52 ހަފްތާގެ ކާމިޔާބީ: ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ހަމަހަމަ ފުރުސަތުތަކެއް ހޯދުމުގެ މަސްކަތްތައް އާ އުސްމިންތަކަށް!

ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުޞަތު ހޯދައިދިނުމާއި ވަޒީފާ ދިނުމުގައި ޢަމަލުކުރާނެ ގޮތުގެ ގަވާއިދު ގެޒެޓް ކުރެވިފައެވެ. މިއީ، ނުކުޅެދުންތެރިކަން ހުންނަ މީހުންނަށް އެހެން މީހުންނެކޭ އެއްފަދައިން ވަޒީފާ އަދާކުރުމުގެ ފުރުޞަތުތަކާއި ވަޒީފާގެ މައިދާނުގައި ހަމަހަމަ ފުރުޞަތުތައް ލިބިދިނުމުގެ ޙައްޤު ލިބޭކަން ކަށަވަރުކުރުމަށް އުސޫލުތައް ކަނޑައެޅުމުގެ ގޮތުން އެކުލަވާލެވިފައިވާ ގަވާއިދެކެވެ.

މި މަސައްކަތުގެ ތެރެއިން، ނުކުޅެދުންތެރިކަން ހުންނަ މީހުންގެ ތެރެއިން ވަޒީފާއަށް އެދޭ ފަރާތްތަކުގެ ދަފްތަރު ވަނީ އެކުލަވާލެވިފައެވެ. އަދި މި ދަފްތަރުގައި ހިމެނޭ މީހުންގެ ފަންކްޝަނަލް އެސެސްމަންޓް ހަދައި ޖޮބް ޕްރޮފައިލް ތައްޔާރުކުރުމުގެ މަސައްކަތް އަންނަނީ ކުރެވެމުންނެވެ. އަދި ކުރިއަށް ދެވޭނެ މަގުތަކަށް ކެޓަގަރައިޒްކޮށް (މިސާލު: ސީދާ ވަޒީފާ، އިންޓަރންޝިޕް ފުރުޞަތުތައް، ވަޒީފާއަށް ތައްޔާރުވުމަށް ބޭނުންވާ ތަފާތު ހުނަރު ދަސްކުރުމުގެ ޕްރޮގްރާމްތައް)، ވަޒީފާއަށް އެދޭ މީހުންގެ ޝައުޤުވެރިކަން ހުންނަ އަދި އެމީހުންގެ ހުނަރާއި ގުޅޭގޮތަށް ވަޒީފާގެ ފުރުޞަތުތައް ހޯދައިދިނުމަށް މަސައްކަތް އަންނަނީ ކުރެވެމުންނެވެ.

ހަމައެއާއެކު، މަތީ ތަޢުލީމާއި އެކި ހުނަރު ދަސްކޮށްދޭ އިދާރާތަކާއި ބައްދަލުކޮށް ނުކުޅެދުންތެރިކަން ހުންނަ މީހުން އިތުރަށް ޝާމިލުކުރެވޭނެ ގޮތްތަކާއި މެދު މަޝްވަރާކޮށް ލަފާދިނުމުގެ މަސައްކަތް އަންނަނީ ކުރެވެމުންނެވެ. މިގޮތުން ދިވެހިރާއްޖޭގެ ބޮޑެތި ޔުނިވަރސިޓީތަކާއި ބައްދަލުކޮށް އެތަނުގައި ޑިސްއެބިލިޓީ ސަޕޯޓު ދެވޭ މިންވަރު ބަލައި މިކަން އިތުރަށް ރަނގަޅުކުރެވިދާނެ ގޮތްތަކާއި މެދު މަޝްވަރާ ބައްދަލުވުން ވަނީ ބޭއްވިފައެވެ. އަދި އާ ސެމިސްޓަރ ފެށުމުގެ ކުރިން ނުކުޅެދުންތެރިކަން ހުރި މީހުންނަށް މިތަންތަނުގައި ހިންގާ ކޯސްތަކާއި ލިބިދޭ ޑިސްއެބިލިޓީ ސަޕޯޓުގެ މަޢުލޫމާތު ސެޝަން ބޭއްވުމަށް ދަނީ ރޭވެމުންނެވެ.

މި ދާއިރާގެ މާހިރުންގެ ލަފަޔާއި އިރުޝާދު ހޯދުމަށް ބައްދަލުވުން ދަނީ ބޭއްވެމުންނެވެ. މިގޮތުން އިންސާނީ ވަސީލަތްތައް ބިނާކުރުމަށްޓަކައި ސްޓަޑީ ޓުއަރ ފަދަ ފަރާތްތަކާއި ގުޅިގެން ގިނަ މަސައްކަތްތަކެއް ދަނީ ކުރެވެމުންނެވެ،

ޕޮލިޓެކްނިކްގައި އޯގަސްޓް މަހުގައި ހިންގުނު 2 ކޯހެއްގައި (އިލެކްޓްރިކް އަދި ބޭކިންގ) މުޅިއެކު 24 ނުކުޅެދުންތެރިކަން ހުރި މީހުން ވަނީ ބައިވެރިވެފައެވެ.

ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުޞަތު ފަހިކޮށްދިނުމަށްޓަކައި ވުޒާރާތަކާއި، ސަރުކާރު ހިއްސާވާ ކުންފުނިތަކާއި، ޢާންމު ވިޔަފާރިތަކާއި ބައްދަލުކޮށް މަޝްވަރާކުރުމުގެ މަސައްކަތް އަންނަނީ ކުރެވެމުންނެވެ. އަދި މި ފަރާތްތަކުން ބޭނުންވާ ފަންނީ ލަފާ، ވުޒާރާއިން އަންނަނީ ފޯރުކޮށްދެމުންނެވެ. މީގެ އިތުރުން، ނުކުޅެދުންތެރިކަން ހުންނަ މީހުންނަށް ވަޒީފާ ދޭ އެކި ސަރުކާރު ހިއްސާވާ ކުންފުނިތަކާއިއެކު ބައްދަލުކޮށް، އެތަންތަނުގައި ވަޒީފާ އަދާކުރަމުންދާ ފަރާތްތަކާއި ގުޅުންހުރި ކަންބޮޑުވުންތަކުގެ އިތުރުން، ވަޒީފާތަކަށް ހުށަހެޅޭނެ އައު ފަރާތްތަކުގެ މަޢުލޫމާތު ޙިއްސާކުރުމުގެ މަސައްކަތް ދަނީ ކުރެވެމުންނެވެ.

ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުޞަތުތަކާއި އިންޓާރންޝިޕްގެ ފުރުޞަތުތައް ފަހިކޮށްދިނުމަށް ސަރުކާރު ޙިއްސާވާ ކުންފުނިތަކާއި އެކު ގިނަ މަސައްކްތަކެއް ވަނީ ކުރެވިފައެވެ. ނުކުޅެދުންތެރިކަން ހުންނަ މީހުންގެ ތެރެއިން ވަޒީފާ ހޯދުމަށް އެދޭ ފަރާތްތަކުގެ ދަފްތަރުގެ ބައެއް ތަފާސް ހިސާބު:

a. ވަޒީފާ ދަފްތަރުގައި ހިމެނޭ މީހުންގެ ޖުމްލަ އަދަދު :135

b. 2023 ނޮވެމްބަރުން ފެށިގެން ކުރެވުނު މަސައްކަތުގެ ތެރެއިން ހޯދާ ދެވިފައިވާ ވަޒީފާ : 5

c. ވަޒީފާ އަދާ ކުރާ މީހުންގެ ތެރެއިން މޮނިޓަރ ކުރަމުންދާ އަދަދު : 32

d. މިހާރު އަދާ ކުރަމުންދާ ވަޒީފާގެ ނޫން އެހެން ވަޒީފާއެއް ހޯދުމަށް އެދޭ ފަރާތްތަކުގެ އަދަދު : 20

e. 2023 ނޮވެމްބަރުން ފެށިގެން ވަޒީފާގެ ފުރުޞަތު ފަހިކޮށްދިނުމަށް ބައްދަލު ކުރެވިފައިވާ އަމިއްލަ ފަރާތްތަކުގެ އަދަދު: 21

f. ފަންކްޝަނަލް އެސެސްމަންޓް ހެދިފައިވާ މީހުންގެ ޖުމްލަ އަދަދު :34

g. ޖޮބް-ރެޑިނަސް ޕްރޮގްރާމްގައި ބައިވެރިވާ މީހުންގެ އަދަދު: 12