އިއުލާން: މަސްވެރިންގެ ދުވަހުގެ މުނާޞަބަތުގައި ބާއްވާ ފަރުމަސްވެރިކަމުގެ މުބާރާތުގައި ބައިވެރިވުމުގެ ފުރުޞަތު ހުޅުވާލައިފި

މިއަހަރުގެ މަސްވެރިންގެ ދުވަސް ފާހަގަ ކުރުމުގެ ގޮތުން މި މިނިސްޓްރީ އިން ކުރިއަށްގެންދާ ޚަރަކާތްތަކުގެ ތެރޭގައި ފަރުމަސްވެރިކަމުގެ މުބާރާތެއް ބޭއްވުމަށް ވަނީ ހަމަޖެހިފައެވެ. މިމުބާރާތް ކުރިއަށް ގެންދިއުމަށް ހަމަޖެހިފައިވަނީ 6 ޑިސެމްބަރު 2024 ގައެވެ. މި މުބާރާތަކީ ސަރުކާރުގެ މުވައްސަސާތަކާއި ކުންފުނިތަކުގެ ދަށުން ރަޖިސްޓަރކޮށްފައިވާ ނުވަތަ އަމިއްލަގޮތުން ރަޖިސްޓަރކޮށްފައިވާ ޖަމްޢިއްޔާ ޖަމާޢަތްތަކަށް ހުޅުވާލައިގެން ބާއްވާ މުބާރާތެކެވެ. ފަރުމަސްވެރިކަމުގެ މުބާރާތާގުޅޭ ޢާންމު ޤަވާއިދު މި އިޢުލާނާ އެއްކަރުދާސް ކުރެވިފައިވާނެއެވެ.

ވީމާ، މި މުބާރާތުގައި ބައިވެރިވާން އެދޭ ފަރާތްތަކުން 24 ނޮވެމްބަރު 2024 ވާ އާދިއްތަ ދުވަހުގެ 12:00 ގެ ކުރިން އެއްކަރުދާސްކުރެވިފައިވާ ޢާންމު ޤަވާއިދުގައިވާ ލިންކު މެދުވެރިކޮށް ގޫގުލް ފޯމް ފުރިހަމަ ކުރުމަށް ދަންނަވަމެވެ. އަދި މިކަމާ ގުޅޭ އިތުރު މަޢުލޫމާތު ބޭނުންފުޅުނަމަ 3339225 / 3339270 އާ ގުޅުއްވުން އެދެމެވެ.

އިއުލާން: https://fisheries.gov.mv/dv/media/announcements/47

އޕްލިކޭޝަން ފޯމް: https://forms.gle/yQv69Woz2449qL3T8

ފަރުމަސްވެރިކަމުގެ މުބާރާތާގުޅޭ އާއްމު ގަވާއިދު

މިއީ 2024 ވަނަ އަހަރުގެ މަސްވެރިންގެ ދުވަހުގެ މުނާސަބަތުގައި މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް (މީގެފަހުން "މިނިސްޓްރީ" ކަމުގައި ބަޔާންކޮށްފައިވާ) އިން އިންތިޒާމުކޮށްގެން ބޭއްވުމަށް ހަމަޖެހިފައިވާ ފަރުމަސް ބޭނުމުގެ މުބާރާތެކެވެ.

1 މަޤުޞަދު

މިއީ ވާދަވެރި މާހައުލެއްގައި މަސްވެރިކަން ކުރުމާއި ދިވެހިރާއްޖޭގެ މަސްވެރިންގެ ދުވަސް ކުލަގަދަކޮށް ފާހަގަކުރުމުގެ ބޭނުމުގައި މިނިސްޓްރީން ކުރިއަށްގެންދާ 1 (އެކެއް) ދުވަހުގެ ފަރުމަސް ބޭނުމުގެ މުބާރާތެކެވެ.

2 މުބާރާތް ބާއްވާ ތާރީޚާއި ގަޑި

2.1 މި މުބާރާތް ބޭއްވުމަށް ހަމަޖެހިފައިވަނީ 06 ޑިސެމްބަރ 2024 ވާ ހުކުރު ދުވަހުގެ މެންދުރުފަހު 15:00 އިން ފެށިގެން އެދުވަހުގެ ރޭގަނޑު 21:00 އަށެވެ.

2.2 މި މުބާރާތުގެ ފެށުމުގެ ރަސްމިއްޔާތާއި ނިމުމުގެ ރަސްމިއްޔާތު އޮންނާނީ ހުޅުމާލޭ ފެރީ ޓާމިނަލް ސަރަހައްދުގައެވެ.

3 މުބާރާތުގައި ބައިވެރިވުން

3.1 މި މުބާރާތަކީ ސަރުކާރުގެ މުވައްސަސާތަކާއި ކުންފުނިތަކުގެ ދަށުން ރަޖިސްޓަރކޮށްފައިވާ ނުވަތަ އަމިއްލަގޮތުން ރަޖިސްޓަރކޮށްފައިވާ ޖަމްޢިއްޔާ ޖަމާޢަތްތަކަށް ހުޅުވާލައިގެން ބާއްވާ މުބާރާތެކެވެ.

3.2 މި މުބާރާތުގައި ބައިވެރިވުމުގެ ފުރުސަތު ދެވޭނީ ފުރަތަމަ ފޯމު ހުށަހަޅާ ފަރާތްތަކުގެ ތެރެއިން ޝަރުތު ހަމަވާ 20 (ވިހި) ޓީމަށެވެ.

3.3 މި މުބާރާތުގައި ބައިވެރިވުމަށްޓަކައި، މުބާރާތުގައި ބައިވެރިވުމަށް އެދޭ ފޯމު https://forms.gle/TqLTSFDkitcsfCru9 ފުރިހަމަކޮށް، ފޯމާއެކު ހުށަހަޅަންޖެހޭ ލިޔުންތަކާއެކު މިނިސްޓްރީއަށް ހުށަހަޅަންވާނެއެވެ.

3.4 މިގޮތުން، ހުށަހަޅާ ލިޔެކިޔުންތައް މިނިސްޓްރީގެ ފަރާތުން ބެލުމަށްފަހު، ޝަރުތު ހަމަވާ 20 (ވިހި) ޓީމަށް ލިޔުމުން އެކަން އަންގަންވާނެއެވެ. މިގޮތަށް ލިޔުމުން އަންގާތާ 3 (ތިނެއް) ދުވަހުގެ ތެރޭގައި، ޝަރުތު ހަމަވާ ޓީމުތަކުން މުބާރާތުގެ ރަޖިސްޓްރޭޝަން ފީގެ ގޮތުގައި ދައްކަންޖެހޭ 1000/- (އެއްހާސް ރުފިޔާ) މިނިސްޓްރީން ކަނޑައަޅާ ގޮތެއްގެމަތިން ދައްކަންވާނެއެވެ. މި މުއްދަތުގެ ތެރޭގައި ފައިސާ ނުދައްކާ ޓީމުތައް މުބާރާތުގައި ބައިވެރިނުވާކަމަށް ކަނޑައަޅާ، އެ ފުރުސަތު އެހެން ޓީމަކަށް ދިނުމުގެ އިޚްތިޔާރު މިނިސްޓްރީއަށް ލިބިގެންވެއެވެ.

މުބާރާތުގެ ރަޖިސްޓްރޭޝަން ފީގެ ގޮތުގައި ދައްކަންޖެހޭ 1000/- (އެއްހާސް ރުފިޔާ) ދެއްކުމުން، އެ ޓީމުން މުބާރާތުގައި ބައިވެރިވުމުގެ ފުރުސަތު ދިންކަން ލިޔުމުން މިނިސްޓްރީން އަންގަންވާނެއެވެ.

4 މުބާރާތުގައި ބައިވެރިވާ ޓީމުތައް

4.1 މުބާރާތުގައި ބައިވެރިވާ ޓީމުތަކުގައި ދެ ޖިންސުގެ ބައިވެރިންވެސް ހިމެނިދާނެއެވެ.

4.2 ކޮންމެ ޓީމެއްގައި މެނޭޖަރެއް ހިމެނޭހެން 13 (ތޭރަ) މެންބަރުންނަށްވުރެ ގިނަވެގެން ނުވާނެއެވެ. މި 13 (ތޭރަ) މެންބަރުންގެ ތެރޭގައި ފަޅުވެރިން ނުހިމެނޭނެއެވެ. ދޯނީގެ ފަޅުވެރިން ފިޔަވައި ޓީމުގެ ހުރިހާ މެންބަރުންނަށްވެސް މަސްބޭނުމުގައި އަމަލީ ގޮތުން ބައިވެރި ވެވޭނެއެވެ.

5 ޓީމުގެ ނަން

5.1 ޓީމުތަކަށް ކިޔާ ނަންތަކަކީ އޮފީސް، ކުންފުނި، ޖަމިއްޔާ ޖަމާޢަތް ނުވަތަ ބްރޭންޑެއްގެ ނަން ރަމްޒުކޮށްދޭ ނަމަކަށް ހެދިދާނެއެވެ.

5.2 އެއްވެސް ކަހަލަ ސްޕޮންސަރެއްގެ ނަން ރަމްޒުކޮށްދޭ ނަމެއް ޓީމަކަށް ނުކިޔޭނެއެވެ.

5.3 ސިޔާސީ އެއްވެސް ޕާޓީއެއްގެ ނަމުގައި ޓީމެއް ނުނެރެވޭނެއެވެ.

5.4 މުބާރާތުގައި ބައިވެރިވާން އެދޭ ޓީމުތަކުން ހުށަހަޅާ ނަމަކީ، ޓީމަކަށް ކިޔުން އެކަށީގެންވާ ނަމެއް ނޫންކަމަށް މިނިސްޓްރީއަށް ޤަބޫލުކުރެވޭ ހާލަތެއްގައި އެކަން އެ ޓީމަކަށް އަންގައި އެ ނަން ބަދަލު ކުރުމުގެ ފުރުސަތު ދެވޭނެއެވެ. މިގޮތަށް ދެވޭ ފުރުސަތުގައި ނަން ބަދަލު ކޮށްފައި ނުވާނަމަ، އެ ޓީމެއް ޝަރުތު ހަމަނުވާކަމަށް ކަނޑައަޅައި، މުބާރާތުގައި ބައިވެރި ނުކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ.

5.5 މުބާރާތުގައި ބައިވެރިވާ އެއްވެސް ޓީމަކުން މުބާރާތުގެ ތެރޭގައި އެއްވެސް ފަރާތެއްގެ އަބުރާ ބެހި، އަޚްލާޤީގޮތުން ދަށް ފެންވަރުގެ ބަސް ބޭނުންކޮށް ނުވަތަ ޙަރަކާތެއް ދައްކައިގެން ނުވާނެއެވެ. މިފަދައިން ޢަމަލުކުރާ ޓީމުތައް މުބާރާތުން ވަކިކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ.

6 ބައިވެރިކުރާ އުޅަނދުގެ މައުލޫމާތު

6.1 މުބާރާތުގައި ބޭނުންކުރާ އުޅަނދަކީ ކަނޑުދަތުރު ފަތުރުކުރުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގައި ރަޖިސްޓްރީ ކޮށްފައިވާ އުޅަނދަކަށް ވާންވާނެއެވެ.

6.2 މުބާރާތުގައި ބޭނުންކުރާ އުޅަނދަކީ ސިއްޙީ އަދި ސަލާމަތީ ގޮތުން ސަރުކާރުން ހަދާފައިވާ ގަވާއިދުތަކާއި ކަނޑައަޅާ މިންގަނޑުތަކަށް ފެތޭ އުޅަނދަކަށް ވާންވާނެއެވެ.

6.3 މުބާރާތް އިންތިޒާމްކުރާ ފަރާތުން ބަލަން ބޭނުންވެއްޖެ ހިނދެއްގައި ދޯނީގެ ސަލާމަތީ ސެޓްފިކެޓާއި، ދޯނީގެ ކެޕްޓަންގެ ކަނޑު ދަތުރު ކުރުމުގެ ލައިސަންސާއި އެ ދޯނިން ދަތުރުކުރެވޭ މީހުންގެ ޢަދަދު އަންގައިދޭ ރަސްމީ ލިޔުން ދައްކަންވާނެއެވެ.

6.4 މުބާރާތުގައި ބޭނުންކުރާ އުޅަނދަށް އެރޭނީ ޓީމުގެ މެންބަރުންނާއި، އުޅަނދުގެ ފަޅުވެރިންގެ އިތުރުން ކެމެރާ ކްރޫއާއި މިނިސްޓްރީގެ އޮފިޝަލުންނަށެވެ.

6.5 ކޮންމެ ޓީމަކުންވެސް މުބާރާތުގައި ބޭނުންކުރާ އުޅަނދު، މުބާރާތް ބާއްވާ ދުވަހުގެ މިނިސްޓްރީން ކަނޑައަޅާ ވަގުތެއްގައި މަހަށް ފުރަން ކަނޑައަޅާ ސަރަހައްދަށް ގެންދަން ވާނެއެވެ. މުބާރާތުގައި ބައިވެރިވާ އެއްވެސް ޓީމެއްގެ އުޅަނދެއް ކަނޑައަޅާފައިވާ ވަގުތަށްވުރެ ލަސްވެއްޖެނަމަ، އެ ޓީމެއް މުބާރާތުން ވަކިކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ.

6.6 މުބާރާތުގައި ބޭނުންކުރާ އުޅަނދާއި މަސްވެރިކަމަށް ބޭނުންކުރާ ބުޅި، ކަންވާރު، އަންގި އާއި އެހެނިހެން ތަކެތި އަދި ކެއިން ބުއިމަށް ބޭނުންކުރާ ހުރިހާ އެއްޗެއް ހޯދަންޖެހޭނީ އެ ޓީމެއްގެ ފަރާތުންނެވެ.

7 ބައިވެރިން މަހަށް ފުރުމާއި އެނބުރި އައުން

7.1 މުބާރާތުގައި ބައިވެރިވާ ޓީމުތައް މަހަށް ފުރުމަށާއި އެނބުރި އައުމަށް ކަނޑައެޅޭ ވަގުތާއި ތާރީޚު އަދި ތަން މިނިސްޓްރީން ޓީމުތަކަށް އަންގަންވާނެވެ.

7.2 މިގޮތުން ކަނޑައެޅޭ ވަގުތަށްވުރެ ކުރިން އަނބުރާ އަންނަން ބޭނުންވާ އުޅަނދުފަހަރަށް އެކަމަށް ޚާއްސަކުރެވިފައިވާ ސަރަޙައްދަށް ލެފިދާނެއެވެ.

7.3 ކޮންމެ ޓީމަކުންވެސް އެނބުރި އަންނަންވާނީ އެ ޓީމެއް މަހަށްދިޔަ އުޅަނދުގައެވެ. އެއްވެސް ސަބަބަކާހުރެ ކަނޑައަޅާފައިވާ ވަގުތަށް ޓީމެއް އެނބުރި ނައިސްފިނަމަ އެ ޓީމެއް ޑިސްކޮލިފައި ވާނެއެވެ.

7.4 މުބާރާތުގައި މަސްބޭނުމަށް އެމުގެ ގޮތުގައި ރާއްޖޭގައި ބޭނުންކުރުން ހުއްދަ ކޮންމެ ބާވަތެއްގެ އެމެއް ބޭނުން ކުރެވިދާނެއެވެ. އަދި މީގެ އިތުރުން ވަދު، ޕޮޕަރު ނުވަތަ ޖިގު ފަދަ ތަކެތިވެސް އެމުގެ ގޮތުގައި ބޭނުންކުރެވިދާނެއެވެ.

7.5

7.6 މި މުބާރާތުގައި އެމުގެ ގޮތުގައި ދިރޭ އެން ބޭނުންކުރުމަކީ މަނާކަމެކެވެ.

އެއްވެސް ޓީމަކަށް މަހަށް ފުރޭނީ ޓީމުގައި ހިމެނޭ 13 (ތޭރަ) މެންބަރުންގެ ތެރެއިން މަދުވެގެން 11 (އެގާރަ) މެންބަރުން ހަމަވާނަމައެވެ.

8 މުބާރާތުގައި ކުރުން މަނާ ކަންތައްތައް

8.1 ރާއްޖޭގެ ޤާނޫނުތަކާއި ގަވާއިދުތަކުގެ ދަށުން ހިފުން، ބޭނުން، ނެގުން، މެރުން މަނާ ބާވަތްތަކުގެ އެން ބޭނުންކުރުން.

8.2 ރާއްޖޭގެ ޤާނޫނުތަކާއި ގަވާއިދުތަކުގެ ދަށުން މަނާ ބާވަތްތަކުގެ މަސް ހިފުން ނުވަތަ ބޭނުން ނުވަތަ ނެގުން ނުވަތަ މެރުން.

8.3 ދޯނީގެ ފަޅުވެރިން މަސްވެރިކަމުގެ އެއްވެސް ހަރަކާތެއްގައި ބައިވެރިވުން.

8.4 ދިވެހިރާއްޖޭގައި ހަދާފައިވާ އެއްވެސް ގާނޫނަކުން މަނާ ކޮށްފައިވާ ނުވަތަ ހިމާޔަތްކޮށްފައިވާ ކަނޑުގެ އެއްވެސް ސަރަހައްދަކުން މަސްވެރިކަން ކުރުން.

8.5 މަހުގެ ސައިޒުގެ ގޮތުން (ބޮލުން ފެށިގެން ނިގުލަށް) 8 (އަށެއް) އިންޗިއަށް ވުރެ ކުދި މަސް ވީހާވެސް ގެއްލުން ކުޑަވާގޮތެއްގެ މަތިން ދޫކޮށްލަން ވާނެއެވެ.

9 ވީޑިއޯ ކުރުމާއި އިންޓަވިއު ނެގުން

9.1 މަސްވެރިކަން ކުރާ އުޅަނދުގައި ކުރާ ހުރިހާ ކަމެއް ފޮޓޯ އަދި ވީޑިއޯ ކުރުމުގެ އިޚްތިޔާރު މިނިސްޓްރީއިން ހުއްދަދޭ ކޮންމެ ފަރާތަކަށް ލިބިގެންވެއެވެ.

10 ޓީމުތަކުން ބޭނުންކުރާ ޖާރޒީ އަދި ޓިޝާރޓް

10.1 ޓީޝާޓް ނުވަތަ ޖާޒީއެއް ބޭނުން ކުރާނަމަ ކޮންމެ ޓީމަކުން ބޭނުން ކުރަންވާނީ އެއް ކުލައެއްގެ ޓީޝާޓެވެ.

11 މުބާރާތުގައި ޕޮއިންޓް ދިނުމަށް ހަމަޖެހިފައިވާ އުސޫލު

11.1 މުބާރާތުގައި ބައިވެރިވާ ޓީމުތަކަށް ޕޮއިންޓްސް ދިނުމުގައި ބަލާނީ، ބޭނިމަސް ނިސްބަތްވާ ކެޓަގަރީއާއި ބަރުދަނަށެވެ.

11.2 އެގޮތުން ކޮންމެ ކެޓަގަރީއަކުން ބޭނިމަހުގެ ބަރުދަން ގުނާ ކެޓަގަރީ ޕޮއިންޓް އަކީ ކެޓަގަރީއަށް ލިބުނު ޖުމްލަ ޕޮއިންޓެވެ.

11.3 ޢާއްމު މަހުގެ ގޮތުގައި ނުހިމެނޭ، ކަޅުވެން ފަދަ އެއްވެސް ދިރުމެއް މަހުގެ ގޮތުގައި ރަޖިސްޓްރީއެއް ނުކުރެވޭނެއެވެ.

11.4 މަހުގެ ސައިޒުގެ ގޮތުން (ބޮލުން ފެށިގެން ނިގުލަށް) 8 (އަށެއް) އިންޗިއަށް ވުރެ ކުދި މަސް ޕޮއިންޓް ދިނުމުގައި ނުގުނޭނެއެވެ. އެހެންނަމަވެސް، ސައިޒުގެ ގޮތުން (ބޮލުން ފެށިގެން ނިގުލަށް) 8 (އަށެއް) އިންޗިއަށް ވުރެ ކުދި ގިނިމަސް މި ނުކުތާއިން އިސްތިސްނާވާނެއެވެ.

11.5 މުބާރާތުގައި ބަލާ ކެޓަގަރީތަކާއި ކެޓަގަރީގައި ހިމެނޭ މަހުގެ ބާވަތްތައް

11.5.1 ކެޓެގަރީ 1 (ރަތްމަސް، ފިލޮޅު، ގިޔުޅު، ހިބަރު، ކުރުމަސް އަދި ހަނދި)

11.5.2 ކެޓެގަރީ 2 (ތޮޅި، ގިނިމަސް، މާނިޔާމަސް، ފޮނިޔަމަސް އަދި ފާނަ)

11.5.3 ކެޓެގަރީ 3 (އެހެނިހެން)

11.6 ޕޮއިންޓްސް ދޭނެ ގޮތް ތިރީގައި މިވަނީއެވެ.

11.6.1 ކެޓެގަރީ 1 (ކޮންމެ ކިލޯއަކަށް 20.00 ޕްއިންޓް)

11.6.2 ކެޓެގަރީ 2 (ކޮންމެ ކިލޯއަކަށް 10.00 ޕްއިންޓް)

11.6.3 ކެޓެގަރީ 3 (ކޮންމެ ކިލޯއަކަށް 5.00 ޕްއިންޓް)

13 މުބާރާތުގައި ހޮވާ ވަނަތައް

13.1 މުބާރާތުގައި ވަނަދިނުމަށް ހަމަޖެހިފައިވަނީ ތިރީގައި ބަޔާންކޮށްފައިވާ ކެޓަގަރީ ތަކަށެވެ.

13.1.1 މުބާރާތުގެ 1 ވަނަ ޓީމް (25,000 ރުފިޔާގެ ފައިސާގެ އިނާމު)

13.1.2 މުބާރާތުގެ 2 ވަނަ ޓީމް (20,000 ރުފިޔާގެ ފައިސާގެ އިނާމު)

13.1.3 މުބާރާތުގެ 3 ވަނަ ޓީމް (15,000 ރުފިޔާގެ ފައިސާގެ އިނާމު)

13.1.4 އެންމެ ބަރުމަސް ބޭނި ފަރާތް (2,000 ރުފިޔާގެ ފައިސާގެ އިނާމު)

14 ޖަޖުންނާއި އޮފިޝަލުން

14.1 މިމުބާރާތުގައި އޮފިޝަލުންގެ ގޮތުގައި ހަރަކާތްތެރިވާނީ މިނިސްޓްރީގެ ފަރާތުން އެކަމަށް އައްޔަންކޮށްފައިވާ ފަރާތްތަކުންނެވެ.

14.2 ޖަޖުންގެ ޕެނަލްގައި ހަރަކާތްތެރިވާނީ މިނިސްޓްރީން ކަނޑައަޅާ 3 (ތިނެއް) ފަރާތަކުންނެވެ.

14.3 ޖަޖުކުރުމުގެ ތެރޭގައި މި ގަވާއިދުގައި ނުހިމެނޭ ކަމެއް ދިމާވެއްޖެނަމަ އެކަން ޙައްލުކުރާނީ ޖަޖުންގެ މެދުގައި މަޝްވަރާކުރުމަށްފަހު ނަގާ ވޯޓަކުންނެވެ.

15 މުބާރާތުގައި ބައިވެރިވާ އެއްވެސް ފަރާތަކުން މަސްވެރިކަމުގައި އެއްވެސް މަކަރެއް ނުވަތަ އޮޅުވާލުމުގެ ގޮތުން ކަމެއް ކޮށްފައިވާކަމަށް މިމުބާރާތުގެ ޖަޖުންނަށް ޤަބޫލުކުރެވިއްޖެނަމަ، އެފަރާތެއް މި މުބާރާތުން ވަކިކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ.

16 މި ގަވާއިދުގައި ނުހިމެނޭ ކަމެއް ދިމާވެއްޖެނަމަ، އެކަމެއް ޙައްލުކުރާނީ މިނިސްޓްރީންނެވެ.

17 މި ގަވާއިދަށް އުނިއިތުރު ގެނައުމުގެ ނުވަތަ މި ގަވާއިދު އިސްލާޙުކުރެވޭނީ މިނިސްޓްރީއަށެވެ.