"ދާލަން" އެކްސްޕޯ ގައި އެމްއެންޑީއެފުން ބައިވެރިވެއްޖެ

ނެޝަނަލް ސްކިލްސް އެންޑް ކެރިއަރ އެކްސްޕޯ "ދާލަން"ގައި އެމްއެންޑީއެފުން ބައިވެރިވެއްޖެއެވެ.

ޒުވާނުންނަށް ހުނަރާއި ޤާބިލުކަން އިތުރުކުރުމަށް ހުރި ފުރުޞަތުތައް ދެނެގަތުމަށާއި މުސްތަޤުބަލުގައި ވަޒީފާގެ މައިދާނުގައި ކުރިއަށްދެވެން ހުރި މަގުތައް ރޭވުމަށް އެހީތެރިވުމުގެ ގޮތުން ބާއްވާ ނެޝަނަލް ސްކިލްސް އެންޑް ކެރިއަރ އެކްސްޕޯގައި އެމްއެންޑީއެފުން ބައިވެރިވެއްޖެއެވެ.

ހުޅުމާލެ ސެންޓްރަލް ޕާކުގައި ކުރިއަށްދާ މި އެކްސްޕޯ ބައްލަވާލެއްވުމަށް މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވަޒީރު، ޑޮކްޓަރ މަރްޔަމް މާރިޔާއާއި، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއާއި ޖެނެރަލް އޮފިސަރުން ވަޑައިގެންނެވިއެވެ.

ފަޚުރުވެރި ދިވެހި ޢާއިލާއެއް ބިނާކުރުމުގެ ގޮތުން ހުނަރުވެރިން ތަމްރީނުކުރުމަށް ހުރި ފުރުޞަތުތައް ފަހިކޮށްދީ އުފެއްދުންތެރި ޒުވާނުން ބިނާކުރުމަށް، މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާއިން މިއަދުން ފެށިގެން ދެ ދުވަހުގެ މުއްދަތަށް ކުރިއަށްގެންދާ މި އެކްސްޕޯގައި އެމްއެންޑީއެފްގެ ސްޓޯލުން، އަސްކަރިއްޔާގައި ޒުވާނުންނަށް ކުރިއަށްދިއުމުގައި ހުރި ފުރުޞަތުތަކާ ގުޅޭގޮތުން ދަނީ މަޢުލޫމާތު ފޯރުކޮށްދެމުންނެވެ.

އެކި ދާއިރާތަކުން މަޢުލޫމާތު ދިނުމަށް މި އެކްސްޕޯގައި 45 ސްޓޯލެއް ބެހެއްޓިފައިވެއެވެ.