ކޮންސްޓްރަކްޝަން މިނިސްޓްރީއަށް 52 ހަފްތާ: ލަނޑުދަނޑިތައް ހާސިލުކުރުމަށް އެއް އަޒުމެއްގައި ކުރިއަށް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހިރާއްޖޭގެ ވެރިކަމާއި ހަވާލުވެވަޑައިގަތުމަށްފަހު، ދިވެހިރާއްޖޭގައި އިމާރާތްކުރުމާއި ބިނާރާއި ގުޅުންހުރި އެންމެހާ ކަންކަން އެއް ފުރާޅެއްގެ ދަށުން ހިންގެވުމަށް މުޅިން އާ ވުޒާރާއެއް އުފެއްދެވިއެވެ. އަދި މި ވުޒާރާގެ އެންމެހައި ކަންކަން ހިންގައި ބެލެހެއްޓުމަށް، އެކަމަށް އެންމެ އެކަށޭނަ، ދެގޮތެއް ނުވާ އާރުކާޓީއެއް ހުންގާނުގައި ބެހެއްޓެވިއެވެ. ނަތީޖާއަކަށް ވެގެންދިޔައީ  ރައީސުލްޖުމްހޫރިއްޔާގެ ވައުދުފުޅުތައް ތަންފީޒުކުރުމަށް އަޅުއްވަން ޖެހޭ އެންމެހާ ފިޔަވަޅުތަކެއް އަޅުއްވާ، މިނިސްޓްރީގެ މެންޑޭޓުގައިވާ ކަންކަން ނިންމެވުމުގައި ފަސްޖެހުމެއްނެތި އަމަލީ ގޮތުން އެކަންކަމުގައި ބައިވެރިވެވަޑައިގެން ރަށްރަށުގެ ކައުންސިލްތަކާއި ގާތްގުޅުމެށް ބާއްވަމުން ގެންދަވާ ވެރިއެއްގެ އިރުޝާދުގެ ދަށުން މިނިސްޓްރީގެ ދުވެލި އިތުރަށް ދެ ގިއަރު ކުރިއަށް ޖައްސާލިތަން ފެނިގެންދިއުމެވެ. ވަޒީރު ޑރ. ޢަބްދުﷲ މުއްޠަލިބް ގެ ލަފަޔާއި އިރުޝާދާއި އެއްގޮތަށް މިނިސްޓްރީ ދިޔައީ ދުވަހުން ދުވަހަށް ނިންމަންޖެހޭ ކަންކަން އޭގެ އެންމެ ފުރިހަމަ ގޮތުގައި ނިންމުމަށް ރެއާއި ދުވާލު ކެނޑިނޭޅި މަސައްކަތް ކުރަމުންނެވެ.  

މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ މަސައްކަތްތަކަށް އެއް އަހަރު ވެގެންދިޔައިރު މިވުޒާރާއަށް ދިމާވި އެންމެ ބޮޑު ގޮންޖެހުމަކީ، ނިމިދިޔަ ސަރުކާރުން ފެށުމަށްފަހު އެކި ސަބަބުތަކާއިހުރެ  ހުއްޓާލާފައިވާ ޕްރޮޖެކްޓްތައް އަލުން އަނބުރާ ކުރިއަށް ގެންދިއުމުގައި ދިމާވި ބަޖެޓުގެ ތާށިކަމެވެ. ނަމަވެސް، މިކަމުގެ ސަބަބުން އަލަށް މިނިސްޓްރީ ހިންގުމާއި ހަވާލުވެވަޑައިގަތް މެނޭޖްމަންޓްގެ ދުވެއްޔަކަށް ކުޑަވެސް ބަދަލެއް ނާދެއެވެ. ފެށިފައިވާ ޕްރޮޖެކްޓްތައް ނިންމުމަށް ޚާއްޞަ ސަމާލުކަމެއް ދެއްވައިގެން، ސަރުކާރަށް އަހަރެއް ވެގެން ދިޔައިރު، މި މަންޒަރުތައް ރަށްރަށުގެ ބަނދަރުމަތިންނާއި ތޮށިގަނޑުންނާއި ހިއްކި ސަރަހައްދުތަކުން އޮތީ ފެންނާށެވެ. 17 ނޮވެންބަރު 2024 އާ ހަމައަށް، އެކީ އެކައްޗަކަށް ނިންމާލެވިފައިވާ 38 މަޝްރޫޢެއް ފެންނަން އެބަ އޮތެވެ. މި މަޝްރޫޢުތަކުގެ ޖުމްލަ އަގު 1.976 ބިލިއަނާ ގާތަށް އަރައެވެ. މިގޮތުން ކުރުގޮތަކަށް އަލިއަޅުވާލާއިރު، ސަރުކާރަށް މިވީ އެއް އަހަރު ތެރޭ ގދ. ތިނަދޫ މަގުހެދުމުގެ މަޝްރޫޢު އެއްކޮށް ވަނީ ނިންމާލެވިފައެވެ. އައްޑޫ މަގުހެދުމާއި ފެންހިންދާ ނިޒާމުގެ މަޝްރޫޢުގެ ފިޒިކަލް މަސައްކަތުގެ %94.5 ވަނީ ނިމިފައެވެ. އަދި ނ. މާފަރުގައި ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢު ވަނީ އެކީ ނިމިފައެވެ. މީގެ އިތުރުން ގޮނޑުދޮށް ހިމާޔަތްކުރުން ނުލައި، ޖުމްލަ 11 ރަށެއްގެ ބިންހިއްކުމުގެ މަޝްރޫޢު ވަނީ އަދާ ހަމައަށް ނިންމާލެވިފައެވެ. ބަނދަރު ހެދުމަށް ބަލާއިރު، މ. މުލި، އއ. މާޅޮސް، އއ. ތޮއްޑޫ އަދި އދ. ފެންފުށީގެ ބަނދަރު ހެދުމުގެ މަޝްރޫޢު އެކީ ނިމިފައިވާކަން ފާހަގަކޮށްލެވެއެވެ. ފެނާއި ނަރުދަމާގެ ޖުމްލަ 29 މަޝްރޫޢެއްގެ މަސައްކަތް ވަނީ ނިންމާލެވިފައެވެ. މީގެ އިތުރުން، ޑިސެންބަރު މަހުގެ ނިޔަލަށް ނިމޭނެކަމަށް ލަފާކުރެވޭ އިތުރު 26 މަޝްރޫޢެއްވެސް ހިމެނިފައިވެއެވެ. 

ދިވެހި އެންމެހައި ރައްޔިތުންގެ ސަމާލުކަން މިވަގުތު އެކަމަކަށް ހުއްޓިފައި އޮތް ތިލަމާލެ ބްރިޖުގެ މަސައްކަތްތައްވެސް ބާރު ސްޕީޑުގައި ކުރިއަށްދާކަން ފާހަގަކުރެވެއެވެ. މިގޮތުން 2023 ވަނަ އަހަރުގެ އޮކްޓޫބަރު މަހާ ހަމައަށް މި މަޝްރޫޢުގެ ނިމިފައިވަނީ %28.7 އެވެ. އަދި 2024 ވަނަ އަހަރުގެ އަދާހަމައަށް ބަލާއިރު، މުޅިއެކު %46.58 ވަނީ ނިންމާލެވިފައެވެ. މިއީ ނިމިދިޔަ ސަރުކާރުން 5 އަހަރުދުވަހުގެ ތެރޭ ކުރިމަސައްކަތާއި އަޅާބަލާއިރު ވަރަށްވެސް ބޮޑު ކުރިއެރުމެއްކަން ފާހަގަކޮއްލެވެއެވެ. ހަމަ މިބީދައިން ގުޅީފަޅު ބިންހިއްކުމުގެ މަޝްރޫޢު މިހާރު ވަނީ އެކީ އެކައްޗަކަށް ނިންމާލެވިފައެވެ. މީގެ އިތުރުން މިނިސްޓްރީގެ އެހެނިހެން މަސައްކަތްތަކުގެ ތެރޭގައި އެކި ރަށްރަށުގެ ކައުންސިލްތަކާއި ބައްދަލުކޮށް، އެ ރަށްރަށުގައި ހިންގޭ މަޝްރޫޢުތަކާ ގުޅޭގޮތުން މަޝްވަރާކޮށް، ރަށުގެ ތަރައްޤީއަށް ކުރެވެން ހުރި ކަންކަމާ ބެހޭގޮތުން މަޢުލޫމާތު ހިއްސާކުރެވެއެވެ. މިފަދަ ބައްދަލުވުންތަކުގައި މިނިސްޓަރ ޑރ. މުއްޠަލިބް އަމަލީ ގޮތުން ބައިވެރިވެވަޑައިގެން ކައުންސިލްތަކާއި ވަރަށް ގާތް ގުޅުމެއް ބަހައްޓަވައި، ކައުންސިލުން އެދޭ ކަންކަމަށް އަވަސް ހައްލެއް ހޯއްދަވައިދެއްވުމުގައި މަސައްކަތްފުޅު ކުރައްވައެވެ. އަދި ބައްދަލުވުންތަކާއި ގުޅޭ އެންމެހާ ތަފްސީލުތައް މިނިސްޓްރީގެ މީޑިއާ ޕްލެޓްފޯރމްތަކުގައި ދަނީ ދުވަހުން ދުވަހަށް ޝާއިރުކުރެވެމުންނެވެ.

 ކޮންސްޓްރަކްޝަން މިނިސްޓްރީއަށް އަހަރެއްވުން ފާހަގަކުރާއިރު، ފާހަގަކޮށްލެވޭ އަނެއް ކަމަކީ މާލޭގައި ފެންހިންދުމުގެ ނިޒާމު ހަރުދަނާ ކުރުމުގެ ގޮތުން މިނިސްޓްރީގެ ބެލުމުގެ ދަށުން ޤާއިމުކުރެވުނު ސްޓޯމްވޯޓަރ ސިސްޓަމްތަކެވެ. މީގެ ސަބަބުން މާލޭގެ މަގުތައް ރަނގަޅު ފެންވަރަކަށް ހެދެންދެން ރައްޔިތުންނަށް ދިމާވާ ދަތިތައް ކުޑަކުރެވި، ޕަންޕު ބޭނުންކޮށްގެން ފެން ހިންދުމަށް ފަސޭހަވެގެންދާނެކަން މިނިސްޓަރ ޑރ. މުއްތަލިބް ވަނީ ވިދާޅުވެފައެވެ. މީގެ އިތުރުން ސިނަމާލެ ބްރިޖް މޮނިއުމަންޓް ޕާކްވެސް ހުޅުވިގެން ދިޔައީ މި ނިމިދިޔަ މަސްތެރޭގައެވެ. މި ޕާކަކީ ދިވެހިރާއްޖޭގައި ޗައިނާ ސަރުކާރުން މިހާތަނަށް ހިންގި އެންމެ ބޮޑު އުމްރާނީ ތަރައްޤީގެ މަޝްރޫއު، ސިނަމާލެ ބްރިޖުގެ ތަފްސީލުތަކާއި ފޮޓޯތައް އެކުލެވޭގޮތަށް ހެދިފައިވާ ދެޤައުމުގެ ބަދަހި ގުޅުން ރަމްޒު ކޮއްދޭ ވަރަށް ހާއްސަ ޕާކެކެވެ. ހަމައެއާއެކު ޢިމާރާތްކުރުމުގެ ދާއިރާގައި މަސައްކަތްކުރާ ފަރާތްތަކަށް ޚާއްޞަކޮށްގެން ހެދިފައި ހުންނަ ޤާނޫނާއި ގަވާއިދުތަކާއި ގުޅޭގޮތުން މަޢުލޫމާތު ދިނުމަށާއި، އެ ފަރާތްތަކުގެ ހޭލުންތެރިކަން އިތުރުކުރުމަށް މިނިސްޓްރީން އިސްނަގައިގެން މިއަހަރު ތެރޭގައި ކުއާޓަރތަކަށް ބަހާލައިގެން ސިލްސިލާ ޓްރެއިނިންގ ސެޝަންތަކެއް ކުރިއަށް ގެންގޮސްފައެވެ. އެގޮތުން 500 އަށްވުރެ ގިނަ ފަރާތްތަކުން މި ޕްރޮގްރާމުތަކުގައި ބައިވެރިވެފައިވާކަން މިނިސްޓްރީއިން ފާހަގަކުރެވެއެވެ. މިކަމުގެ ސަބަބުން ޢިމާރާތްކުރުމުގެ ދާއިރާގައި ދިމާވާ ގޮންޖެހުންތައް މަދުކުރެވި، ރައްކާތެރި އަދި ފެންވަރު ރަނގަޅު ޢިމާރާތްތައް ބިނާކުރުމަށް ބާރުއެޅިގެންދިޔައެވެ.

 ކޮންސްޓްރަކްޝަން މިނިސްޓްރީގެ ފާއިތުވެދިޔަ 52 ހަފްތާގެ މަސައްކަތްތަކަކީ ޖުމްލަގޮތެއްގައި ދިވެހިރާއްޖޭގެ ތަރައްޤީއަށް އެޅުނު މުހިންމު ފިޔަވަޅުތަކެއް ފެނިގެން ދިޔަ އެއް އަހަރެވެ. ތަފާތު ބޭރުގެ އިންވެސްޓަރުންނާއި ބޭންކުތަކާއި ގުޅުންބަދަހިކުރެވި ރާއްޖެއާއި ބޭރުގެ އެކި ޕްލެޓްފޯރމްތަކުގައި މިނިސްޓަރ ޑރ. މުއްތަލިބް ގެ އިތުރުން މިނިސްޓްރީގެ އެކި ބޭފުޅުންވަނީ ދިވެހިރާއްޖެއާއި މިނިސްޓްރީ ތަމްސީލުކޮއްދެއްވާފައެވެ. ޑރ. ޢަބްދުﷲ މުއްޠަލިބްގެ ހަރުދަނާ ލީޑަރޝިޕްގެ ދަށުން، ގިނަގުނަ ގޮންޖެހުންތަކާއި ކުރިމަތިލައި، އެތައް ކާމިޔާބީތަކެއް މިފާއިތުވެދިޔަ އަހަރުތެރޭ ހާސިލުކުރެވުނު ފަދައިން ކުރިއަށް އޮތް ދުވަސްތަކުގައިވެސް މިނިސްޓްރީގެ އަމާޒަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވަޢުދުފުޅުތަކާއި އެއްގޮތަށް މިނިސްޓްރީގެ ކަންކަން ދުރާލާ ރާވައި ދިވެހި ރައްޔިތުންގެ ލާބަޔާއި މަންފާއަށްޓަކައި ތާވަލު ކުރެވިފައިހުރި ގިނަގުނަ މަޝްރޫއުތައް ހަލުވި ދުވެއްޔެއްގައި ކުރިއަށްގެންގޮސް ނިންމާލުމެވެ.