އިންޑޮނޭޝިޔާއަށް ތަމްރީނަށް ވަޑައިގެންނެވި އިމާމުންނާއި ވަޒީރު ބައްދަލުކުރައްވައިފި

އިމާމުންނަށް ރާއްޖޭން ބޭރުން ތަމްރީން ދިނުމަށް އިސްލާމީ ކަންތައްތަކާ ބެހޭ ވުޒާރާއިން ފަށާފައިވާ ހާއްސަ ޕްރޮގްރާމުގެ ދަށުން އިންޑޮނޭޝިޔާއަށް ދަތުރުކުރި އިމާމުންނާއި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ބައްދަލުކުރައްވައިފިއެވެ.

މި ބައްދަލުކުރެއްވުމުގައި ވަޒީރު ވަނީ މި ދަތުރުގައި އިމާމުންނަށް ކުރެވުނު ތަޖުރިބާގެ މަޢުލޫމާތު އޮޅުންފިލުއްވާ، ދަތުރުގެ ތެރެއިން އެނގިގެންދިޔަ ކަންކަން ބޭނުން ކުރެއްވުމަށް އިމާމުންނަށް ނަސޭހަތްތެރިވެލައްފާފައެވެ.

މި މަހުގެ 6 ގައި އިންޑޮނޭޝިޔާއަށް ފުރި އިމާމުން ތަމްރީން ޕްރޮގްރާމް ފުރިހަމަކުރެއްވުމަށްފަހު އެނބުރި އައިސްފައިވަނީ ހޯމަ ދުވަހުގެ ރޭއެވެ. މި ދަތުރުގައި ރާއްޖޭގެ އެކި ހިސާބުތަކުން 15 އިމާމުން ބައިވެރިވެލައްވާފައިވެއެވެ. މި ދަތުރުގައި އިމާމުންވަނީ އިންޑޮނޭޝިޔާގެ ހާއްސަ އިސްލާމީ ތަންތަނަށް ޒިޔާރަތް ކުރައްވާ އެތަންތަނާއި ގުޅޭ މުހިއްމު މަޢުލޫމާތު ހޯދާފައެވެ. މީގެ އިތުރުން އިމާމުންނަށް އިންޑޮނޭޝިޔާގައި ހާއްސަ އެކި ކުލާސްތައް ކުރިއަށް ގެންގޮސްފައިވާކަން ފާހަގަކޮށްލެވެއެވެ.

އިމާމުން ތަމްރީންކުރުމުގެ ޕްރޮގްރާމްގެ ތެރެއިން ދެ ބުރެއްގެ މަތީން އިމާމުން ވަނީ މި އަހަރު ސައުދީ އަރަބިއްޔާއަށް ޒިޔާރަތްކުރައްވައިފައެވެ. މީގެ އިތުރުން ބްރޫނާއިއަށްވެސް އިމާމުން ތަމްރީނަށް ގޮސްފައިވާއިރު މެލޭޝިޔާގައި މިވަގުތު އިމާމުންގެ ތަމްރީނެއް ކުރިއަށްދާކަން ފާހަގަކޮށްލެވެއެވެ. މިއާއެކު މިއަހަރު މިހާތަނަށް 100 އިމާމުން ވަނީ ރާއްޖޭން ބޭރުން އިތުރު ތަމްރީން ޙާސިލްކުރައްވާފައެވެ.