުވެއްޖެއެވެ.

އެކަމަނާ މިހެން ވިދާޅުވީ އުފެއްދުންތެރި މަސައްކަތްތެރިންގެ ޖީލެއް ބީނާކުރުމަށް އެކިއެކި ޕްރޮގްރާމްތައް ހިންގުން ފަހިކުރުމަށްޓަކައި ތިން ފަރާތަކާއިއެކު އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައެވެ.

މިނިސްޓަރ ވިދާޅުވީ މިހާރު ޤައުމަށް ބޭނުންވާ ދާއިރާތަކުން ހުނަރުވެރިން އުފެއްދުމަކީ މިހާރަށް ވަރަށް ބޭނުން ޖެހިފައިވާކަމެއްކަމަށެވެ. އަދި މިހާރަކަށް އައިސް ގިނަ މީހުންނަށް ބެލެވިފައި އޮންނަނީ، ޤަބޫލްކުރެވިފައި އޮންނަނީ އަބުރުވެރި މަސައްކަތަކަށް ވަނީ ޕްރޮފެޝަނަލް ވަޒީފާތަށްކަމަށެވެ. އެހެންނަމަވެސް ހުނަރުތަކުން ތަމްރީން ވެވިގެން ވަޒީފާތަކަށް ނިކުތުމަކީވެސް އަބުރުވެރި މަސައްކަތެއްކަމަށެވެ.

އެކެޑެމިކް ދާއިރާ އާއިއެއްގޮތަށް ހުނަރުތައް ތަރައްޤިކުރުމުގެ ދާއިރާ އަކީ އެއް ހަމައެއްގައި ވާ ދެކަންތައްކަން މުޖްތަމަޢުއަށްވެސް ގޮވާލާން ބޭނުންވޭ. އެއީ މިހާރު ގިނަބަޔަކު ދެކޭގޮތުގައި ޕްރޮފެޝަނަލް ސްކިލްސް އަކީ އަހައްމިއްޔަތުކަން ދޭންވާ ސްކިލްސް. އެހެންވެގެން މިހާ ހިސާބަށް ޤައުމު އައިސްފައިވާއިރު ގިނައީ އެދާއިރާތަކުން ކުރިޔަށްގޮސްފައިވާ ދަރިވަރުން. އެހެންނަމަވެސް ޤަބޫލުކުރަންޖެހޭ ހުނަރުތަކުން ކުރިއަރައިގެން ދިއުމަކީވެސް ހަމަ އިހްތިރާމް ލިބޭކަމެއްކަން

މިނިސްޓަރ އިތުރަށް ވިދާޅުވީ މިހާރުވެސް ގްރޭޑް 10 އަކުން ނިމިފައިތިބި ދެ ހާހަށްވުރެ ގިނަކުދިން ނަށް ކެރިއަރގައިޑޭންސް ދޭނެ މަގުތައް ހޯދަން ޖެހިފައިވާކަން ފާހަގަ ކުރެވިފައިވާކަމަށެވެ. އަދި މިފަދަ އެއްބަސްވުންތަކުގެ ސަބަބުން، ތަފާތު ދާއިރާތަކަށް ކުދިން އަހުލުވެރިކޮށް ހުނަރުތަކަށް ދަރިވަރުން ނެރުމަށް އެހީއަކަށް ވެގެންދާނެކަމަށެވެ.