ކުރިއަށް އޮތް 4 އަހަރު ވެގެންދާނީ ރާއްޖޭގެ ސިއްޙީ ނިޒާމަށް އާ ބާބެއް ގެނެސްދޭ 4 އަހަރަށް - ނާޒިމް

ދަރުމަވަންތަ ހޮސްޕިޓަލް ޓަރޝަރީ ފެންވަރަށް ޚިދުމަތްދޭ ހޮސްޕިޓަލެއްގެ ގޮތުގައި ހުޅުވައިފިއެވެ.

ދަރުމަވަންތަ ހޮސްޕިޓަލް ޓަރޝަރީ ފެންވަރަށް ޚިދުމަތްދޭ ހޮސްޕިޓަލެއްގެ ގޮތުގައި ރައީސުލްޖުމްހޫރިއްޔާ ހުޅުއްވައިދެއްވީ ރޭ އެ ހޮސްޕިޓަލުގައި ބޭއްވި ޚާއްޞަ ރަސްމިއްޔާތެއްގައެވެ.

ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ހެލްތު އަބުުﷲ ނާޒިމް އިބްރާހީމް ވަނީ މި ވޭތުވެދިޔަ 52 ހަފްތާގައި ޞިއްޙީ ދާިރާއިން ގިނަ މަސައްކަތްތަކެއް ކުރައްވާފައިވާކަން ފާހަގަކުރައްވާފައެވެ. ކުރިއަށް އޮތް 4 އަހަރު ވެގެންދާނީ ރާއްޖޭގެ ސިއްޙީ ނިޒާމަށް އާ ބާބެއް ގެނެސްދޭ 4 އަހަރަށް ވާނެކަމަށްވެސް މިނިސްޓަރ ވިދާޅުވިއެވެ.

" އަޅުގަނޑުމެންގެ ސިޔާސަތުތައް ރާވާފައިވަނީ ކުރިއަށް އޮތް ހަތަރު އަހަރަށްވުރެ ވެސް ކުރިއަށް. އެއީ ކުރިއަށް އޮތް 20 އަހަރު ވިސްނައިގެން، މިޤައުމުގެ ޞިއްޙީދާއިރާއަށް ދެމެހެއްޓެނިވިގޮތެއްގައި ތަރައްޤީކުރެވޭގޮތަށް ފަރުމާކޮށްގެން" މިނިސްޓަރ ވިދާޅުވިއެވެ.

މި ސެކްޓަރ ތަރައްޤީކުރާއިރު މިހާރު ނުކުރެވި ހުރި ކަންކަމާއި އަދި މިދާއިރާގައި ހުރި ރަނގަޅު ކުރަންޖެހޭ ކަންކަމަށް ވިސްނައިގެން އެކަންކަން ރަނގަޅުކޮށް ޚިދުމަތް ރަނގަޅު ކުރުމަކީއެންމެ އިސްކަންދޭކަންތައް ކަމަށްވެސް މިނިސްޓަރ ވިދާޅުވި އެވެ.

ޞިއްޙީ ދާއިރާ ކުރިއެރުވުމަށް އަދުގެ ސަރުކާރުން ކުރައްވަމުން ގެންދަވާ ގިނަގުނަ މަސައްކަތްތަކުގެ ތެރޭގައި ހިމެނިގެން ރޭ ރަސްމިއްޔާތުގައި ރައީސުލްޖުމްހޫރިއްޔާ ވަނީ ދަރުމަވަންތަ ހޮސްޕިޓަލުގެ ފެންވަރު ރަނގަޅުކޮށް، ޓަރޝަރީ ފެންވަރުގައި ޚިދުމަތްދޭ މަރުކަޒެއްގެ ގޮތުގައި ހުޅުވައިދެއްވައި، އެ ހޮސްޕިޓަލުގައި ފަރޓިލިޓީ ސެންޓަރެއް ހުޅުވައިދެއްވައި، އަދި ހައިބްރިޑް ކެތުލެބް އިފްތިތާޙްކޮށްދެއްވާފައެވެ. މީގެއިތުރުން އެ މަނިކުފާނު ރޭ ވަނީ ދަރުމަވަންތަ ހޮސްޕިޓަލުގެ އީ. އާރް، ކުޑަކުދިންނަށް ޚާއްސަ އީ.އާރް.އެއްގެ ގޮތުގައި ކަނޑައަޅުއްވައިދެއްވާފައެވެ.

މި ރަސްމިއްޔާތުގައި މިިނިޓްރީގެ އިސްވެރިން ބައިވެރިވަޑައިގެންނެވި އެވެ.