މޯލްޑިވްސް އިކޮނޮމިކް ގޭޓްވޭ މަޝްރޫއު ތަރައްގީކުރުން: ކެޕިޓަލް އޭޝިއާ އިންވެސްޓްމަންޓްސް އާއެކު ރާއްޖެއިން ސޮއިކޮށްފި

މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕީއެލްސީ (އެމްއައިޑީއެފްޒެޑް) އިން ކެޕިޓަލް އޭޝިއާ އިންވެސްޓްމަންޓްސް ޕްރައިވެޓް ލިމިޓް (ސީއައިއޭ)އާ އެކު ފްރޭމްވޯކް އެގްރީމަންޓެއްގައި ރަސްމީކޮށް ސޮއިކޮށްފިއެވެ. މި އެއްބަސްވުމަކީ މޯލްޑިވްސް އިކޮނޮމިކް ގޭޓްވޭ މަޝްރޫއު ހިންގައި ތަރައްގީކޮށް، ރާއްޖޭގެ އިޤްތިޞާދު ސިންދަފާތު ކުރުމަށް ރައީސް ޑރ. މުޙައްމަދު މުޢިއްޒު ގެންގުޅުއްވާ އިޤްތިޞާދީ ތަސައްވަރުގެ ތެރޭގައި ހިމެނޭ މުހިންމު މަސައްކަތެއްގެ ފެށުމެވެ. މި އެއްބަސްވުމުގައި އެމްއައިޑީއެފްޒެޑްގެ ފަރާތުން ސޮއިކުރެއްވީ މެނޭޖިން ޑިރެކްޓަރު ޝިމާދު އިބްރާހިމެވެ. އަދި ސީއޭއައިގެ ފަރާތުން ސޮއިކުރެއްވީ ޗީފް ކޮމާޝަލް އޮފިސަރު ޓަން ކުން ޗިއާއޯ ޖޯޖެވެ.

ޖެނުއަރީ 2024 ގައި އުފެދުނު ދައުލަތުގެ ފަސް ކުންފުންޏެއްގެ ކޮންސޯޓިއަމެއް ކަމަށްވާ އެމްއައިޑީއެފްޒެޑުގެ މައިގަނޑު މަސައްކަތަކީ ގައުމުގެ އިގްތިސާދީ ރައްކާތެރިކަން އިތުރުކުރުމަށް ބޮޑެތި އިސްތިރާތީޖީ އިސްނެގުމެއް އިސްކޮށް ހަރަކާތްތެރިވުމެވެ. މިކަމަށްޓަކައި އެމްއީޖީ ޕްރޮޖެކްޓަކީ މި ޙަރަކާތުގެ މުހިންމު ބައެކެވެ. އޭގެ އަމާޒަކީ އިހަވަންދޫ ސަރަހައްދަކީ ވިޔަފާރިއާއި ލޮޖިސްޓިކްސްގެ ބޮޑު ހަބަކަށް ބަދަލުކުރުމެވެ. މި އެއްބަސްވުމުގެ ތެރެއިން ދެ ފަރާތުން ގުޅިގެން ޕްރޮޖެކްޓްގެ ދާއިރާ ކަނޑައެޅުމާއި، ހަރަދުތައް ވަޒަންކުރުމާއި، މާލީ އިވެލުއޭޝަންތައް ހިންގުމާއި، ޚާއްޞަ އިޤްތިޞާދީ ސަރަޙައްދުތަކުގެ އޮނިގަނޑުގެ ދަށުން މަރުހަލާތަކަކަށް ބަހާލައިގެން ތަރައްޤީކުރުމަށް ވިޔަފާރީގެ ޝަރުތުތައް ކަނޑައެޅޭނެއެވެ.