ރާއްޖެއިން ބަންގަލްދޭޝްއަށް ކަނޑައަޅުއްވާފައިވާ ސަފީރު ބަންގްލަދޭޝްގެ ޔޫތް އެންޑް ސްޕޯޓްސް މިނިސްޓްރީގެ އެޑްވައިޒަރާ ބައްދަލުކުރައްވައިފި

ދިވެހިރާއްޖެއިން ބަންގްލަދޭޝްއަށް ކަނަޑައަޅުއްވާފައި ހުންނަވާ ސަފީރު އަލްފާޟިލާ ޝިއުނީން ރަޝީދު، އެގައުމުގެ ޔޫތް އެންޑް ސްޕޯޓްސް މިނިސްޓްރީގެ އެޑްވައިޒަރ، އާސިފް މަހްމޫދު ޝޮޖިބް ބުއިޔާން އާ ބައްދަލުކުރައްވައިފިއެވެ.

މިބައްދަލުވުމުގައި ސަފީރު ޝިއުނީން ވަނީ ބަންގްލަދޭޝްގެ ވަގުތީ ސަރުކާރުގެ މިނިސްޓްރީ އޮފް ޔޫތް އެންޑް ސްޕޯޓްސްގެ އެޑްވައިޒަރުގެ މަގާމަށް އައްޔަންކުރެއްވުމާއި ގުޅިގެން އެޑްވައިޒަރ އާސިފްއަށް ހޫނު މަރުހަބާއެއް ދަންނަވާފައެވެ. އަދި އެކަމަނާގެ ވާހަކަފުޅުގައި، ދިވެހިރާއްޖެއާއި ބަންގްލަދޭޝްއާ ދެމެދު އޮތް ޒަމާންވީ ގާތްގުޅުމުގެ މައްޗަށް އަލިއަޅުއްވާލައްވާ، މިގުޅުން އިތުރަށް ހަރުދަނާކުރުމަށް މަސައްކަތްކުރައްވާނެކަމަށް ވަނީ ވިދާޅުވެފައެވެ.

މީގެއިތުރުން ކުޅިވަރާއި ޒުވާނުންނާއި ގުޅުންހުރި ދާއިރާތަކުން ގުޅުން ބަދަހިކުރުމަށް ދެގައުމުގެ ދެމެދުގައި ސޮއިކުރެވިފައިވާ އެއްބަސްވުމުގެ ދަށުން ކުރެވިދާނެ ބައެއް މަސައްކަތްތަކާއި ބެހޭގޮތުން ސަފީރު ވާހަކަދެއްކެވިއެވެ. އަދި ބަންގްލަދޭޝްގެ ގައުމީ ފުޓްބޯޅަ ޓީމާއެކު އެކުވެރިކަމުގެ މެޗްތަކެއް ކުޅުމަށް ރާއްޖޭގެ ގައުމީ ފުޓްބޯޅަ ޓީމް ޑާކާއަށް އައުން ފާހަގަކުރައްވައި، ކުޅިވަރުގެ ދާއިރާއިން ރާއްޖެއާއި ބަންގްލަދޭޝްއާ ދެމެދު ޒަމާނުއްސުރެ ގާތްގުޅުމެއް އޮންނަކަން ފާހަގަކުރައްވައި ޝުކުރުއަދާކުރެއްވިއެވެ.

އަދި ރާއްޖޭގައި ކްރިކެޓް ކުރިއެރުވުމަށް ބަންގްލަދޭޝްގެ އެހީތެރިކަން ހޯއްދެވުމަށް ޝައުގުވެރިކަން ފާޅުކުރައްވައި ސަފީރު ދެއްކެވި ވާހަކަފުޅުގައި ބަންގްލަދޭޝްގެ ކްރިކެޓް އިންސްޓިޓިއުޓްތަކުގައި ދިވެހި ޒުވާނުންނަށް ތަމްރީނު ދިނުމުގައި ހުރި ފުރުސަތުތަކާއި ބެހޭގޮތުން ވަނީ މަޝަވަރާކުރައްވާފައެވެ.

އެޑްވައިޒަރ އާސިފް މަހްމޫދު ޝޮޖިބް ބުއިޔާން ވަނީ ކުޅިވަރުގެ ދާއިރާއިންނާއި ޒުވާނުން ބާރުވެރިކުރުމަށް ބަންގްލަދޭޝްއިން ދިވެހިރާއްޖެއަށް އެހީތެރިކަން ފޯރުކޮށްދެއްވާނެކަމަށް ވިދާޅުވެފައެވެ. އަދި، ސަރަހައްދީ ގައުމުތަކުގެ ކުޅިވަރާއި ޒުވާނުންގެ ކުރިއެރުމާ ގުޅޭ އެންމެހާ ކަންކަމުގައި ވެވެން އޮތް އެހީތެރިކަމެއް ފޯރުކޮށްދިނުމަކީ ބަންގްލަދޭޝުން އަހަންމިއްޔަތުކަންދޭ ކަމެއްކަމުގައި ވަނީ ވިދާޅުވެފައެވެ.