ދިވެހި ޤައުމިއްޔަތުގެ އިސްވަރުގެ އޮފީސް ރަސްމީކޮށް ހުޅުއްވައި ދެއްވައިފި.

ދިވެހި ޤައުމިއްޔަތުގެ އިސްވަރުގެ އޮފީސް ރަސްމީކޮށް މިއަދު ހުޅުއްވައިދެއްވައިފިއެވެ. މި އޮފީސް ރަސްމީކޮށް ހުޅުއްވައިދެއްވީ ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދެވެ.

ޤައުމީ ދާރުލްއާސާރުގައި ދިވެހި ޤައުމިއްޔަތުގެ އިސްވަރުގެ އޮފީސް ހުޅުވުމަށް މިއަދު ބޭއްވި ރަސްމިއްޔާތުގައި ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމްގެ އިތުރުން 05 އިސްވާރުން ބައިވެރިވެވަޑައިގެންނެވިއެވެ.

މިރަސްމިއްޔާތުގައި ބައިވެރިވެވަޑައިގެން ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ދެއްކެވި ވާހަކަފުޅުގައި، ޤައުމިއްޔަތު ދިރުވިގެންދިއުމުގެ ސަބަބުން ދިވެހީންގެ ފަސްގަނޑާއި ދިވެހީންނާއި ދިވެހި ދައުލަތް ރައްކާތެރިކުރުމުގެ ޢިލްމީ ފިކުރު ދިވެހީންގެ ވިސްނުމުގައި އަށަގަނެވިގެންދާނެ ކަމަށާއި، އެހެންވީމާ ދިވެހި ޤައުމިއްޔަތުގެ ޢިލްމަކީ ދިވެހީން ދެމިތިބުމާ ގުޅިފައިވާ ޢިލްމެއް ކަމަށް ވިދާޅުވިއެވެ. އަދި ދިވެހި ޤައުމިޔަތުގެ އިސްވަރުގެ އޮފީސް ހުޅުވިގެންދިއުމުން ޤައުމިއްޔަތު ދިރުވުމަށް ކުރަމުން އަންނަ މަސައްކަތްތައް އިތުރަށް ހަލުއިވެގެންދާނެކަމަށް ވެސް މެޑަމް ސާޖިދާވަނީ ވިދާޅުވެފައެވެ. މި މަސައްކަތް ރަސްމީކޮށް ފެށުމަކީ ދިވެހި ޤައުމިއްޔަތަށް ހޭލުންތެރި އައު ޒަމާނެއް އައުންކަމަށް ޤަބޫލުފުޅުކުރައްވާ ކަމަށް އެކަމަނާ ވިދާޅުވިއެވެ.

މި ރަސްމިއްޔާތުގައި ވަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޒަޢާމަތަށް އެއް އަހަރު ފުރުމުގެ މުނާސަބަތާ ދިމާކޮށް، ބަހުގެ ވުޒާރާގެ ފަރާތުން ފާއިތުވި އެއް އަހަރު ދުވަހުގެ ތެރޭގައި ޙާޞިލްކޮށްފައިވާ ކާމިޔާބީތައް ހިމެނޭ "ޚިދުމަތުގެ 52 ހަފުތާގެ ފޮތް" ނެރެދެއްވާފައެވެ. މި ފޮތް ނެރެދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދެވެ.