ތައުލީމީ ދާއިރާއަށް ކާމިޔާބު އަހަރެއް- މިނިސްޓަރުގެ ޝުކުރު މުވައްޒަފުންނަށް

މިދިޔަ 1 އަހަރުގެ ތެރޭގައި މިނިސްޓްރީއިން ހޯދުނު ކާމިޔާބީތަކަކީ، ހުރިހާ މުވައްޒަފުން ގުޅިގެން ކުރެއްވި މަސައްކަތުގެ ނަތީޖާކަން ފާހަގަކޮށް، މުވައްޒަފުންނަށް މިނިސްޓަރ ޑރ. އިސްމާޢީލް ޝަފީޢު ޝުކުރު އަދާކުރައްވައިފިއެވެ.

މިނިސްޓްރީގެ 1 އަހަރުގެ ކާމިޔާބީތައް ފާހަގަކޮށް، މުވައްޒަފުންގެ އަގު ވަޒަންކުރުމުގެ ގޮތުން މިއަދު ބޭއްވި ހާއްސަ ހަފްލާގައި ވާހަކަފުޅު ދައްކަވަމުން މިނިސްޓަރ ވިދާޅުވީ ދިވެހިރާއްޖޭގެ ހިދުމަތުގެ ނިޒާމަށް ބަލާލާއިރު، މިނިސްޓްރީ އޮފް އެޑިޔުކޭޝަނަކީ ދިވެހިރާއްޖޭގެ އެންމެ ގިނަ ރައްޔިތުންނަށް ހިދުމަތްދޭ މުވައްސަސާކަމަށާއި ދައުލަތުގެ ސްކޫލުތަކުގައި ވެސް 80،000 އަށް ވުރެ ގިނަ ދަރިވަރުންނާއި 10،000 ވަރަކަށް މުވައްޒަފުން މަސައްކަތް ކުރައްވަމުން ގެންދަވާކަމަށެވެ.

ކޮންމެ މުވައްޒަފަކީ މުހިންމު މުވައްޒަފެއް. ކޮންމެ މުވައްޒަފަކު ކުރައްވާ މަސައްކަތް ވަކި ވަކި މަސައްކަތެއްގެ ގޮތުގައި ނުބެލި ކަމުގައި ވިޔަސް، މުޅި މަސައްކަތް އަޅުގަނޑުމެންނަށް ފެންނާނީ އެންމެންގެ މަސައްކަތް އެއްކޮށްލުމުން. އެހެން ވީމާ، ހުރިހާ ބޭފުޅުން އެއް ޓީމެއްގެ ގޮތުގައި މަސައްކަތް ކުރެއްވުމަކީ އަޅުގަނޑު ވަރަށް ބޮޑަށް އެދޭ ކަމެއް

މީގެ އިތުރުން ތަޢުލީމީ ދާއިރާގެ ކަންކަން އިންތިޒާމުކޮށް، ދެވޭ ހިދުމަތުގެ ފެންވަރު މަތިކުރުމަށާއި އަދި ގައުމު ބިނާކުރުމުގެ ހަގީގީ މަސައްކަތް ކުރެވެމުން މިދަނީ އެޑިޔުކޭޝަން މިނިސްޓްރީ އިން ކުރަމުންގެންދާ މަސައްކަތުގެ ތެރެއިން މިނިސްޓަރ ވަނީ ފާހަގަ ކުރައްވާފައެވެ.