ދަޢުލަތުގެ ޚަރަދުގައި 50 ފަޤީރުން ޙައްޖަށް - ފުރަތަމަ އަހަރު ރައީސްގެ ވަޢުދު ފުއްދަވައިފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖޭގެ ޒައާމަތާ ހަވާލުވެވަޑައިގަތީ ދިވެހި ރައްޔިތުންނަށް އެެކި ގޮތްގޮތުން ކުރިމަތިވެފައި ހުރި ތަކުލީފްތަކާއި އުނދަގޫތަކަށް ހައްލުތައް ގެނެސްދެއްވުމުގެ އަޒުމްފުޅުގައެވެ. މީގެ ތެރޭގައި ހައްޖާ ގުޅުން ހުރި ކަންކަމުގައި އުފުލާންޖެހޭ ތަކުލީފުތަކަށް ނިމުމެއް ގެނެސްދެއްވުން ވެސް ހިމެނެއެވެ. މި ކަމަށް އެ މަނިކުފާނު ވަނީ ވަޢުދުވެވަޑައިގެންފައެވެ

ހައްޖާ ގުޅުންހުރި ކަންކަން ހަރުދަނާކުރެއްވުމުގެ އިތުރަށް ޙައްޖުގެ އަޅުކަން އަދާކުރުމުގެ ކެރިފޯރުންތެރިކަން ލިބިފައިނުވާ 1000 ރައްޔިތުން، އެ މަނިކުފާނުގެ ޒަޢާމަތުގެ ފުރަތަމަ ފަސް އަހަރުގެ ތެރޭގައި، ސަރުކާރުގެ ޚަރަދުގައި ޙައްޖަށް ފޮނުއްވައިދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ.

ރިޔާސީ ފުރަތަމަ ދައުރުގައި 1000 ފަޤީރުން ޙައްޖަށް ފޮނުއްވާނޭކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރެއްވީ 18 އޮގަސްޓް 2023 ވަނަ ދުވަހުގެރޭ، ރިޔާސީ އިންތިޚާބުގެ ފުރަތަމަބުރުގެ ކެމްޕޭނުގައި، މ. މުލަކު ރައްޔިތުންނާ މުޚާޠަބުކުރައްވައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާކަމުގެ މަޤާމާ އެ މަނިކުފާނު ޙަވާލުވެވަޑައިގަތްތާ ތިންވަނަ ހަފުތާގެ ތެރޭގައި، ރިޔާސީ ދައުރުގައި އަންނަ ފުރަތަމަ ޙައްޖު މޫސުމުގައި، ސަރުކާރުގެ ޚަރަދުގައި 50 ފަޤީރުން ޙައްޖަށް ފޮނުއްވުމަށް ނިންމަވައި އެ ކަން ވަނީ އިޢުލާނުކުރައްވައިފައެވެ.

ދަޢުލަތުގެ ޚަަރަދުގައި ޙައްޖަށް ގެންދާނެ މީހުން ކަނޑައެޅުމަށް ފަގީރުންގެ ލިސްޓުގައި މި ދިޔަ އަހަރު ތިބި މީހުންގެ ތެރެއިން ޝަރުޠު ހަމަވާ 982 މީހުންނާ ބައްދީގަތުން ބާއްވައި، އެ މީހުންގެ ތެރޭގައި ޝަރުތު ހަމަވާ 667 މީހުން ތިބި އިރު އޭގެ ތެރެއިން ފުރަތަމަ ފޮނުވާނެ 50 މީހުން ހޮވައިފައިވަނީ ފޭސްބުކު މެދުވެރިކޮށް އާންމުކޮށް ދުރަށް ދެއްކި ޕްރޮގުރާމެއްގައި ގުރުއަތުންނެވެ.

ޙައްޖުގެ ކަންކަން ހަރުދަނާކުރެއްވުމަށް ރައީސް ވެވަޑައިގެންފައިވާ ވަޢުދުގެ ދަށުން، ދިވެހިރާއްޖެއަށް ލިބޭ ހުރިހައި ރަސްމީ ޙައްޖު ކޯޓާއެއް މި އަހަރު ދަޢުލަތުގެ ޙައްޖު ކުންފުނި، ޙައްޖު ކޯޕަރޭޝަނާ ހަވާލުކުރައްވައިފައިވާ އިރު، ޝަރީޢާ ހުއްދަކުރާ ދާއިރާތަކުގައި ޙައްޖު ފަންޑު ވުނަކޮށް، ލުއި އަގެއްގައި ޙައްޖަށް ދިޔުމުގެ މަގު ފަހިކުރުމަށް ކަނޑައަޅުއްވައިފައިވާ ސިޔާސަތު ތަންފީޒުކުރުމުގެ ގޮތުން، ކެބިނެޓް ކަރުދާހެއް ވަނީ ރައީސުލްޖުމްހޫރިއްޔާގެ އޮފީހަށް 08 އޮގަސްޓް 2024ގައި ހުށަހަޅުއްވައިފައެވެ.

ހައްޖާ ގުޅޭ ކަންކަމުގެ އިތުރަށް ވެސް، ރާއްޖޭގައި އިސްލާމީ ހިދާޔަތާއި ދީނީ އަޤީދާ ވަރުގަދަކުރެއްވުމަށް ޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ގެންދަވަނީ ގިނަގުނަ މަސައްކަތްޕުޅުތަކެއްކުރައްވަމުންކަން ފާހަގަކުރެވެއެވެ.