52 ހަފްތާގެ ތެރޭގައި 50 ކުއްޖަކަށް އާއިލީ ވެއްޓެއް!

ދައުލަތުގެ ބެލުމުގެ ދަށަށް ގެނެވޭ ކުދިންނަށް ދުރު ރާސްތާއެއް ބިނާކޮށް އެކުދިންނަށް ބޭނުންވާ އަޅައިލުމާއި ރައްކާތެރިކަން ފޯރުކޮށްދިނުމުގައި، ޢާއިލާއަކީ މުޖުތަމަޢުގެ އެންމެ އަސާސީ އިޖުތިމާޢީ ބައިކަމަށް ދެކި، އަދި އެއީ އެކުދިންގެ ރައްކާތެރިކަމަށާއި، ދުޅަހެޔޮކަމަށާއި، ހެދިބޮޑުވުމަށް އެންމެ އެކަށީގެންވާ ޠަބީޢީ މާޙައުލުކަމަށް ދެކި، އެކުދިންގެ ޢާއިލާއަށް އަނބުރާ ފޮނުވެން އޮންނަ ހާލަތްތަކުގައި އެ ކުދިންގެ ޢާއިލާއަށް އަނބުރާ ފޮނުވުމަށް ޚާއްސަ އިސްކަމެއް ދީގެން، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ފާއިތުވި 1 އަހަރު ދުވަސް ތެރޭގައި ވަނީ ގިނަ މަސައްކަތްތަކެއް ކޮށްފައެވެ.

އަދި ޢާއިލާއަށް އަނބުރާ ފޮނުވެން ނެތް ހާލަތްތަކުގައި ފޮސްޓަރ ނިޒާމުގެ ތެރެއިން އެކުދިން ފޮސްޓަރކުރެވޭނެ ނިޒާމެއްވަނީ ގާއިމުކުރެވިފައެވެ. ވަގުތީ ފޮސްޓަރިންގ ދަށުން ކުދިން ފޮސްޓަރކުރުމުގެ އުސޫލުތައްވަނީ ކަނޑައެޅި، ވަގުތީ ހާލަތެއް މެދުވެރިވެގެން ދައުލަތުގެ ބެލުމުގެދަށަށް ނެގޭ ކުދިންނަށް އެކުދިން ޢާއިލާއަށް އަނބުރާ ރުޖޫއަވެންދެން ޢާއިލީ މާހައުލެއް ހޯދައިދިނުމުގެ ފުރުޞަތުވަނީ ފަހިވެގެންގޮސްފައެވެ.

ގަވާއިދު ނަންބަރުR-17/2024 (ދައުލަތުގެ ބެލުމުގެ ދަށަށް ގެންނަ ކުދިން ފޮސްޓަރކުރުމާބެހޭ ގަވާއިދު) ވަނީ ގެޒެޓްކުރެވިފައެވެ. އަދި ފޮސްޓަރިން ނިޒާމުގެ ތެރެއިން ވަގުތީގޮތުން ކުދިން ފޮސްޓަރކުރުމަށް ހޭލުންތެރިކުރުމުގެ ގޮތުން މުޖުތަމަޢުއަށާއި ދައުލަތުގެ މުއައްސަސާތަކަށް މަޢުލޫމާތު ސެޝަންތައް ކުރިއަށް ގެންދެވިފައިވެއެވެ. މިގޮތުން، ދަޢުލަތުގެ މުއައްސަސާތަކަށް ހިންގުނު 8 މަޢުލޫމާތު ސެޝަންގައި 260 ބައިވެރިން ބައިވެރިވެފައިވެއެވެ.

އެއާއެކު، އާންމު ތިން ފަރާތަކުން ވަގުތީ ފޯސްޓަރިން އެޕްލިކޭޝަން ހުށަހަޅާފައިވެއެވެ. އަދި ރައްކާތެރިކަން ކަށަވަރުކުރުމަށް ދައުލަތުގެ ބެލުމުގެ ދަށަށް ގެނެވިފައިވާ ކުދިންގެ ތެރެއިން 17 ނޮވެމްބަރ 2023 އިން ފެށިގެން މިއަދުގެ ނިޔަލަށް 50 ކުއްޖަކަށް ޢާއިލީ ވެއްޓަކަށް ރުޖޫޢަވެ ދިރިއުޅުމުގެ ފުރުޞަތު ފަހިކޮށްދެވި، 25 އިތުރު ކުއްޖަކަށް މިފުރުޞަތު ގާއިމްކޮށްދިނުމުގެ މަސައްކަތްދަނީ ކުރެވެމުންނެވެ.