ކޮންސޯޓިއަމް ފޮރ ސްކޭލިންގ އަޕް ކްލައިމެޓް ސްމާޓް އެގްރިކަލްޗަރ އިން ސައުތު އޭޝިއާ ޕްރޮޖެކްޓްގެ ސްޓިއަރިންގ ކޮމިޓީ ބައްދަލުވުން

ދެކުނު އޭޝިއާ ސަރަޙައްދުގައި ކްލައިމެޓް ސްމާޓް އެގްރިކަލްޗަރ ކުރިއެރުވުމަށް ސާކް އެގްރިކަލްޗަރ ސެންޓަރއިން ކުރިއަށް ގެންދާ ސަރަޙައްދީ މަޝްރޫޢެއް ކަމުގައިވާ ކޮންސޯޓިއަމް ފޮރ ސްކޭލިންގ އަޕް ކްލައިމެޓް ސްމާޓް އެގްރިކަލްޗަރ އިން ސައުތު އޭޝިއާ ޕްރޮޖެކްޓްގެ ސްޓިއަރިން ކޮމިޓީ ބައްދަލުވުން މިއަދު ދިވެހިރާއްޖޭގައި ފަށައިފިއެވެ. ވިލާ ނޯޓިކާ ޕެރަޑައިސް އައިލެންޑް ރިސޯޓުގައި ކުރިއަށް ގެންދާ މިބައްދަލުވުމުގައި ސާކުގެ 7 ޤައުމުގެ މަންދޫބުންނާއި، އިންޓަނޭޝަނަލް ފަންޑް ފޮރ އެގްރިކަލްޗަރ ޑިވެލޮޕްމަންޓުން މިސަރަޙައްދަށް ކަނޑައަޅާފައިވާ އިސްވެރިޔާއާއި، އިންޓަނޭޝަނަލް ފުޑް ޕޮލިސީ ރިސާޗް އިންސްޓިޓިއުޓްއިން މިސަރަޙައްދަށް ކަނޑައަޅާފައިވާ ޑިރެކްޓަރާއި، ސާކް ޑިވެލޮޕްމަންޓް ފަންޑުގެ އިސްވެރިންގެ އިތުރުން ސާކް އެގްރިކަލްޗަރ ސެންޓަރުގެ އިސްވެރިން ވަނީ މިބައްދަލުވުމުގައި ބައިވެރިވެފައެވެ.

މި މަޝްރޫޢަކީ 2021 ވަނަ އަހަރުން ފެށިގެން މިސަރަޙައްދުގެ 6 ޤައުމެއްގައި ކުރިއަށް ގެންދާ މަޝްރޫއެކެވެ. މަޝްރޫޢުގެ އަމަލީ މަސައްކަތްތައް ހިނގަމުންދަނީ ބަންގްލަދޭޝް، ބޫޓާން، އިންޑިއާ، ނޭޕާލް، ޕާކިސްތާން އަދި ސްރީލަންކާގައެވެ. ދިވެހިރާއްޖެއަކީ މި ސަރަޙައްދުގައި ހިމެނޭ އެހެން ޤައުމުތަކެކޭ އެއްފަދައިން ހަނޑުލާއި ގޮވާމުގެ ބާވަތްތައް ހައްދަމުން ގެންދާ ޤައުމަކަށް ނުވި ނަމަވެސް، ރާއްޖޭގެ ދަނޑުވެރިކަމަށް އެކަށީގެންވާ ކަންކަން، ޚާއްޞަކޮށް މަޝްރޫޢުގައި ހިމެނޭ ކްލައިމެޓް ސްމާޓް އެގްރިކަލްޗަރ އާއި މައުލޫމާތު ޙިއްޞާކުރުމަށް ހިންގާ ޕްރޮގްރާމްތަކާއި ޙަރަކާތްތަކުގައި ބައިވެރިވުމުގެ ފުރުޞަތު މި މަޝްރޫޢުގެ ދަށުން ދިވެހިރާއްޖެއަށް ދަނީ ލިބެމުންނެވެ.

މި ބައްދަލުވުމަކީ ޕްރޮޖެޓުގެ މަސައްކަތްތައް މިހާރު ގޮސްފައިވާ މިންވަރު ދެނެގަތުމަށާއި، އެކި ޤައުމުތަކުގައި މި މަޝްރޫޢުގެ ދަށުން ކުރަމުންގެންދާ މަސައްކަތްތަކުގެ މައުލޫމާތު ޙިއްޞާ ކުރުމުގެ އިތުރުން މަޝްރޫޢުގެ މަޤްޞަދުތައް ޙާޞިލް ކުރުމަށް ކުރަން ހުރި މަސައްކަތްތަކާއި ގުޅޭ ގޮތުން މެންބަރުންގެ މެދުގައި މަޝްވަރާކުރުމަށް ބޭއްވޭ ބައްދަލުވުމެކެވެ. 2023 ވަނަ އަހަރުގެ ސްޓިއަރިން ކޮމިޓީ ބައްދަލުވުން ބާއްވާފައިވަނީ ސްރީލަންކާގައެވެ.

މި މަޝްރޫޢުގެ ފޯކަލްޕޮއިންޓަކަށް ދިވެހިރާއްޖެއިން ކަނޑައަޅާފައިވަނީ މިނިސްޓްރީގެ ޑިރެކްޓަރ އަލީ އާމިރުއެވެ. އަލީ އާމިރު ގެންދަވަނީ 2024 ވަނަ އަހަރުން ފެށިގެން ސާކް އެގްރިކަލްޗަރ ސެންޓަރުގެ ގަވާނިންގ ބޯޑުގެ ޗެއަރޕާސަންގެ މަޤާމުވެސް ފުރުއްވަމުންނެވެ. މިއަދުގެ ޕްރޮޖެކްޓް ސްޓިއަރިން ކޮމިޓީ ބައްދަލުވުން ފެށުމުގެ ރަސްމިއްޔާތުގައި އަލީ އާމިރު ވަނީ މިފަދަ ސަރަޙައްދީ މަޝްރޫޢުތަކުގެ މުހިންމުކަމުގެ މައްޗަށް އަލިއަޅުވާލާފައެވެ. އަދި މި މަޝްރޫޢުގެ ދަށުން އެކި ޤައުމުތަކުގައި ކުރަމުން ގެންދާ މަސައްކަތްތަކީ މޫސުމަށް އަންނަ ބަދަލުތަކުގެ ސަބަބުން ދެކުނު އޭޝިއާ ސަރަޙައްދުގެ ޤައުމުތަކުގެ ދަނޑުވެރިން ތަޙައްމަލު ކުރަމުންދާ ގޮންޖެހުންތަކަށް އެދެވޭ ހެޔޮ ބަދަލެއް ގެނުވާނެ މަސައްކަތްތަކެއް ކަމަށާއި، މަޝްރޫޢުގައި އެކި ޤައުމުތަކުން ޙާޞިލްކުރުމަށް ކަނޑައަޅާފައިވާ ލަނޑުދަނޑިތަށް ޙާޞިލް ކުރެވިއްޖެނަމަ މުޅި ދެކުނު އޭޝިޔާ ސަރަހައްދަށްވެސް އޭގެ އެދެވޭ މަންފާ ކުރާނެ ކަމަށްވަނީ ވިދާޅުވެފައެވެ.

ސާކް އެގްރިކަލްޗަރ ސެންޓަރާއި އިންޓަނޭޝަނަލް ފުޑް ޕޮލިސީ ރިސާޗް އިންސްޓިޓިއުޓްގެ އެހީތެރިކަމާއެކު މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އިން އިންތިޒާމު ކުރާ ސަރަޙައްދީ މި ބައްދަލުވުން މިއަދު ނިމޭއިރު މާދަމާ ދަނޑުވެރިކަމުގެ މުހިންމު ސަރަޙައްދީ ބައްދަލުވުމެއްވެސް ރާއްޖޭގައި ފެށުމަށް ވަނީ ހަމަޖެހިފައެވެ.