"އައިކާއޯ ނެޝަނަލް އިންސްޓްރަކްޓަރސް ކޯސް" ނިންމުމުގެ ރަސްމިއްޔާތު ބާއްވައިފި

"އައިކާއޯ ނެޝަނަލް އިންސްޓްރަކްޓަރސް ކޯސް" ނިންމުމުގެ ރަސްމިއްޔާތު ބާއްވައިފި

މިނިސްޓްރީ އޮފް ޑިފެންސްގެ ޑައިރެކްޓްރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަން (ޑާސާ) އާއި އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) ގުޅިގެން "އައިކާއޯ ނެޝަނަލް އިންސްޓްރަކްޓަރސް ކޯސް"ގެ ނަމުގައި 2024 ނޮވެންބަރު 10 އިން 14 އަށް ވެލާނާ އިންޓަރނޭޝަނަލް އެއަރޕޯޓްގައި ކުރިއަށް ގެންދިޔަ ތަމްރީން ޕްރޮގްރާމް ނިންމުމުގެ ރަސްމިއްޔާތު ބާއްވައިފިއެވެ.

މިރަސްމިއްޔާތު ޝަރަފުވެރިކޮށްދެއްވައި ޕްރޮގްރާމުން ދަސްވެނިވި ބައިވެރިންނަށް ސެޓްފިކެޓް ހަވާލު ކޮށްދެއްވައިފައިވަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ލައްމާނެވެ.

މި ތަމްރީން ޕްރޮގްރާމަކީ ޑާސާގެ އިސްނެގުމުގެ މަތިން ބައިނަލްއަޤްވާމީ ވައިގެ ދަތުރުފަތުރުގެ މައި ޖަމިއްޔާ ކަމުގައިވާ އައިކާއޯގެ އޭޝިޔާ ޕެސިފިކް ރީޖަނަލް އޮފީހާ ގުޅިގެން ކުރިއަށް ގެންދެވުނު ތަމްރީން ޕްރޮގްރާމެކެވެ. 05 ދުވަހުގެ މުއްދަތަށް، ޖުމްލަ 20 ބައިވެރިންނާއިއެކު ކުރިޔަށް ގެންދެވުނު މި ޕްރޮގްރާމްގައި ޑާސާ، އޭވިއޭޝަން ސެކިއުރިޓީ ކޮމާންޑް، އައިލެންޑް އޭވިއޭޝަން ސަރވިސަސް ލިމިޓެޑް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، ވިލާ މާމިގިލި އިންޓަރނޭޝަނަލް އެއަރޕޯޓް، ގަން އިންޓަރނޭޝަނަލް އެއަރޕޯޓް އަދި މަންތާ އެއަރގެ މުވައްޒަފުން ބައިވެރިވެފައިވެއެވެ. އަދި މި ތަމްރީނުން ފާސް ވުމަށް ކަނޑައަޅާފައިވާ މިންވަރަށް ނަތީޖާ ހޯދާ ޖުމްލަ 18 ބައިވެރިއަކު ޕްރޮގްރާމް ފުރިހަމަ ކުރިކަމުގެ ސެޓްފިކެޓް ހާސިލް ކޮށްފައިވެއެވެ.

ދިވެހިރާއްޖޭގައި ހަލުވިކަމާއިއެކު ކުރިއަރަމުންދާ އޭވިއޭޝަން ސިނާއަތުގައި، ޚާއްޞަ ގޮތެއްގައި އޭވިއޭޝަން ސެކިއުރިޓީއާ ގުޅުންހުރި މަސައްކަތްތައް ކުރާ އިދާރާތަކުގެ މުވައްޒަފުންނަށް ބޭނުންވާ އޭވިއޭޝަން ސެކިއުރިޓީއާ ގުޅުންހުރި ތަމްރީންތައް ފޯރުކޮށްދިނުމުގައި، ކަމާ ގުޅުންހުރި އިދާރާތަކަށް ކުރިމަތިވެފައިވާ އެންމެ ބޮޑު ގޮންޖެހުމަކީ އެކަށިގެންވާ ފެންވަރަށް ތަމްރީން ވެފައިވާ ޤާބިލް މުދައްރިބުން ނެތުން ކަމުގައި އެ އިދާރާތަކުން ފާހަގަ ކޮށްފައިވާތީ، އެކަމަށް ހައްލު ހޯދައިދިނުމަށް އަމާޒުކޮށް ޑާސާގެ އިސްނެގުމުގެ މަތިން ހިންގުނު މި ތަމްރީން ޕްރޮގްރާމްގެ ސަބަބުން އައިކާއޯ އިން ކަނޑައަޅާފައިވާ މިންގަނޑަށް ދިވެހި މުދައްރިބުން ތަމްރީން ކުރެވިގެން ގޮސްފައިވެއެވެ. އެހެންކަމުން މި ތަމްރީން ޕްރޮގްރާމް އިން ދަސްވެނިވި ބައިވެރިން ދިވެހިރާއްޖޭގެ ނެޝަނަލް ސިވިލް އޭވިއޭޝަން ޓްރެއިނިންގ ޕޮލިސީ ގައިވާ ގޮތުގެ މަތިން އޭވިއޭޝަން ސެކިއުރިޓީ ނެޝަނަލް އިންސްޓްރަކްޓަރއެއްގެ ގޮތުގައި ސެޓިފައިވުމުގެ ފުރުސަތު ލިބިގެންދާނެއެވެ.

މި ޕްރޮގްރާމްގައި ކިޔަވައި ދެއްވާފައިވަނީ އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަންގެ ފަންނީ ތަޖްރިބާކާރު މުދައްރިބުންނެވެ. ދިވެހިރާއްޖޭގައި މިފަދަ ޕްރޮގްރާމެއް ކުރިއަށް ގެންދިއުމުގެ ނަތީޖާއެއްގެ ގޮތުން ރާއްޖޭގެ އޭވިއޭޝަން ސެކިއުރިޓީއާއި ގުޅުންހުރި އިދާރާތަކާއި އެއަރޕޯޓް އޮޕަރޭޓްކުރާ ފަރާތްތަކުގެ މުވައްޒަފުން ރާއްޖެއިން ބޭރަށް ފޮނުވައިގެން ތަމްރީންކުރުމަށް ހިނގާ ބޮޑު ޚަރަދު ސަލާމަތް ކުރެވި، ގިނަ އަދަދެއްގެ މުވައްޒަފުން ކުޑަ ޚަރަދަކުން ބައިނަލްއަޤްވާމީ ފެންވަރަށް ތަމްރީންކުރުމުގެ ފުރުސަތު ލިބިގެންދެއެވެ.

މިނިސްޓަރ އޮފް ޑިފެންސްގެ ޚާއްޞަ އިރުޝާދާއެކު ޑާސާގެ އަމާޒަކީ މަދަނީ ވައިގެ ދަތުރުފަތުރުގެ އޭވިއޭޝަން ސެކިއުރިޓީ ކަށަވަރު ކުރުމަށްޓަކައި ހަރަކާތްތެރިވާ އިދާރާތަކުގެ މުވައްޒަފުންގެ ފަންނީ ޤާބިލްކަން އިތުރުކުރުމަށް ބޭނުންވާ ތަމްރީން ޕްރޮގްރާމްތައް ބައިނަލްއަޤްވާމީ ޖަމިއްޔާތަކާއި އެކުވެރި ދައުލަތްތަކުގެ އެހީތެރިކަމާއެކު ވިހާވެސް ކުޑަ ޚަރަދަކުން ހިންގުމުގެ މަގު ތަނަވަސްކޮށް މި ޚިދުމަތަށް ބޭނުންވާ އިންސާނީ ވަސީލަތް ތަރައްޤީ ކުރުމުގައި ގަދައަޅައި މަސައްކަތްކުރުމެވެ.